«Конституциясь тешкстызе государствань виевгавтомань лувонть, пештинзе смустьсэ истят чарькодематнень, кода ломаненть праванзо ды олячинзэ, историянь алкуксчись, семиянь свалшкань питнейчитне, – мерсь Мордовиянь Прявтось Артём Здунов. – Конституциянь гарантось – минек Президентэсь. Сон кемексты тевть Россиянь Федерациянь суверенитетэнь ды сонзэ олячинь ванстоманть коряс. Тердематне, конат аштить ней минек масторонть икеле, печтявить ансяк государствань виев прявтонть марто. Ды те – Владимир Владимирович Путин! Весемеде пек минек яттнэ пелить самай сондензэ. Тынь содатадо, Владимир Владимирович Путин кемекстась мель улемс сыця кочкамотнесэ. Ды минь кирьдсынек сонзэ те тевсэнть! Мордовиянь эрицятне кемить Президентэнтень ды ёвтыть седейшкавань сюкпря минек республикантень мелень явоманть кисэ. Сонзэ кармавтоманзо коряс Мордовиясо строязь ламо предприятият, социальной объектт. Топавтови республикань виевгавтомань покш программа национальной проекттнэнь ды социальной тевтнень лувсо, конатнень яволявтынзе Россиянь Президентэсь. Минек истя жо ули башка программа, конась теезь минек субъектэнть туртов. Минек социально-экономической весе изнявкстнэнь юрсо – федеральной центрань весемеендонь лезксэсь. Минек ули ответственностькак – федеральной эрьва целковоесь улезэ нолдазь тевс шкастонзо ды ков эряви, минь тынк марто кирдтяно тень кисэ вал. Течи покш смусть канды минек ютксто эрьванть гражданской позициясь. Россиянь виесь свал ульнесь весе раськетнень вейсэндявомасо».
Конституциянь Чинть кувалма явшезельть государственной наградат. «Течи те залонтень пурнавсть ломанть, кить алтызь эсь эрямост Россиянтень служамонтень, – мерсь Артём Здунов. – Государственной покш наградатнесэ тешкстазь специальной военной операциянь участниктне – минек геройтне, конатне, кода минек покштятнеяк, поладыть невтеме весе масторлангонтень: истямо ине масторось, кода Россия, а изняви».
Республикань руководителесь пшкадсь сюкпрянь вал марто сеттненень, кие алкуксокс важоди тылсэ – бизнес-сообществантень, общественной ды од ломанень организациятнень представительтненень, промышленностень, велень хозяйствань ды социальной енксонь важодицятненень.
«Миненек эряви кирдемс мельсэ: минек Отечествань паро эрямось ашти властенть ды обществанть ютксо свалшкань кортамонть эйстэ, – тешкстызе Мордовиянь Прявтось. – Башка пшкадян од ломантненень, конатненень течи максстано прявт документ – Россиянь Федерациянь гражданинэнь паспорт. Тынь – минек виенек! Ютыть ламо иеть – ды самай тынь карматадо кирдеме вал минек масторонть кисэ. Кеман, минек вейсэндявомась лезды Россиянтень свал кадовомс ине державакс. Минь жо свал карматано минек Президентэнть марто!»
Кенярксчинь промкссонть Мордовиянь од эрицятненень явшевсть паспортт – прявт документэнть тенст максызе республикань Прявтось.
Казнеть истя жо явшесть РФ-нь Вооружённой вийтнень Генштабонь Главной организационно-мобилизационной управлениянь прявтонь васенце полавтыцясь Сергей Побирохин, Мордовиянь Госсобраниянь Председателесь Владимир Чибиркин, Мордовиянь Правительствань Председателень полавтыцянь тевтнень топавтыцясь Алексей Ежов.
Россиянь Президентэнть пельде казнетнесэ тешкстазь «Горэлектротрансонь» водителесь Иван Кусеров, «Эволента» АО-нь виевгавтомань коряс прявтось Андрей Сараев, «ЖКХ «Ардатовское» муниципальной предприятиянь мастерэсь Олег Аринин, Зубова-Полянань енксонь «Анаевское» ООО-нь трактористэсь Серафим Шкаликов.
Мордовия Республикань Прявтонь пресс-службась