«Мон кирдян каштанчи тынк кувалма, ялгат, кирдян каштанчи Мордовиянь од ломантнень кувалма! Ней весе китне тынк икеле панжадот – важоди грантонь лезксэсь, мереви пурнамс вейсэндявкс, панжовить од ломанень куншкакурот. Весе те топавтови минек Президентэнть лезксэнзэ вельде. Миненек эряви идемс те кемеманть! Секскак вейсэ – тонавтнемасо, важодемасо, минек цетавкстнэсэ – минь, нама, тень невтсынек!» – мерсь Артём Здунов.
Региононь руководителесь казинзе Мордовиянь од ломанень сехте редявикс представительтнень ды сынст наставниктнень, конат теить путовкс движениянь виевгавтомантень. Од ломанень пространстватнень ды вузтнэнь ютксо «Координаты событий» номинациясонть изнясь М.Е. Евсевьевень лемсэ МГПУ-нь универсальной педагогической компетенциятнень технопаркось, НКО-нь од ломанень лидертнэнь ютксо «Веду за собой» номинациясонть – МР-нь Од ломанень правительствань председателесь Виктор Гущин. «Всегда рядом» номинациясонть изницякс кармасть «Т2 Мобайл» ООО-нь Саранскоень филиалось ды МР-со Ростелекомось. «Создаю события» номинациясонть изнясь «Эрьзя Фест» оймсема чинь фестивалесь, «Создаю систему» номинациясонть – Саранскоень прявтонь полавтыцясь-Соцполитикань коряс департаментэнь прявтось Оксана Шуляпова. «Мотивирую опытом» номинациясонть – 1941-1945 иетнень войнань ды трудонь подвигень мемориальной музеень прявтонь полавтыцясь Ирина Дуденкова ды Юстициянь весероссиянь государственной университетэнь филиалонь Средне-Волжской институтонь воспитаниянь важодемань коряс отделэнь прявтось Майя Журавлева.
Специальной военной операциянь весе участниктнень пельде республикань мелень явиця од ломантненень сюкпрянь валт евтась СВО-нь ветеранось Алексей Владимиров: «Сюкпря весенень, кие лездась ды лезды передовойсэ боецтнэнень лембе валтнэсэ, кекшемань алтыматнесэ, озноматнесэ. Весе те пек эряви! Мон неинь, кода серматнень ловномсто, конат сыть тиринь Мордовиясто, нолдыть сельведест виев цератне». Сон явшесь казнеть «Вектор Добра» ды «Отряд Добра» республикань пелькстамотнень изницятненень ды призертнэнень.
Н. П. Огарев лемсэ МГУ-нь ректорось Дмитрий Глушко тешкстызе, вузонь студенттнэ а кадовить ве енов весероссиянь повестканть эйстэ. Сынь примить участия СВО-сонть, 117 студенттнэнь – тосот тетяст ды мирдест, вузсонть тонавтнить СВО-нь участниктнень семиянь члентнэ. Ректорось казинзе «Студент года» региононь пелькстамонь финалисттнэнь. «Кирдтяно каштанчи минек студенттнэнь кувалма!» – тешкстызе сон.
Мордовиянь Од ломанень тевтнень коряс Госкомитетэнь председателесь Анастасия Гришнева явшесь Од ломантнень тевест коряс федеральной агентствань наградат.
Те чистэнть Мордовиянь од ломантнень чачсь эсест морост – «Событие» форумонь участниктне маризь сонзэ васенцекс. Те чистэнть «Огарев Аренасо» важодсть интерактивной площадкат, од ломантненень меревсь варчамс виест спортонь пелькстамотнесэ, налксемс, муемс од ялгат.
Мордовия Республикань Прявтонь пресс-службась