Мордовиянь эрицятненень кенярксчинть кувалма видеонть вельде поздоровонзо кучинзе Равчирень федеральной округсо Россиянь Федерациянь Президентэнь Полномочной представителесь Игорь Комаров.
«Те чистэнть минь ледстнетяно эрьва кодамо пингень, шкань ды уцяскань ломантнень. Сеттнень, кить пингеде-пингес сермадызь эсь лемест минек масторонь историянтень, а пелиця ломантнень, конат топавтсть ине тевть Отечестванть лемс, малавикстнэнь идемга. Минек моданть лангсо сэтьмечинть ды паро эрямонть кисэ. Минь ледстнетяно покштятнень-бабатнень, кить теизь ине Россиянть. Минек тетятнень ды покштятнень ине тевест свал кармить Чачома масторонтень алкуксонь вечкемань невтемакс. Ды течи минь бороцятано неофашизманть каршо. Течи Тиринь масторонтень долгост эсь эрямонть питнесэ максыть минек шкань эрицятне. Минь кирдтяно каштанчи солдаттнэнь, офицертнэнь ды доброволецтнэнь кувалма», – тешкстызе Игорь Комаров.
Полпредэнть валонзо коряс, течи эряви кадовомс вейкине раськекс, кирдемс вейкень-вейкень ды вейсэ важодемс вейсэнь тевенть лезэс. Равчирень федеральной округонь весе эрицятненень Игорь Комаров арсесь кеме шумбрачи ды паро эрямо.
Гайгсь Россиянь Федерациянь Гимнась. Промксонтень пурнавозетне кунсолызь сонзэ стядо.
«Эрзянь-мокшонь енксось свал кирдсь каштанчи эсь мужественной воинтнэнь кувалма. Ды течинь чисэнть минь нейтяно домка смусть: ансяк историянтень, сонзэ геройтненень покш мелень явоманть, кемеманть ды патриотизманть вельде минь топавтсынек минек государствань виензамонть», – мерсь Артём Здунов.
Мордовиянь лидерэсь ледстизе Белоруссиясо аволь умонь улеманть, косо советской геройтненень явить покш мель. Тенень вадря невтемакс кармасть Белоруссиянь Президентэнть Александр Лукашенконь Артём Здуновонь марто вастовомсто валтнэ, сон ледстинзе Ине Отечественной войнань иетнестэ Артём Алексеевичень покштянзо лелянзо ине тевензэ.
«Белоруссиясь кирди мельсэнзэ старшей сержантонть Здунов Василий Федоровичень - Советской Союзонь Героенть ине тевензэ, – мерсь сестэ Александр Лукашенко ды кирдизе Мордовиянь Прявтонть ушодксонзо ладямс побратимень сюлмот Минской областень Червенской райононть ды Мордовиянь Отяжбуень енксонть ютксо.
Мордовиянь Прявтось Артём Здунов башка тешкстызе, Россиясо нацизмантень арась ды зярдояк а карми тарка.
«Миненек сави невтемс тень, нолдамс тевс виенть. Аволь весень ули мелест: Россиянь ломантне эрявольть сэтьмечисэ. Западонь вийтненень а вечкеви - минь ванстано свалшкань питнейчитнень: пазнэнь кемеманть, семиянь лувтнень, церанть ды аванть ютксо сюлмотнень. Сынь а вечксызь минек ламо раськень ялгаксчинть, секс мекс те теи минек виевекс. Минек тевенек весементь тень ванстомс ды сюпалгавтомс», – мерсь региононь лидерэсь.
Артём Здуновонь валонзо коряс, Отечествантень служамонь редявикс невтема од поколениятненень максыть специальной военной операциянь участниктне. Мордовиянь од ломантне анокт лездамс, улемс сеттнень маласо, кинень те эряви. Лезксэнь кедь венстить волонтёртнэ, кадеттнэ, вешнемань движениятнес совицятне. Республикань Прявтось евтась сюкпря весенень ероков гражданской позициянть кисэ.
