Тевтнень ванномась, конань ютавтызе Мордовиянь ЦУР-сь, невти: эрямонь пунктнэсэ, косо лиснить истят зыянтнэ, а явови сатышка мель сэтьместэ оймсеманть ды эенть лангсо улеманть коряс евтнемантень. Текень марто, теезь аламо таркат ушосо телень спортонть туртов.
Школань каникулатнеде икеле, конат ушодовить ацамковонь 26-це чистэ, Мордовиянь Прявтось Артём Здунов кармавтсь республикань образованиянь министерствантень ютавтомс тень коряс кортамот «Разговор о важном» уроктнень лувсо, истя жо тетятнень-аватнень промкстнэсэ, эенть, эрькетнень лангсо прянь ветямонть коряс.
«Пшкадян весе тетятненень-аватненень: кортадо тень коряс эйкакштнень марто, илинк кадо сынст ванновтомо», – мерсь региононь руководителесь.
Республикань районтнэнь ды Саранскоень прявттнэнень кармавтозь путомс пирявкст ды табличкат сеть таркатнес, косо а мереви кирякстнемс салазкесэ ды конькасо, эенть лангс лисемась канды зыян эрямонть туртов. Эряви анокстамс сатышка таркат ушосо спортонь телень видтнэсэ занятиянть туртов. Артём Здунов тешкстызе, республикаванть ардтнемстэ карми явомо покш мель сень лангс, косо ды кода эйкакштне тельня кармить ютавтомо шканть.
Тешкстасынек, Саранскойсэ тедеде теевить 19 таркат конькасо кирякстнеманть туртов. Уш ней катоктне важодить "Саранск" стадионсонть (Ульяновонь курось, 24№ кудось), "Саранск Аренасо" ды Эень дворцсэ.
Мордовия Республикань прявтонь пресс-службась