«Тынк тевдееманк эйстэ ашти экономикань касомась-кепетемась ды республикань важодемань лувось. Мордовиянть трокс транспортонь ютамось свалшкане касы, секскак икеле минек учить покш строямот», – мерсь региононь руководителесь.
Меельце колмо иетнестэ республикасонть редявикстэ кассь китнень фондось – кавтодо ламоксть. Ансяк мелят витнезь 340 седе ламо вайгельбеть кить.
Республикань Прявтось башка тешкстынзе китнень топавтозь проекттнэнь, конатненень эрявсь педе-пев витнема. Те республикань прявтошсонть Фурмановонь курованть кинь ды Ботевградской курованть сэдень витнемась. Строязь пек учовиця ки пелевеенксонь промзонасонть, «северной тупиксэнть», – кода икеле лемдсть сонзэ ломантне.
«Минь евтатано покш сюкпря минек Президентэнтень Владимир Владимирович Путиннэнь – мон пачтинь сонензэ минек республикань социально-экономической виевгавтомань программанть лувсо прявт китнень строямодост. Минь свал муйтяно лезкс федеральной центранть пельде. Сон ули Россиянь Минтрансонть, Росавтодоронть ды РФ-нь Правительстванть пельде. Ансяк иенть прядовомсто примазь кавто прявт документт Мордовиянь китнень строямонь коряс башка финансированиянть коряс», – тешкстызе Артём Здунов.
Вадря динамикась лезды поладомс покш объекттнэнь топавтоманть – Рузаевкань перька кинть строямонь омбоце пельксэнть ды Саранскойсэ Строительной курованть кинть. Прядови Титовонь куросонть путепроводонь педе-пев витнемась. Целанек жо иенть прядовомс витневить китнень 360 вайгельбеть.
Арсематнесэ – федеральной центранть лезксэнзэ вельде уш тедеде ушодомс Пролетарской курованть путепровод марто кинь пельксэнь строямонть.
Весе те – китнень фондонь 10 млрд седе ламо целковойть, сынст ютксо 4,6 млрд – федеральной бюджетэнь ярмакт.
«Минь кунсолотано ломантнень мелест – бажатано витнемс сехте талновтыця пелькстнэнь, истя жо социальной объекттнэс ардоматнень. Те прявт енкстнэстэ вейкесь. Целанек, поладтано виде важодеманть. Кеман, минь а «сезьсынек» вейкеяк проектэнть. Сюкпря тынк ютксто эрьвантень вадря важодеманть кисэ!»
Мордовиянь Прявтось явшесь покш наградат китнень отраслянь важодицятненень. «За заслуги перед Отечеством» орденэнь II степенень медальсэ казезь Ельникень дорожно-строительной передвижной механизированной колоннань экскаваторонь машинистэсь Михаил Кирдяшкин. «Заслуженный строитель Республики Мордовия» почетонь лемесь максозь «Мордовдорстрой» ООО-нь геодезистэнтень Олег Аброськиннэнь ды «МАПО-ТРАНС» ООО-нь китнень строямонь коряс прявтонтень Николай Пучкиннэнь.
«Республикань руководствась покш мель яви китнень отраслянтень, эрьва ие касы строямонь-монтажонь тевтнень покшолмась. Весе коллегатненень-дорожниктненень поздоровт профессиональной кенярксчинть кувалма», – каршо валсонть мерсь Николай Пучкин.
Региононь китнень хозяйствань важодицятненень поздоровт истя жо евтасть Мордовиянь Правительствань Председателесь Дмитрий Поздняков, МР-нь Госсобраниянь Председателень полавтыцясь Сергей Вдовин ды МР-нь Транспортонь ды китнень хозяйствань коряс Госкомитетэнь председателесь Валерий Кандрин.
Мордовия Республикань Прявтонь пресс-службась