2023 иестэ республикань внутренней тевень органтнэнь ды подразделениятнень оперативно-служебной тевдеемань невтевкстнэде пачтямонть марто пшкадсь МР-ва внутренней тевень министрась Юрий Поляков. Сон истя жо тешкстынзе тевтнень сыця шкантень.
Республикань правань ванстыцятне важодить вадрясто: регионсонть преступностень уровнянь невтевксэсь – 20% седе алкине Россиясо ды ПФО-со средней невтевкстнэнь коряс. Мордовиясо апак нолда террористической акттнэнь, экстремистской акциятнень, общественной порядоконь покш коламотнень топавтома.
Порядоконь ванстыцятнень икеле кортамсто республикань Прявтось тешкстынзе енкстнэнь, конатнень коряс эряви виевгавтомс важодеманть. Истя, поладыть ламолгадомо преступлениятне, конат топавтовить ве ендо. Седе сеедьстэ те ули-паронть каршо преступлениятне – манчемат ды саламот, преступленият, конатнень кувалма емавкст кандсть 2,5 тежадо седе ламо ломанть. «Неть манчицятнесэ арась мезеяк иневанькс, ды минек туртов сынст вешнемась – честень тев», – тешкстызе Артём Здунов.
Мордовиянь Прявтось явовтынзе правань ванстыцятнень мелест кевкстематнень лангс, конат сюлмавозь ЖКХ-нь важодеманть марто. «Те телестэнть весе регионтнэ вастовсть ламо ловонь прамонть марто. Минек шабра регионтнэ натой школатнень пекстакшнызь, ютавтокшнызь дистантс, секс мекс тов ульнесь а кода пачкодемс. Минь истямо эзинек нолдакшно. Ансяк стакачитнедеяк пек ламо, истя жо китнень лангсо. Васняяк, те телень шкасто важодемантень китнень хозяйствань ладямось, коммунальной службатнень анокстамось. Редяви эрицятнень пельде пеняцямотнень ды пшкадематнень ламолгадомась. Аволь умонь промкссонть прокуратуранть ды МВД-нть марто вейсэ кемекстынек решения ютавтомс муниципальной предприятиятнень тевдеемаст ванноманть. Эряви вешнемс коммунальной техниканть, конась ливтезель муниципальной предприятиятнень банкротствань процедуранть лувсо», - мерсь Артем Здунов.
Техникань 220 единицатнень эйстэ пелькстамонь производстванть лувсо малав 150 единицатне ливтезельть республикань икелень руководствань подконтрольной организациятнес. Ошось те техниканть емавтызе. Кадовозь 70 единицатнень эйстэ 14-тне апак муе. Республикань Прявтось пшкадсь правань ванстыцятненень: эряви максомс неть тевдеематненень правомерностень питне. «Энялдан саемс тесэ принципиальной лув, – тешкстызе Артём Здунов. – Фамилиятне тосо весе содавикст. Саламс ошонть ды теде мейле вешемс ваньксчи китнень лангсо!»
Мордовиянь Прявтось явсь мель МКД-нь управляющей компаниятнень важодемаст ванномань эрявиксчинть лангс. Сынь кирдить вал кудотнень перька таркатнень, куротнес ардоматнень урядамонть кисэ, ансяк топавтыть эсь важодемаст аволь свал, эрицятне жо шкастонзо пандыть тень кисэ ярмакт.
Кортамонзо прядовомга, Артём Здунов евтась сюкпря полициянь сотрудниктненень обществасо стабильностень ванстомань коряс тевтнень топавтомантень свалшкань анокчинть, профессиональной службанть кисэ. Башка сюкпря евтазель сеть полицейскойтнень лемс, кие явсь лезкс Россиянь од регионтнэстэ коллегатненень, важодсь Северо-Кавказской округсо.
Прявт тевесь, конась ашти правань ванстыцятнень икеле, – регионсонть оперативной обстановканть мельга ванномась, критической инфраструктурань объекттнэнь, социальной учреждениятнень, транспортонть, массовой мероприятиятнень антитеррористической ванстомань коряс тевтнень топавтомась.
Коллегиясонть истя жо кортась Мордовия Республикань прокурорось Сергей Лапин.
Промксонть лувсо внутреней тевень органтнэнь сотрудниктне казевсть ведомственной ды государственной наградатнесэ.
Мордовия Республикань Прявтонь пресс-службась