Прявт нежедькст теезь масторонь суверенизациянь, экономикань ды регионтнэнь виевгавтомань, ломантнень эрямонь уровняст кастомань ды семиятненень лездамонь кевкстематнень лангс.
«Течи кортамось карми молеме аволь ансяк маласо шкантень арсематнеде, истя жо прявт тевтнеде, сеть кевкстематнеде, конатнень витемаст лован прявтокс масторонь кеме, куватьс шкань касоманть-кепетеманть туртов. Эрицятнень мелест-арсемаст, сынст бажамост ды кемемаст кармасть юрокс, нежекс сеть проекттнэнь, ушодкстнэнь туртов, конат улить яволявтозь течи. Весе арсезенть минь топавтсынек ансяк вейсэ», – тешкстызе Владимир Путин.
Башка мель явозель спецоперациянь ютавтомантень, сонзэ тевтнень топавтомань туртов вийтнень пурнамонтень: «Течи, зярдо минек Тиринь масторось вансты эсь суверенитетэнть ды сэтьмечинть, вансты Донбассо ды Новороссиясо соотечественниктнень эрямост, покш талика те виде бороцямосонть саить самай минек эрицятне, минек вейсэндявомась, тиринь масторонтень кемевиксчись, сонзэ уцясканзо кисэ ответственностесь. Суверенитетэнь ванстомась, кемекстамось течи моли весе енкстнэва, ды васняяк, фронтсо, косо прянь апак вансто бороцить минек боецтнэ. Сюкпря весенень, кие ней бороци Отечествань мельтнень-ванновтнень кисэ».
Семиянь иестэнть Президентэсь эсь Кучомасонзо ламо алтась демографиянтень ды Россиянь семиянь ежомарямонтень. Владимир Путин яволявтсь од нацпроектэнть нолдамодонзо – «Семья». Сон ули алтазь семиятненень лездамонтень, седе пек ламо эйкакшонсетненень – те пособият, ипотекань коряс льготань ставкат, эйкакш марто семиятнень туртов налогонь вычетэнь покшолгавтомась. 2030 иенть самс поладови авань капиталонь программась. Федеральной бюджетсэ башка лезкс явови регионтнэнень, косо чачтомань невтевксэсь седе алкине среднероссийскоенть коряс.
«Эйкакш марто семиятнень кирдемась – минек нравственной прявт кочкамось. Ламо эйкакшонь покш семиясь кармазо нормакс, обществань эрямонь философиякс, государственной весе стратегиянь нежекс. Эряви свалшкань важодема, конась аравтозь эйкакш марто семиятнень эрямост вадрялгавтомантень, чачтоматнень ламолгавтомантень», – тешкстызе Владимир Путин.
Президентэнь Кучомадонть кортамсто, Артём Здунов тешкстызе: «Минь кандовтано регионтнэнь юткс, косо улить демографиянь алкуксонь стакачить – пек ламо ломанть меельце 30 иетнень перть тусть регионстонть, тень кувалма чачтомась аволь покш. Секскак минь, нама, соватано «Семья» программантень ды ламо эйкакшонь семиянтень кирдемантень».
Владимир Путин пачтясь, «Продолжительная и активная жизнь» од нацпроектэнть лувсо маласо кото иетнень перть шумбрачинь ванстомань объекттнэнь строямонтень, витнемантень ды оснащениянтень явовить 1 трлн целковойтнеде седе ламо, нолдави тевс эрицятнень репродуктивной шумбрачист ванстомань коряс программась.
Истя жо сы иестэнь саезь ушодови эйдень кужотнень педе-пев витнемань программась. Мезесь токши школатнень педе-пев витнеманть, Президентэсь путсь тев – 2030 иентень целанек пекстамс те стакачинть регионтнэсэ.
Тедеде тевс нолдави эште вейке национальной проектэсь - «Молодежь России». «Те кармазо минек масторонь вандынь чиденть ды вандынь чинть туртов проектэсь», – тешкстызе Владимир Путин ды евтась сюкпря тонавтыцятненень эйкакштнень тонавтомань-превс путомань коряс важодеманть кисэ.
Башка мель Президентэнь Кучомасонть явозель эрицятнень доходтнэнень, истя жо бюджетэнь сферань важодицятнень. Прявт смустесь – регионтнэнь ютксо зарплататнень явомань киртямось. Государствань прявтось путсь тев уш 2025 иестэ анокстамс субъекттнэсэ бюджетниктнень важодемаст кисэ пандомань од лув.
