Покш Березникень енксонь Черная Промза велестэ Татьяна Адушкина пшкадсь республикань руководителентень энялдома марто педе-пев витнемс кинть Паракино веленть маласо. Сонзэ кувалмозо – 1,4 вайгельбеть, кись моли зярыя велетнень трокс, косо эрить малав 600 ломанть, тия ардтни школань автобусось, муниципальной автобустнэ. Покш Березникень енксонь прявтось Иван Игонов пачтясь, витнемань тевтнень ютавтомс анокстазь проектэнь документация, конантень максозь госэкспертизань положительной заключения.
Артём Здунов тешкстызе, Паракино велесь – республикань туристтнэнь тердемань куншкакуротнестэ вейкесь, ды кармавтсь совавтомс кинь витнеманть «Безопасные и качественные дороги» нацпроектэнтень. МР-нь Госкомтрансонь Председателесь Валерий Кандрин алтась, весе тевтне улить топавтозь сы иень таштамковонь 1-це чинтень.
Инсаронь енксонь Шадымо-Рыскино велестэ Эльвира Катушкина пеняцясь мобильной связень ды мобильной интернетэнь берянь качестванть лангс. Велень эрицятненень те а вечкеви, секскак сынь примасть участия весероссиянь вайгелень максомасонть, ды Шадымо-Рыскино совась Мордовиянь 24 вишка эрямонь пункттнэнь юткс, косо 2024 иестэ карми улеме мобильной вайгелень связь ды мобильной интернет 4G технологиятнень коряс.
МР-нь цифровой виевгавтомань министрань тевтнень топавтыцясь Роман Курмакаев пачтясь, «Устранение цифрового неравенства 2.0» федеральной программань топавтомань лувсо велесэнть строяви антеннань-мачтань сооружения, тозо путови связень эрявикс оборудования. Важодемась ветяви Россиянь Федерациянь Цифровой виевгавтомань, связень ды массовой коммуникациятнень министерствань ды «Ростелеком» ПАО-нь вейсладямонть коряс федеральной бюджетэнь ярмактнэнь лангс. Сынст арсеви топавтомс 2024 иенть прядовомс, Артём Здунов кармавтсь муниципалитетэнь руководствантень эрязкадомс ютавтовиця тевтнень туртов модань участкань явоманть марто, подрядчикентень – куроксто топавтомс проектэнть.
Елена Моторкина энялдсь вадрялгавтомс общественной тарканть Отяжбуе поселканть куншкасо. 2020 иестэ «Комплексное развитие сельских территорий» программанть коряс строязь эйкакшонь налксемань площадка, витнезь Ине Отечественной войнасо маштовозь воинтнэнь кеврунгось. Ансяк перьканзо тарканть эряви вадрялгавтомс-мазылгавтомс, арась ушонь паро валдомтома, сцена, парковкань таркат. Текень марто, культурань весе мероприятиятне ютавтовить тесэ.
Кортамодонть мейле кемекстазель: сы иестэ те тарканть вадрялгавтомс-мазылгавтомс «Формирование комфортной городской среды» программанть коряс. Артём Здунов кармавтсь топавтомс весементь нурька шкас – тельня анокстамс документациянть, вадрялгавтомань-мазылгавтомань тевтнень уставамс строямонь шканть ушодовомсто. Отяжбуень енксонь прявтось Константин Николаев саизе эсензэ лангс обязательстванть: прядомс райцентрань прявт площадень вадрялгавтоманть таштамковонь 1-це чинтень.
Саранскойстэ Татьяна Шмелева сась вастовомантень энялдома марто витнемс Сущинскоень курованть 18/1, 18/2, 18/3, 20, 20а, 22а ды 24 ламо квартирань кудотнень видьс кинть. Те кевкстемань витеманть коряс ответственноесь - Саранск ошонь округонь прявтось Игорь Асабин. Артем Здунов кармавтсь витнемс кинть сы иестэ, ансяк лангс ливтезель, ошонь властне а ванськавтыть те тарканть. Теде башка, лангс ливтезель, тесэ улить стакачить азортомо гаражтнень коряс, арась валдомтома, тротуарт. Артём Здунов ледстизе мэрэнтень, ероков эрицятне – ошонь властень васенце лездыцятне, конат шкастонзо невтить муниципалитетэнь важодемань асатыкстнэнь лангс ды евтыть стакачитнень витемань кить-янт. «Весе тынк энялдоматнень Игорь Юрьевич топавтсынзе, мейле минь сонзэ марто сатано тенк инжекс велосипедтнэсэ – ванносынек вадрячинть!» – алтась Артём Здунов Химмашонь эрицянтень.
Эрицятнень марто вастовомасонть ульнесть МР-ва прявт федеральной инспекторось Анатолий Гулин ды Мордовия Республикань Прявтонь ды Мордовия Республикань Правительствань Администрациянь руководителесь Булат Хайрутдинов.
Мордовия Республикань Прявтонь пресс-службась