Россия Трудонь ды социальной ванстомань министрась Антон Котяков евтнесь важодемань рынканть ды занятостень службанть одкстомтомадонзо. Сон тешкстызе, неень шкань важодемань рынканть туртов кадрань политикась кеместэ сюлмавозь эрицятнень доходост касомань топавтоманть коряс национальной тевенть марто. Занятостень вадрячинть ды квалифицированной специалисттнэнь улемаст эйстэ аштить истят прявт тевтне, кода импортонь полавтомась ды масторонь технологической суверенитетэнь топавтомась. Самай секскак Россиянь Президентэнть решениянзо коряс занятостентень лездамонь системань одкстомтомась совась нацпроектэнтень.
РФ-нь Трудонь ды социальной ванстомань министрась тешкстызе: «Течи тевтеме аштицятнень невтевксэсь сехте алкине Россиянь весе историянть перть. 2023 иенть коряс невтевксэсь кармась 3,2%, ожоковсто-сундерьковсто ульнесь сехте алкине весе историянть перть – 2,9%».
Кадрань политикань талновтыця кевкстематнень коряс сессиясонть кортасть государственной деятельтне, деловой кругтнень представительтне ды эксперттнэ.
Сессиянь прявт спикертнэнь ютксто вейкекс кармась Мордовиянь Прявтось Артём Здунов, сон евтнесь экономикань кадратнень топавтомань кевкстематнень витемасо региононь опытэнть коряс.
«2024 иенть минек Президентэсь яволявтызе Семиянь иекс, мелят ульнесь Наставникень ие. Эряви кирдемс мельсэ, важодемань таркань эрьва вешницянть удало ашти семия, конантень эряви вадря, покш зарплата марто важодема», – тешкстызе республикань руководителесь.
Мордовиянть туртов, кода ламот лия регионтнэнь туртов, кадратнень туемань стакачись пек талновтыця, тенень лезды Московонть видьс шождасто пачкодемась ды сонзэ малавиксчись. Тень пингстэ республикасо улить зярыя покш промышленной кластерт, ков свал эрявить кадрат. «Россиясо минь вагононь сехте покш строицят, минек виевгавтови фармацевтической производствась, ули виев агропромышленной комплекс, секскак кадратне пек а сатыть, кода весе регионтнэсэ», – тешкстызе Артём Здунов.
Региононть ванновтозо – улемс Россиянь Минтрудонь енксонть коряс лездамонь федеральной весе программатнесэ. Сынст ютксо – занятостентень лездамонь программась, ОПК-нь сотрудниктнень профтонавтомась, эрицятнень башка категориятнень сиведемань субсидированиясь.
Мордовиясо топавтозь покш важодема занятостень службань одкстомтоманть коряс, республикань Прявтось евтась сюкпря те кевкстемасонть лездамонть кисэ трудонь ды социальной ванстомань министрантень. «Занятостень службатне кармасть седе молеме кадрань куншкакуротнень енов: ули вейкине стиль, важодицятне тонавтозь федеральной ярмактнень лангс. Минь одкстомтынек ниле куншкакурот, эште 19 – арсематнесэ», – мерсь Артём Здунов.
Республикасонть ладязь вадря вейсэнь тевдеема важодемань таркатнень максыцятнень марто, конат евтыть кадратнень кирдемань эсест лувт. Сынст ютксо – эрямо таркатнень, спортонь абоненттнэнь максомась, медицинань башка обслуживаниясь.
Истя жо регионось – икеле пекстазетненень важодемань таркатнень максомань коряс прявт проектэнь пионер. «Важодемань таркатнень максыцятне сынсь сакшныть колониятнес, тонавтыть ломаненть, ды предприятияв сы уш анокстазь специалист. Сонензэ эряви лездамс, максомс эрямо тарка, – евтнесь Мордовиянь Прявтось. – Те невтевксэсь кассь 48% видьс, ульнесь – 3%. Кеман, те важодеманть минь ламолгавтсынек Россиянь келес».
Республикань эште вейке од енксось – профориентациясь: сон ушодови аволь натой школасто, а эйдень кужосто. «Минек покш фармацевттнэ панжить эйкакштнень туртов лабораторият, содавтыть биологиянть, биотехнологиянть марто – весе те мельстуиця. Мейле школатнесэ ютавтовить экскурсият предприятиятнес, мейле молить башка стипендият. Мейле минь важодицянть кадсынек эсенек кедьсэ», – мерсь республикань Прявтось.
«Истямо важодемань лувонть марто, кеман, Мордовиясь карми изнямо шабра территориятнень марто конкурентэнь бороцямонть», – мерсь Мордовиянь Прявтонть пачтямонзо коряс Антон Котяков.
Мордовия Республикань Прявтонь пресс-службась