Мероприятиянть ушодовомадо икеле региононь руководителесь ваннызе республикань образованиянь организациятнень тонавтницятнень технической проекттнэнь выставканть. Тесэ «Шмель» квадракоптерэсь, роботось-саперось, кенерень тренажерось, RGB-полярископось, конась нолдави тевс оптической производствасонть, школань виртуальной музеесь – сонзэ вельде мереви ютамс республикань весе школатнень музейтнева. Те проектэсь невтезель «Россия» выставкасонть Цифровизациянь чистэнть. Весе те – Мордовиясо школасо тонавтницятнень ды студенттнэнь эсест важодевксэст-анокставксост.
Од ломантненень пшкадемстэ, Артём Здунов мерсь: «Весе минь явовтано вейкень-вейкень эйстэ, ансяк минек вейсэнди важодемась, минек эрямонть седе вадрякс теемань бажамось – наукасо ды технической шкинемасо покш цетавкстнэнь вельде. Минь сайтянт цетавкст спортсо, искусствасо, сехте прявтось – капшатано топавтомс паро тевть. Россиясь коенть коряс содавсь духовно-нравственной питнейчитнесэ. Арсян, минь истямокс кадовтано ды карматано натой седе вадрякс!»
Региононь руководителесь тешкстызе: Президентэнть Владимир Владимирович Путинэнь лезксэнзэ вельде республикасонть теевить тонавтнемань неень шкань условият: педе-пев витнезь 32 школат, 159 «Касомань точкат» – сынь токшить 90% велень школатнень, 146 школатнес пачтязь компьютерэнь од оборудования, теезь «Кванториум» эйкакшонь кото технопаркт ды малав 19 тежат важодемань од таркат дополнительной образованиянь системасонть.
Тедеде Мордовиясь вейсэндяви беспилотной авиациянь виевгавтомань коряс од проектэнтень. Теевить 17 специализированной кужинеть школатнесэ ды Практической анокстамонь куншкакуро Саранскоень политехнической техникумсонть.
«Минь сайтяно омбоце тарка Россиясо эйкакштнень ды од ломантнень ютксо ерокчитнень редямонь ды виевгавтомань системань лезэвчинть коряс. Те невтевксэнть а эряви киртямс! Малав 100% минек эйкакштнень токши дополнительной образованиянь системась – те пек вадря невтевкс. Весень тень прявт смустесь – лездамс тенк панжомс эсь ерокчитнень ды саемс цетавкст наукасо, шкинемасо, спортсо ды кеместэ молемс эрямованть», – тешкстызе Артем Здунов.
Сюкпрянь башка валт евтазельть тонавтыцятнень ды наставниктнень лемс – сеттненень, кие лезды од ломантненень виевгавтомс эсь ерокчитнень, истя жо тетятнень-аватнень лемс – весемесэ кирдеманть кисэ.
«Тынь эште весть невтинк, минек республикань прявт сюпавчись – те ломантне, редявикст, ероковт, конатненень эрявить панжомат ды од содамочить. Минек пельде тынь свал муйтядо кирдема ды чарькодема!» – мерсь региононь руководителесь.
Церемониянть шкасто явшевсть Мордовия Республикань Прявтонь премият общеобразовательной предметтнэнь коряс школасо тонавтницятнень весероссиянь олимпиадань меельце пельксэнь изницятненень ды призертнэнень. Невтезь гражданской позициянть кисэ Благодарственной сермасо республикань Прявтось тешкстынзе ТНБ од ломанень театрань представительтнень – труппась ютавтсь од иень невтемат Каланчаксто эйкакштнень туртов.
Мордовиянь од ломантненень пшкадсь Мордовиянь Правительствань Председателень васенце полавтыцясь Галина Лотванова: «Минь кемтяно тынк эйс – тынь минек республикань, минек ине Россиянь вандынь чись. Илядо лотка саезенть лангс!» Сон явшесь МР-нь Прявтонь премият региононь ды регионъютконь эрьва кодамо пелькстамонь ды олимпиадань изницятненень ды призертнэнень.
«Сюкпря республикантень минек важодевкстнэнь ды бажамотнень кирдемаст кисэ. Минь чарькодтяно, минек важодемась редязь, апак кадо ванновтомо минек арсематне, те невти, икеле – од изнямот республиканть ды Россиянть лезэс», – мерсь Саранскоень 12№ гимназиянь тонавтницясь, искусствань коряс школасо тонавтницятнень весероссиянь олимпиадасонть изницясь Анастасия Коннова.
«Эйкакшпингестэ саезь монь бажамокс ульнесь ломантненень лездамось – мон арсинь сюлмамс эрямонть препараттнэнь тееманть марто. Мон ламо изнинь техникумсо тонавтнезь – сон кармась «Профессионалитет» федеральной проектэнь участникекс. Арсян получамс высшей образования те енксонть коряс, штобу сы шкасто кандомс лезэ эсь чачома енксонтень», – евтнесь арсемадонзо Саранскоень услугатнень сферань ды промышленной технологиятнень техникумонь студенткась Елизавета Падерова.
Вадря ки тенк, Мордовиянь ероков од ломанть, касодо-кепетеде, изнядо, эдь республикасонть тень туртов теезь вадря условият! Мордовиясь ваны тынк лангс!
Мордовия Республикань Прявтонь пресс-службась