«Мелят Россиянь экономикась кассь масторлангонь келес седе покш темпатнесэ. Те невтевксэнть коряс минь икельдинек аволь ансяк Евросоюзонь прявт мастортнэнь, истя жо истя лемдевиця покш сисемень мастортнэнь. Маласо шкастонть минь тейтяно эште вейке эскелькс икелев: соватано масторлангонь ниле экономической сехте покш державатнень юткс. Те виевгавтоманть марто вейсэ молезэ минек эрицятнень семиятнень доходост кастомась», – мерсь Владимир Путин. Тень кувалма путозь тев 2030 иентень покшолгавтомс МРОТ-нть малав кавксть – 35 тежат целковойтнень видьс.
Кадратнень анокстамонь стакачинть истя жо тешкстызе Президентэсь – сонзэ витемась карми молеме «Кадры» од нацпроектэнть коряс. Сонзэ вельде келейгавтовить «Профессионалитет» программанть лувсо енкстнэ, кемекстави школа-вуз-важодема таркань максыця вейсэнь тевдеемась, тееви неень шкань вадря юр профессиянь получамонть туртов: СПО-нь учреждениятнень, вузтнэнь, общежитиятнень витнемась ды оснащениясь, наукань ды образованиянь куншкакуротнень виевгавтомась. Кото иетнес поладозь «Приоритет 2030» высшей школань потенциалонь кастомань коряс программась.
Мордовиянь Прявтось тешкстызе: «Весенень мельстусь «Кадры» нацпроектэсь, секс мекс те топавтсы школасто саезь вузонть видьс сы шкань специалистэнь ветямонть ды, нама, токшесы профессиональной учреждениятнень».
Покш мель Владимир Путин явсь наукасо ды промышленностесэ масторонь технологической виевгавтомантень, пешксе суверенитетэнь топавтомантень. Эряви кавксть покшолгавтомс ютавкстнэнь ванноматнень-тонавтнематнень ды важодевкстнэнь лангс, сы шкасто масторонть улезэ весемесь ды 2030 иентень киртямс импортонь пельксэнть 17%, инвестициятнень покшолманть кастомс 70%. Тень пингстэ эряви кастомс важодемань производительностенть, покшолгавтомс производствань процесстнэнь технологичностенть ды роботизированностенть, искусственной интеллектэнь тевс нолдамонть.
«Инвестициятненень государстванть пельде весе лезксэсь, предприятиятнень теемась ды модернизациясь улезэ сюлмавозь важодицятнень зарплатаст кастоманть марто, важодемань условиятнень вадрялгавтоманть марто», – тешкстызе Владимир Путин.
Бизнесэсь истя жо кармась Кучомань прявт кевкстематнень ютксо вейкекс. Мелят Россиясо тешкстазь вишка ды средней бизнесэнь енкссо 1,2 млн од компаният – те сехте покш невтевкс меельце вете иетнень перть. Президентэсь яволявтсь бизнесэнтень лездамонь зярыя тевтнеде ды тешкстызе: «Эряви лездамс предпринимательтненень. Сынь теить важодемань таркат, максыть важодема, зарплата пандыть ломантненень. Тенесэ властень смустесь – лездамс».
Государствань прявтось евтась сюкпря АПК-нь важодицятненень. 2030 иентень Россиянь АПК-нь производствань покшолмась эште касозо нилеце пельксстэ аволь седе аламос 2021 иенть коряс, экспортось касозо вейкес ды пельс. Поладови отраслянтень лездамось ды велетнень комплексной касомань-кепетемань программань топавтомась.
Покш мель масторонь Президентэсь явсь цифровизациянтень: уш ней Россиясь – масторлангсонть васенце электронной лувсо государственной услугатнень явоманть коряс. Цифровизациянь коряс важодемась поладови «Экономика данных» од нацпроектэнть лувсо.
Владимир Путинэнь кортамонь прявт кевкстематнестэ вейкекс кармась масторонь регионтнэнь виевгавтомась, васняяк сынст долктнень киртямось. Сон яволявтсь бюджетэнь кредиттнэнь коряс регионтнэнь 2/3 долктнень нардамодост.
«Истя жо арсян, регионтнэнень эряви максомс седе келей возможностть нолдамс тевс ярмактнень национальной проекттнэнь тевтнень топавтоманть лувсо, - тешкстызе государствань лидерэсь. – Ней масторонь 10 субъекттнэ, конатнень бюджетэнь алкине обеспечениясь, топавтыть социально-экономической виевгавтомань башка программат. Правительствантень эряви поладомс неть программатнень тевдееманть эште 6 иетнес. 2030 иентень весе минек регионтнэ кармаст экономикань коряс седе виевекс. Эште весть евтаса, те видечинь, эрицятнень туртов эсь прянь муемань-невтемань туртов вейкеть условиятнень ды весе масторонь келес эрямонь покш стандарттнэнь кевкстемась».