«Апак вано иетнень ды важодемань таркатнень лангс – те покш седеень ды келей оймень ломанть, минек ине масторонь алкуксонь эрицят. Минь тонадынек, доброволецтнэ – те од ломанть. Истя улияк, эрьвась юткстост од оймесэнзэ. Эдь, зярс минь бажатано эрямс ды лездамс малавиксэнтень, минь одтано. Тешкстаса, Мордовиянь добровольчествань движениясь саи омбоце тарка масторсонть», – мерсь Артём Здунов.
Сюкпрянь башка валт евтазельть сеттнень лемс, кить лездыть тылсэ. Сынст ютксо #МЫВМЕСТЕ штабонь, «Молодая Гвардия «Единой России» волонтёртнэ, аволь шожда тевест поладыть медицинань важодицятне, ды натой музыкань коллективтне. Свалшкань инжекс Донецкой ды Луганской республикатнесэ кармась «Торама» фольклорной ансамблясь.
«Мордовиясо волонтеронь вейсэндявкстнэ ламолгадыть. Вейсэ миненек удалы топавтомс сехте стака тевтнень. Косо-бути лезды Мордовиянь Правительствась, косо-бути предпринимательтне, религиянь организациятне. Весе те моли седеень вешеманть коряс, ды те улияк алкуксонь вейсэндявома», – тешкстызе Артём Алексеевич.
Мордовиясо теезь фронтонть туртов алтыматнень кодамонь кементь таркат.
«Минь эрязасто совавтано те важодемантень эйкакштнень. Тонавтомс мереви ансяк эсенек невтеманть вельде», – тешкстызе движениянь координаторось Наталья Сапунова.
Луганской народной республикасо гуманитарной тевень волонтёрось Полина Домнина евтнесь госпитальсэ эсензэ важодемадонзо.
«Покш сюкпря возможностенть кисэ невтемс эсь прянть, варчамс эсь вийтнень эрьва кодат енкстнэсэ. Мордовиясо од ломантнень ерокчист виевгавтомаст туртов теезь лия енов а молиця условият. Минь изнинек грант ды ней «Огарёв-Аренасо» тонавтано кирякстнеме конька лангсо омбо масторонь студенттнэнь, ламотне юткстост эйгак икеле эзть некшне», – евтнесь Полина Домнина.
Мордовиянь Прявтось Артём Здунов башка тешкстызе, ламот ушодкстнэнь, конатне истя жо токшить од ломантнень гранттнэнь вельде кирдеманть, евтынзе минек Президентэсь Владимир Владимирович Путин.
«Исяк Государствань прявтось евтызе решениянть: улемс сы шкань кочкамотнесэ. Эряви кирдемс минек Президентэнть тевтнесэ, эрьва кодат проекттнэсэ улемасонть. Владимир Владимирович – минек Президентэсь! Весемеде пек «минек яттнэ» пелить сондензэ. Пек, уш, сон сыненст а вечкеви, секс мекс маштсь вейсэндямс перьканзо рузонь модатнень, вейсэндямс весе конфессиятнень, чевте седей ломантнень. Нама, «кежень вийтне» сондензэ пелить. Миненек жо эряви аштемс кшникс», – мерсь Артём Здунов.
Мордовиянь Прявтонть валонзо вастызь цяпамосо.
Мордовиянь воинстванть пельде, конась вансты Донбассонть, Мордовиянь руководствантень ды мелень явиця весе земляктненень сюкпря евтась специальной военной операциянь участникесь Олег Рукавишников. Сон ледстизе, кода вейке тюремасонть сонзэ боецтнэ путызь зепс ангелтнэнь, конатнень теизь церынькатне ды тейтерькатне.
«Сюкпря тетятненень-аватненень истят эйкакштнень трямост-кастомаст кисэ. Миненек ули кинь кисэ воевамс! Минек эйкакштнень улезэ валдо вандынь чист. Те овсе аволь героизма, те рузонь ломантнень долгост», – мерсь Олег Рукавишников.
Отечествань Геройтнень Чистэнть явшезь государственной наградат.
izvmor.ru