Семиянь ламо функциянь куншкакуротнень таргось ушодовсь чадыковонь 1-це чистэ масторонь весе субъекттнэсэ Эрямонь стака шкас понгозь эйкакштненень лездамонь фондонть ушодксонзо коряс ды «Единая Россия» партиянть лезксэнзэ пингстэ. Прявт смустесь – евтнемс эрицятненень те площадкань возможносттнеде. Республикасонть Семиянь МФЦ-сь важоди «Надежда» приютонть юрсо. Весе таргонть перть кармить ютамо мероприятият эйкакштнень ды тетятнень-аватнень туртов. Чадыковонь 1-це чистэ уш ютавтовсть «Прежде всего мы - родители!» ды «Азбука семейного общения» тренингтне, чадыковонь 2-це чистэ кругловой столенть юрсо кортасть ведомстватнень ютксо вейсэнь тевдеемань кевкстематнеде.
Таргонть лувсо мероприятиятненень питне макссь Артём Здунов. МР-нь общественной кирдемань площадкасонть педагогтне-психологтне ютавтсть эйкакштнень туртов тренингть, Семиянь МФЦ-нь специалисттнэ – оригами техникасонть артомань ды парикмахерэнь искусствань коряс мастер-класст. Семиянь МФЦ-нь таргось карми молеме чадыковонь 7-це чинть видьс.
Артём Здунов истя жо кортась тренертнэнь ды спортсментнэнь марто, конат састь Белгородской областестэ. 32 шожда атлетт ды колмо тонавтыцят аволь умок састь минек республикав приграничной региононь малав 200 эрицятнень марто. Эйкакштнень туртов анокстазь экскурсиянь программа, ошонть ды республиканть марто содавтома, культурань ды спортонь объекттнэнь ваннома.
Мордовиянь Прявтось евтнесь, минек регионось спортивной – тесэ ули неень шкань инфраструктура. Республикась истя жо содавикс образованиянь системасонть – аноксты специалистт эрьва кодат енкстнэнь коряс, конат эрявить промышленностенть туртов, сови масторонь топ регионтнэнь юткс олимпиадань движениянть, школасо анокстамонь уровнянть коряс.
«Яводо мель минек вузтнэнь лангс, шкась ливти пек курок – эряви молемс тонавтнеме. Теке шкастонть явомс мель спортонтень – минек тень туртов вадрят условиянок. Минь вечксынек культуранть – республикасонть пек вадрят театрат, сынь ламо ардтнить гастрольтнева. Ошось паро, республикась сэтьме ды мазый, – мерсь Артём Здунов. – Минь пек кенярдтано тынк неемс! Минек туртов прявтось: свалшкане моли полавтома, вейсэ минь касстано. Тыненк свал эряви кемемс минек лавтовонть лангс».
Тренерэсь-преподавателесь Валентина Долгополова евтнесь, делегациянть вастызь кеняркс марто, эрямонь ды тренировкань условиятне пек вадрят. «Минь тесэ уцяскавт, понгинек алкуксонь евксос! Марятано, минь аволь ськамонок, те невти, изнямось карми минек», – мерсь тонавтыцясь.
Юлия спортсменкась евтнесь, уш вете иеть яки шожда атлетикав ды евтась сюкпря вадря вастоманть кисэ. Тонавтнемань-тренировкань промкстнэнь лувсо, конат ютавтовить Мордовиясо, сон арси вадрялгавтомс эсь цетавкстнэнь ды спортонь разрядонть. «Эсь профессиянть арсян сюлмамс спортонть марто. Саранскойсэ минь ютатано вадря тренировкат, виевгадтано. Ульнинек экскурсиятнесэ – те пек мельстуиця», – тешкстызе Юлия.
Артём Здунов макссь питней превспутома – таштамс эрьва кодат сюлмот ломантнень марто, истя жо Мордовиясто – сынь маштовить эрямосонть. Сон истя жо макссь превспутома ванномс тонавтнемань таркакс республикань вузтнэстэ вейкенть.
«Сюкпря истят вадря условиятнесэ тренировкатнень кисэ, – мерсь областень пелькстамотнень призерось Захар. – Зярыя читнень перть, зярдо минь тесэ, мон карминь содамо од республикадонть, сонзэ прявтоштонть. Лован, эряви содамс лия раськетнень историянть».
Тренерэсь-преподавателесь Игорь Савчук евтась сюкпря Белгородской областень губернаторонтень ды Мордовиянь Прявтонтень те ардоманть анокстамонзо, тренировкань вадря условиятнень тееманть кисэ. Сон евтнесь, Белгородской областесэ ютавтови Курской битвань геройтнень лемс алтазь Яковлевской марафонось, ды тердизе Артём Здуновонь примамс участия сыця пелькстамотнесэ: «Учотано миненек инжекс!»
Вастовоманть прядовомга Артём Здунов явшесь инжетненень ледстнемань казнеть. «Карматано кирдеме ялгаксчинь сюлмот ды лездамо вейке вейкенень сехте аволь шожда шкатнестэ», – мерсь сон.
Мордовия Республикань Прявтонь Пресс-службась