2023 иестэ важодемань невтевкстнэде ды 2024 иентень тевтнеде прявт пачтямонть марто пшкадсь райононь прявтось Алексей Буйнов. Сон тешкстызе СВО-нть кирдемасо ломантнень вейсэндявомаст – весемезэ боецтнэнь туртов пурназельть 15 млн целковойть. Райононь руководителесь евтась сюкпря земляктненень те покш ды эрявикс тевенть кисэ. Маштовозетнень ледстизь чатьмонемань минутасо.
Райононь прявтось пачтясь доходтнэнь кастомань, муниципальной долконь киртямонь, ули-паронь объекттнэнь инвентаризациянь коряс важодемадонть. 2023 иестэ прявт капиталонтень путозь инвестицият 430 млн целковойтнеде седе ламо – касомась кармась 113%. Малав 12% ламолгадсть вишка ды средней бизнесэнь субъекттнэ. Велень хозяйствасо производствань покшолматнень касомась кармась 112%, промышленностесэ – 105%.
Поладови важодемась мазылгавтомань-вадрялгавтомань, китнень витнемань коряс – 2024 иестэ арсеви витнемс 28 вайгельбеть. Те иестэнть истя жо арсеви строямс ведень пачтямонь сетть Краснослободск ошонь поселениясонть ды стявтомс неень шкань кавто корпуст «Золотой колос» эйкакшонь шумбрачинь витемань лагерьсэнть. Покш тевть аштить каладозь эрямонь фондонь киртямонть коряс.
Республикань Прявтось явсь мель сеть кевкстематнень лангс, конатнень коряс сави важодемс седе эрязасто. Те токши бюджетэнь эсь доходтнэнь кастоманть, финансонь дисциплинань топавтоманть.
2023 иень невтевксэнть коряс Краснослободской енксонь консолидированной бюджетс налогонь ды аволь налогонь доходтнэнь пачтямось кармась малав 140 млн целковойть, касомась - 102,8%, республиканть келес - 104,8%. «Те невтевксэсь лади тынк енксонь производствань возможносттненень ды инвестициянь потенциалонтень», – тешкстызе Артём Здунов.
Республикань руководителесь истя жо тешкстызе вишка ды средней предпринимательствань субъекттнэнь икеле просроченной кредиторской долконь касоманть.
Теде башка, а ветяви важодема финанстнэнь шумбралгавтомань программанть коряс. Мордовиянь Прявтось тешкстызе: «Потенциалось тынк пек покш, топавтовить инвестициянь од проектт. Невтемакс, ансяк велень хозяйствань виевгавтомантень велень хозяйствань 4 предприятиятне 2024 иестэнть арсить путомс инвестицият малав 255 млн. целковойтнень покшолмасо. Маласо колмо иетнестэ редявикс инвестицият арсеви путомс промметизделиятнень заводонтень».
Республикань руководителесь истя жо тешкстызе, эряви седе эрязасто важодемс ули-паронь объекттнэнь инвентаризациянть, градостроительной документациянь порядоксо кирдеманть, территориальной зонатнень ды эрямонь пункттнэнь границятнень совавтоманть, территориальной планированиянь документтнэнь анокстамонть коряс. Те иень прявт объекттнэ – шукшонь явшемань станциянь строямонь прядомась, Краснослободскойсэ ведень пачтямонь сетень ды водонапорной башнянь строямось, шукшпрянь рекультивациянь прядомась. «ЖКХ-нь одкстомтомань весе кевкстематнень эряви кирдемс башка ванновт ало», – тешкстызе Артём Здунов.
Республикань Прявтось тешкстызе шумбрачинь ванстомань объекттнэнь одкстомтомань коряс аволь берянь важодеманть. 2022 иестэ «Модернизация первичного звена здравоохранения» нацпроектэнть лувсо педе-пев витнезь Краснослободск ошонь поликлиникась. Неврологиянь отделениясонть путозь компьютерной томографиянь аппарат. Сы иенть прядовомс педе-пев витневи Краснослободской больницянь лецямонь корпусось.
Теке шкастонть ФАПтне а ладить медицинань лезксэнь явомань неень шкань вешематненень. Эряви строямс фельдшерско-акушерской пунктонь 4 од зданият.
2026 иентень школатнень педе-пев витнемань программанть лувсо кочкамо ютась Гуменской средней общеобразовательной школась. Витнемс эряви эште кавто образованиянь организациятнень. Те важодемась ули поладозь.
Сессиянть лувсо истя жо кунсолозь пачтямотне волонтёронь организациятнень тевдеемадост, районсонть од ломанень политикань топавтомадонть ды Депутаттнэнь советэнь важодемадонть.
Госсобраниянь Председателесь Владимир Чибиркин тешкстызе, якшамковонь 24-це чистэ 29 иеть топодить Мордовиянь законодательной органонтень, сон евтась поздоровт те чинть кувалма весе пурнавозетненень. Кавто иеть Владимир Чибиркин – Краснослободской енксонть пельде кочказь Госсобраниянь депутат. «Райононть вадря касомазо-кепетемазо ды покш потенциалозо, конань эряви седе смелстэ панжомс. Вадрясто ладязь волонтёронь блоконь важодемась ды СВО-нь участниктненень ды сынст семиятненень лездамось. Те вадря невтевкс од ломантнень патриотизмань лувсо тонавтомань-превс путомань туртов», – мерсь сон.
Сессиянь важодеманть прядовомга ютавтовсь каземань церемониясь. Истя, специальной военной операциянь участниктненень ды сынст семиятненень лездамонть кисэ Россиянь Президентэнь Благодарственной серма максозь Краснослободскоень авань советэнь председателентень Лариса Быстрованень.
Мордовия Республикань Прявтонь пресс-службась