«Молодая Гвардия Единой России» Весероссиянь общественной организациянь «Школа молодого политика» проектэсь – те комплексной программа, конась аравтозь од ломантнень политической социализациянтень, истя жо региононь од лидертнэнь лезэнь кандыця тевдеемантень профессиональной политической анокстамонтень. Проектэсь важоди 2015 иестэнть саезь, од политикень школанть ютызь 500 участникть.
Артём Здунов тешкстызе, од ломантнень касомась-кепетемась ашти обществань социально-экономической, общественно-политической ды социокультурной эрямонтень совавтоманть эйстэ. Самай неть тевтненень лади «Школа молодого политика» проектэсь.
Проектэнь важодемань ансяк меельце кавто иетнень перть Школань 30 сехте вадря тонавтницятне ульнесть Московсо ды якасть Государственной Думантень ды Россиянь Федерациянь Федеральной Собраниянь Федерациянь Советэнтень.
«Минек масторонь Президентэсь аволь весть тешкстакшнызе, од ломанень политикась – те государстванть туртов прявт енкс, – тешкстызе Артём Здунов. – Минь чарькодтяно: ютыть 10-20 иеть – ды тынь, течинь од ломантне, сатадо властентень. Од политикень школань тонавтомань программась лезды тенк максомс питне весе прявт тевтненень, конат молить минек обществасонть. Тыненк эряви чарькодемс, невтемакс, минек масторсонть аволь весе общественной организациятне ветить конструктивной тевдеема, улить истяткак, конат западонь государстватнень ды фондтнэнь ярмакост лангс путыть эсест икелев тев: яжамс общественно-политической лувонть».
Од политикень школась аравтозь аволь ансяк сень лангс: од ломантне чарькодевелизь весе неть тевтнень, истя жо сынь топавтост эсь проектэст ды ушодксост, истя жо грантонь пелькстамотнень вельде.
«Монь шкасто, зярдо мон ульнинь тынк иетнестэ, истят покш возможность арасельть, – мерсь республикань Прявтось. – Секскак бути тынь сыде седеень тердеманть коряс, минь тыненк лездатано. Тынь – минек кадрань резерва».
Мордовиянь Госсобраниянь спикерэсь Владимир Чибиркин тешкстызе, моли вадря динамикась проектэнь участниктнень ламочист коряс, ютазь иень Школань прядыцятне уш важодить партиянь структуратнесэ, совить од ломанень парламентэнтень, кармасть депутатонь лездыцякс.
«Молодая Гвардия Единой России» Весероссиянь общественной организациянь Мордовиянь региононь отделениянь Региононь штабонь руководителесь Данил Ульянов евтнесь, кода карми молеме тонавтнемась. Кавто ковтнень перть ютавтовить 15 вастовомат зярыя енкстнэнь коряс: «Политика», «Медиа», «Добровольчество», «Социальное проектирование». Эрьва енксонтень совавтозь лекциянь пелькс, ков тердевить республикань политической деятельтне, ды практикань пелькс. Ютавтовить кинолекторият, пелькстамот, мастер-класст, экскурсият ды истя седе тов.
Проектэнь прядыцятненень евтыть мель совамс Молодой Гвардиянтень, косо сыненст мереви невтемс ероков гражданской позицияст ды улемс республикань общественно-политической эрямосонть. Сехте вадрятне совить «Единой Россиянь» Мордовиянь региононь отделениянь кадрань резервантень.
Од политикень школань тонавтницятненень пшкадсь проектэнь свалшкань лектортнэ. Мордовия Республикань Государственной Собраниянь депутатось, республикань Государственной Собраниянь пингстэ Од ломанень парламентэнь председателесь Виктория Богдашкина тешкстызе: «Монень прась уцяска улемс спикерэкс Од политикень школань икеле составсонть, евтнинь важодемань опыттэнть, кода Мордовия Республикань Государственной Собраниянь сехте од депутат. Проектэнь участниктне макснесть сынст талновтыця кевкстемат, евтасть мелест-арсемаст башка стакачитнень коряс».
Проектсэ важодемадонть ды практикасо эсь содамочитнень тевс нолдамонь возможносттнеде евтнесь 2022 иень Од политикень школань прядыцясь, «Единой Россиянь» региононь исполнительной комитетэнь специалистэсь Анастасия Кичаева.
Проектэнь седе тов виевгавтомань арсематнеде евтнесь 2023 иень Политической лидерствань школань прядыцясь, Н.П. Огарев лемсэ МГУ-нь Историко-социологической институтонь 2-це курсонь студентэсь Денис Меркульев.
Мордовия Республикань Прявтонь пресс-службась