Мордовиянь строямонь отраслясо важодемань невтевкстнэде пачтямонть марто пшкадсь МР-нь строительствань ды архитектурань министрась Алексей Гришакин. Ютазь иень невтевкстнэнь коряс республикасонть 31 млрд седе ламо целковойтнес топавтозь строямонь-монтажонь тевтне. «Жилье» нацпроектэнть лувсо эксплуатацияс максозь эрямо таркатнень 360 тежадо седе ламо кавонзазь метрат (касомась 105% седе ламо). Каладозь кудотнестэ одс эрицятнень ютавтомань программанть коряс, конась прядозь регионсонть шкадо икеле, од квартиратнес совасть 1800 седе ламо ломанть. Тешкстазель, эряви явомс башка мель каладозь кудотнень, конатнестэ эрицятне ютавтозь од таркатнес, яжамонть лангс. Меельце иетнестэ васенцеде редявикстэ кассь уроз-эйкакштненень эрямо таркатнень явомась – 27% седе ламос.
Вадрясто топавтозь «Стимул» программась. Сонзэ лувсо, истя жо, строязь транспортонь ды инженерэнь инфраструктурань 11 объектт – витнезь коллекторось Саранскоень юго-западонь пелькссэнть, строязь кить нилеце микрорайонсонть, сетть Северо-Восточной шоссень од кварталсонть.
Иень перть республикасонть строязь ды витнезь зярыя покш объектт – Саранскойсэ 1450 таркас школа, велоспортонь коряс региононь куншкакуро, Ковылкинасо эень вельтязь каток, Рузаевкасо эйкакшонь поликлиника, Темниковань енксонь Ташто ош велесэнть ды Рузаевкань енксонь Совхоз «Красное сельцо» поселкасонть культурань кудотне, Сыре ломантнень ды инвалидтнэнь туртов Краснослободскоень кудось-интернатось ды лият.
Текень марто тешкстазель, строямонь отраслянтень а сатыть кадрат – малав 900 ломанть. Стакачинть арсеви витемс весемеендо – СПО-нь учреждениятнень марто вейсэнь тевдееманть, федеральной проекттнэсэ улеманть ды лия регионтнэстэ од специалисттнэнь тердеманть вельде.
ЖКХ-нь коряс иень невтевкстнэде пачтясь МР-нь энергетикань ды жилищно-коммунальной хозяйствань министрась Александр Голянин. Республикасонть коммунальной инфраструктурань таштомгадомась – 60%. Тень кувалма сеедьстэ лиснить аварият. 2023 иестэ ЖКХ-нь объекттнэнь ды инженерэнь инфраструктурань витнемс явозь 55 млн целковойть, тедеде неть тевтнес явовить 50 млн. «Формирование комфортной городской среды» проектэнть коряс мелят витнезь 19 кудотнень перька таркат ды 9 общественной территорият, педе-пев витнезь 294 МКД.
Мелят ютавтозь Мордовия Республикань Социально-экономической виевгавтомань программань кавто мероприятият вейсэнь питнесэ 113 млн целковойть, программась топавтови Россиянь Президентэнть решениянзо коряс, - строязь КНС ды ведень отведениянь сетть Лямбирень енксонь Берсеневка велесэ ды витнезь 4№ канализациянь коллекторонь пельксэсь Саранскойсэ.
Мелят прядозь «Чистая вода» федеральной проектэнь колмо мероприятиятне. Тедеде эряви строямс ведень пачтямонь сетть ды водонапорной башня Краснослободскойсэ. Территориятнень виевгавтомань фондонь ярмактнень явоманть вельде топавтозь Саранскойсэ лембень пачтямонь системань одкстомтомань кавто проектт, вейсэнь питнесэ 620 млн целковойть. Фондонть лезксэнзэ вельде МР-нь коммунальной инфраструктурань одкстомтомань программанть коряс витнезь 3,5 вайгельбень кувалмсо канализациянь сетть Саранскойсэ Республиканской ды Серовонь куротнева.
Артём Здунов тешкстызе: «Россиянь Федерациянь Президентэнть Владимир Владимирович Путинэнь лезксэнзэ пингстэ, вишка тевтнень политиканть вельде ломантнень ламот кармавтоматнень минь топавтынек».
