«Чистая вода» федеральной проектэнть лувсо строязь ведень саемань узел ды ведень ванськавтомань станция. Неть тевтнес софинансированиянть лувсо явозь 104 млн ламо целковойть. Станциясь пачти ванькс ведь «Сельхозтехника» микрорайононтень. Ведень саемань ды ванськавтомань оборудованиянь одкстомтомась лезды максомс вадря энергоресурст 2500 ламо ломантненень.
Тесэнь эрицясь Татьяна Терентьева евтнесь республикань Прявтонтень, 2014 иестэ саезь посёлкань эрицятне кирдсть покш стакачить берянь веденть кувалма. «Минек яжавсть муськемань машинкатне, савкшнось рамамс симема ведь, а те покш ярмакт. Течи минек покш тев! Крансто ней чуди ванькс ведь. Покш сюкпря тенк Артём Алексеевич, минек райононь прявтонтень ды «Чистая вода» программантень», – мерсь Татьяна Николаевна.
«Прявтось, миненек удалась витемс ломантнень туртов умонь ды сэредьксэв кевкстеманть. Ведень невтевкстнэ вадрялгадсть – ней сынь пиже зонасонть. Вадря веденть эйстэ ашти ломанень шумбрачись», – тешкстызе Артём Здунов.
Республикань Прявтось ваннызе ведень ванськавтомань станциянть, неень шкань од оборудованиянть, операторонь важодемань тарканть.
Теке чистэнть республикань руководителесь якась Лямбирень 3№ эйдень кужонтень. Тесэ одкстомтызь эйкакшонь площадкатнесэ налксемань элементтнэнь. Те топавтозь весероссиянь велень Сабантуйсэнть региононь руководителенть пельде получазь сертификатонть вельде. Неть тевтнес ютавтозь 1,5 млн целковойть.
Артём Здунов ваннызе налксемань одкстомтозь инфраструктуранть, кевкстнесь, мезе эште эряви дошкольной учреждениянтень.
«Минек эйдень кужонтень якить 260 ламо эйкакшт, важодить 12 группат, истя жо кавто логопедэнь. Весе эйдетненень туйсь мельс од площадкась. Те покш кеняркс минек туртов, сюкпря истямо казненть кисэ, – мерсь эйдень кужонь заведующеесь Ирина Хантимерова. – Минек енкссо ламо од семият, вадря, бути сынь кадовить теске эрямо ды важодеме. Арсян, социальной инфраструктурань виевгавтомась лезды тенень».
Поселкань культурань кудосонть Мордовиянь Прявтось ваннызе кинозалонть, конась эште витневи. «Истят таркатне вадрялгавтыть ломантнень эрямост. Весементь, мезесь ушодозь, эряви прядомс», – пшкадсь сон райононь прявтонтень.
«Сы иестэнть минь арсетяно явовтомс райононтень 600 млн аволь седе аламо целковойть, конат молить кавто школатнень, эйдень кужонть, культурань кудотнень витнемс, китнень теемс», – пачтясь Лямбирень енксонь прявтось Юрий Голов. Сон тешкстызе, весе неть полавтоматне топавтозь нацпроекттнэнь вельде, конатнень яволявтынзе Россиянь Президентэсь.
Мордовия Республикань Прявтонь пресс-службась