Артём Здунов тешкстызе республикань экономикань ды АПК-нь виевгавтомасо Россельхозбанконь редявикс таликанть – лезкс явови фермертнэнень ды бизнесэнтень.
2000 иестэнть саезь, зярдо РСХБ-сь панжовсь Мордовиясо, банкось путсь региононь экономикантень малав 143 млрд целковойть, истя жо АПК-с – малав 138 млрд целковойть. Россельхозбанкось – региононь велень хозяйствань секторонь кредитованиянь коряс лидер, сонзэ лезксэнзэ вельде топавтозь 25 покш инвестпроектт.
«Течи кортатано седе, кода топавтови финансовой дисциплинась – займазь ярмактнень велявтомась, лезэвстэ сынст тевс нолдамось. Ды, нама, седе тов вейсэнь тевдеемась, масторонь Президентэнь Кучоманть мельсэ кирдезь, вейсэнь покш проекттнэнь седе тов топавтомась. Минек туртов эрявить Россельхозбанконь истят подпрограмматне, кода Свое Село, Свое За городом, Свое Родное, Все Свое», – мерсь Мордовиянь Прявтось.
Денис Константинов тешкстызе, вейсэнь проекттнэ топавтовить аравтлувонть коряс: те ловсонь од ферматнень теемась, ды коромонь производствась. Арсематнесэ истя жо начко коромтнень ды комбикормонь производствань, сад-пиретнень вельмевтемань коряс проекттнэсэ улемась.
«Маласо кавто иетнестэ арсетяно 35-40% покшолгавтомс республикань финансированиянть, сестэ кредитэнь портфелень вейсэнь покшолмась карми 30 млрд целковойтнеде седе ламо, проекттнэсэ улемань покшолмась – малав 15 млрд целковойть. Минь аноктано кирдемс куш-кодат проекттнэнь, конатнень республикась арси топавтомс велень хозяйствасо ды смежной отраслятнесэ», – тешкстызе РСХБ-нь Правлениянь Председателень полавтыцясь.
Прявт енксось, конань ней вети Россельхозбанкось, – агропромышленной комплексэнть туртов кадратнень анокстамось. Россиянь Минсельхозось евты од лувт кадратнень анокстамонтень, сынст прявт тевесь – аволь ансяк ютавтомс тонавтома вузтнэсэ, СПО-нь учреждениятнесэ ды школатнесэ, истя жо максомс важодемань таркат, анокстамс сатышка специалистт отраслянть туртов.
Вастовоманть лувсо истя жо кортасть эрицятнень финансонь содамочист кастомань, органической продукциянь производительтненень лездамонь ды велень территориятнень виевгавтомань коряс госпрограмматнесэ улемань коряс мероприятиятнень ютавтомадост.
Мордовия Республикань Прявтонь пресс-службась