Коллегиянь важодемасонть ульнесть Мордовия Республикань Прявтось Артём Здунов, МР-нь Правительствань Председателень полавтыцясь Алексей Ежов, Мордовия Республикава прявт федеральной инспекторось Анатолий Гулин, Госсобраниянь Председателень полавтыцясь Евгений Тюрин, Мордовия Республикань Верховной судонь председателесь Валерий Кияйкин, республикань правань ванстомань органтнэнь руководительтне, региононь омбудсментнэ.
Мордовиянь надзоронь ведомствань прявтось Сергей Лапин пшкадсь прявт пачтямонть марто. 2023 иестэ ванстозь праваст 11 тежадо седе ламо эрицятнень, сынст ютксо инвалидт, пенсионерт, урозт ды эрицятнень лия категорият.
Покш вийть путозельть ломантнень алкуксонь лезксэнь явомантень, стакачитнень витемантень.
Башка мель явозель эрицятнень социальной праваст ванстомантень, васняяк, важодемань кисэ пандоманть коряс. Важодицятненень пандозь 43 млн седе ламо целковойть.
Свалшкань ванновт ало ульнесь лекарстватнень явомань стакачись. Прокуратуранть човорявомадонзо мейле региононь бюджетстэ башка явозельть 420 млн целковойть лекарстватнень рамамс, 700 седе ламо льготниктненень явозь эрявикс препаратт ды зяро жо инвалидтнэнень – реабилитациянь технической средстват. Ванстозь тежадо седе ламо эйкакштнень праваст, 112 урозтнэнень максозь эрямо таркат.
Свалшкань лувсо ютавтовсть эрицятнень приемт, истя жо региононь уполномоченнойтнень, республикань государственной властень органтнэнь представительтнень, районтнэнь прявттнэнь марто. Артём Здунов тешкстызе республикасонть властень органтнэнь ды прокуратуранть ютксо лезэнь кандыця вейсэнь тевдееманть. Самай секскак удалась топавтомс важодемань аволь берянь невтевкст зярыя прявт енкстнэнь коряс.
Республикасонть преступностень уровнясь седе алкине Россиянь келес среднеенть ды ПФО-нь регионтнэнь коряс. Мелят тешкстазь сеть преступлениятнень киртямось, конат топавтозь общественной таркатнесэ, ушосо, иредьстэ, рецидивень тевтне. Тешкстазь седе аламо саламот. Весень тень эйстэ ашти эрицятнень сэтьмечист.
Теке шкастонть покш стакачикс ашти сеть преступлениятнень касомась, конат топавтозь информационно-телекоммуникационной технологиятнень тевс нолдазь.
Преступностень каршо бороцямонь прявт енксокс Артём Здунов евтызе коррупциянь а нолдамонть. Республикань Прявтось евтась сюкпря прокурортнэнень бюджетэнь ярмактнень аволь видестэ тевс нолдамотнень кардамотнень коряс, кандозь емавкстнэнь велявтомань коряс важодеманть кисэ. «Бюджетэсь – те аволь андома тарка башка лицятнень туртов. Ламот уш кандсть чумондома», – мерсь региононь руководителесь.
Государственной ды муниципальной эрявиксчитнень туртов закупкатнень мельга ванноманть вельде удалась ванстомс кементь миллионт целковойть, конатне пачтязь социальной прявт тевтнень витемантень. Кода тешкстызе Мордовиянь Прявтось, эряви поладомс финансонь-экономической енкссонть порядоконь ветямонть.
Артём Здунов истя жо тешкстызе хозяйствующей зярыя субъекттнэнь пельде бюджетэнть икеле долктнень пандовтомань коряс прокуратуранть марто вейсэнь важодемань эрявиксчинть. «Эсь шкастонзо ярмактне ливтезельть, сынст эряви велявтомс, – тешкстызе Мордовиянь Прявтось. – Эряви киренть калавтнемс».
Теде башка, покш смусть канды трудонь ды социальной законодательствань топавтоманть мельга ваномась, истя жо важодемань кисэ пандоматнень, пенсиятнень ды пособиятнень ловоматнень кевкстематнесэ. Неть енкстнэ улест башка ванновт ало.
Властень органтнэнь ды прокуратурань вейсэнь вийтнень вельде иеде иес киртявить зарплатань коряс долктне.
Кемекстазь тевтнень вельде 2023 иестэ пандовтозь зарплатань коряс покш долк, ванстозь 1800 важодицятнень праваст.
Вейсэнь важодемадонть кортамсто, Артём Здунов тешкстызе эрицятнень пельде прокуратурань органтнэнень кемемань касоманть. Теде корты пшкадематнень ламолгадомась. «Зярс ломантне пшкадить – те невти: сынь марить кирдема. Кода мерсь минек Президентэсь, минек туртов те тевдеемантень гайневтема», – тешкстызе республикань руководителесь.
Мордовия Республикань Прявтонь пресс-службась