Республикань руководителесь те енксонть коряс Президентэнть решениядонзо мерсь: «Минь важодтяно финансонь дисциплинанть, Мордовиянь экономиканть коряс. Теинек порядок, совинек финанстнэнь вадрясто топавтомань регионтнэнь юткс. Ансяк неть решениятне максыть тенек возможность инвестициятнень туртов – сень мельсэ кирдезь: курок минек тееви экономикань башка зона, келейгавтозь ТОСЭР-сь. Ней эряви теемс путовкс экономикантень – те сехте виде: теемс путовкс сень эйс, мезесь максы каршо лезкс, штобу минь витевельнек социальной тевтнень».
Государствань прявтось истя жо явсь мель налогонь системань важодеманть лангс – эряви одкстомтомс фискальной системанть ды седе видестэ явшемс налогонь сталмотнень.
Владимир Путин евтась мель кочкамс эште 200 седе ламо покш ды вишка ошт – сынст ютксто эрьванть туртов улезэ анокстазь ды топавтозь эсензэ мастер-план (целанек виевгавтомань программась токшесы малав 2 тежат эрямонь пункттнэнь). Поладозь общественной территориятнень вадрялгавтомань-мазылгавтомань коряс программась – Россиянь келес кото иетнень перть вадрялгавтовить-мазылгавтовить 30 тежадо седе ламо общественной таркат.
Покш мель явозель культурань ды туризмань коряс проекттнэнень, келейгавтовить Пушкинэнь картань возможносттне, 2025 иестэнь саезь тевс нолдави «Земский работник культуры» программась.
Президентэсь истя жо яволявтсь «Чистая вода» госпрограмманть поладомадонзо ды каладозь кудотнестэ одс эрицятнень ютавтомань коряс од программанть совавтомадонзо. Государствань прявтонть решениянзо коряс социальной газификациянь коряс программанть мереви нолдамс тевс сад-пирень товариществатненень. Целанек ЖКХ-нь одкстомтомантень явовить 4,5 трлн целковойть. 2030 иенть самс регионтнэнень явовить общественной эрьва кодамо транспортонь малав 40 тежат единицат, одкстомтови школань автобустнэнь паркось.
СВО-нь участниктнеде кортамсто, Владимир Путин тешкстызе: «Сынь лисест прявт таркатнес од ломантнень тонавтомань ды превс путомань системасонть, общественной вейсэндявкстнэсэ, госкомпаниятнесэ, бизнессэ, государственной ды муниципальной управлениясо, улест регионтнэнь, предприятиятнень, отечественной сехте покш проекттнэнь прявтсо. «Элита» валось ламосо емавтызе смустензэ. Алкуксонь элитась – сеть, кить служить Россиянтень, важодицятне ды воинтнэ, кить тевсэ невтизь Россиянтень кемевиксчинть». Государствань прявтось яволявтсь СВО-нь участниктнень туртов «Время героев» кадрань од проектэнть ушодомадонзо, тов понгоманть туртов яволявтоматнень мереви каямс 2024 иень эйзюрковонь 1-це чистэнть саезь.
Кучоманть прядовомга Президентэсь тешкстызе: «Иенть прядовомс национальной весе проекттнэ, конатнеде мон течи кортынь, улест кемекстазь, сюлмавозь эсь ютковаст. Те аволь башка ведомствань проекттнэ, сынь важодест вейсэнь тевтнень коряс, виевгавтомань национальной тевтнень топавтоманть лангс. Прявтось – те ломантнень питнень максомась, се, кода полавтови вадря енов сынст эрямост. Минь вейке покш семия. Минь вейсэ, ды секскак тейтяно весементь истя, кода арсетяно ды бажатано теемс. Кеман минек изнямотнес, Россиянь вандынь чинтень!»
«Те Кучомась сехте виевтнестэ вейкесь – эйсэнзэ токшезь малав весе енкстнэ. Минек туртов прявтось: весе проекттнэ – ошонь вадря средань, инфраструктурань одкстомтомань коряс – кармить важодеме 2030 иенть самс, – мерсь Артём Здунов. – Седейс токшимем меельце яволявтомась сеттнень кирдемадо, кить ней воевить. Минь эсенек уровнясо карматано важодеме цератнень марто: карми федеральной покш проект, минь тейтяно эсенек республикань, "Моя Мордовия" кадрань проектэнть кондямо. Цератне маряст алкуксонь кирдема, сынь муест эсь таркаст седе мейле, кода велявтыть СВО-стонть. Те сеть ломантне, конатнень лангс миненек мереви нежедемс!»
Мордовия Республикань Прявтонь пресс-службась