Региононь руководителесь тешкстызе: кенярдовты эрямо таркатнень строямонь невтевксэсь, ансяк эряви явомс мель од квартиратнень коряс вешеманть ды сынст питнетнень лангс. «Ванодо питнень политиканть коряс, сонзэ эряви кирдемс мельсэ, зярдо явтадо модань участкатнень. Строямс аламо, эряви эште миемс! Тееведе строямонь политикань топавтомань коряс штабокс, важодеде социальной блоконть марто федеральной программатнень коряс. Уроз-эйкакштнень коряс минь шаштовинек икелев, эряви важодемс весе категориятнень коряс», – пшкадсь Артем Здунов строительствань ды архитектурань министрантень.
Мордовиянь Прявтось тешкстынзе прявт тевтнень, конат аштить республикань строямонь отраслянть икеле. Эряви эрязасто нолдамс тевс эрямо таркатнень строямонть туртов Ботанической садонть маласо модатнень. Теде башка, эряви витемс «Мордовия Арена» перька тарканть документэнь теевтемань коряс стакачинть, кундамс Саранскойсэ котоце микрорайононь проектированиянтень ды строямонтень. Местной самоуправлениянь органтнэнь марто вейсэ эряви поладомс важодеманть Ули-паронь вейкине государственной реестрантень республикань эрямонь пункттнэнь ды территориальной зонатнень весе границятнень 100% совавтомань коряс.
Покш тевть путозь энергетикань ды ЖКХ-нь министерстванть икелев. Артём Здунов тешкстызе: «Эряви вешнемс средстват ды седе эрязасто невтемс прянть федеральной программатнесэ, конат лездыть одкстомтомс коммунальной инфраструктуранть. Миненек эрявить дешува ярмакт! Покш мель марто ванодо тень мельга ды явовтодо ярмакт федеральной проекттнэнь лувсо».
Мордовиянь Прявтось тешкстызе: эряви весемеендо нолдамс тевс газификациянь ды догазификациянь программанть. Сы иестэ федеральной лезксэнть вельде эряви прядомс отходтнэнь обработкань коряс межмуниципальной комплексэнь строямонть, сы шкантень тевесь – полигонт ды шукшонь башка-башка явшемань куншкакурот. Сы иенть прядовомс Мордовия Республикань Социально-экономической виевгавтомань программанть лувсо арсеви топавтомс мероприятият ЖКХ-нь эште кавто объекттнэнь коряс, вейсэнь питнесэ 198 млн целковойть, «ФКГС» федеральной программанть коряс – витнемс-мазылгавтомс сисем кудотнень перька таркатнень ды 11 общественной территориятнень, истя жо ютавтомс важодемат объекттнэсэ, конат изнясть Инсарсо ды Темниковасо ошонь вадря средань теемань сехте вадря проекттнэнь весероссиянь пелькстамосонть.
Мордовиянь Прявтось истя жо кирдизе Энергетикань ды ЖКХ-нь министранть арсемазо: теемс общественной совет МинЖКХ-нть пингстэ – те лезды ладямс вадря важодема эрямо таркатнень азортнэнь представительтнень марто. Те ушодксонть ведомствань руководителентень эряви ветямс эстензэ. Истя жо эряви витемс тевтнень жилищно-коммунальной услугатнень ды ресурстнэнь кисэ долктнень коряс.
«Сыця шкась – аволь шожда, максстано ламо покш объектт. Весень сынст эряви максомс, истя жо куватьс строявицятнень. Ды яводо мель 2025-2027 иетнес объекттнэнь проектированиянть лангс, весемесь улезэ теезь шкастонзо», – мерсь Артём Здунов.
Коллегиясонть мелят важодемань цетавкстнэде ды сы шкантень арсематнеде пачтясть МР-нь Педе-пев строямонь управлениянь прявтось Алексей Ермишев ды «Саранское водопроводно-канализационное хозяйство» МП-нь прявтось Юрий Шохин.
Мероприятиянть прядовомга ютавтовсь строямонь ды жилищно-коммунальной енкстнэнь важодицятнень государственной наградатнесэ каземань церемониясь.
Мордовия Республикань Прявтонь пресс-службась