Сонзэ важодемасонть примить участия государственной ды общественной деятельтне, церьковань иерархтне, эксперттнэ ды ученойтне. Мордовиянь Прявтось Артём Здунов форумсонть «Идеологические основы демографической и семейной политики» секциянь прявтсо.
"Минек секциясь алтазь эрямонь прявт юртнэнень – семиянтень, демографиянтень, эйкакштненень, сынст кастомантень-тонавтомантень, – тешкстызе республикань Прявтось. – Минек кедьсэ ули статистика, минь вадрясто содатано, мезе моли регионтнэсэ, минь понгинек демографиянь аволь шожда тевтнес, минек пек алкине чачтомась. Секскак миненек эряви чарькодемс, мезе тень марто теемс. Тесэ минь важодтяно вейсэ Рузонь православной церькованть марто, кемекстатано башка эскелькст, конат лездыть вадрялгавтомс тевтнень».
Артём Здунов тешкстызе, демографиянть лангс берянь тешкс полады путомо аволь коень отношениятнень, феминизмань, «эйкакштомо олячинь» ды лия зыянонь кандыця мельтнень-арсематнень западонь пропагандась. Весе те путы тешкс од ломантнень питнейчинь ванновтост лангс. Мордовиянь Прявтось тешкстызе: тевтнень полавтомс мереви, тень туртов эряви вейсэндямс государственной структуратнень ды общественной организациятнень виест духовно-нравственной воспитаниянь, семиянь свалшкань койтнень кирдемань кевкстематнесэ.
Республикасонть важодемась ветяви вейкине идеологической фронтсонть, Рузонь православной церькованть, мусульманской сообществанть, лия свалшкань конфессиятнень, общественной весе институттнэнь, НКО-нь, социально ответственной бизнесэнть марто вейсэнь тевдеемань лувсонть. Топавтовить пешксе, ламо эйкакшонь семиятненень лездамонь ушодкстнэ, ютавтовить мероприятият семиянь питнейчитнень кемекстамонь, военно-патриотической воспитаниянь, массовой спортонь виевгавтомань коряс.
«Женщины за жизнь» паронь теемань фондонть марто вейсэ нолдазь «Здравствуй, мама» проектэсь. Сон анокстазь вейсэ Россиянь Общественной палатанть марто, совась «Сильные идеи для нового времени» форумонь ТОП-10 сехте вадря ушодкстнэнь юткс ды невтезель Россиянь Президентэнтень Стратегической инициативатнень агентствань форумсонть. Проектэнть истя жо кирдизе Московонь ды весе Русень Иневанькс Патриархось Кирилл.
Цетавкст уш улить – республикасонть иенть перть аборттнэ киртявсть 42%, меельце колмо иетнестэ киртявсть 1,5-ксть. Ней Мордовиянь проектэсь лезэвстэ нолдави тевс лия регионтнэсэ. «Единая Россия» партиясь кучсь рекомендацият Россиянь Минздравс, Минтрудс, ды масторонь субъекттнэс сонзэ эрямос совавтоманть коряс.
Артём Здунов тешкстызе, те важодемась ансяк ушодови, евтась мель кирдемс региононь ушодкстнэнь ды тердинзе участниктнень Национальной демографической форумонтень, конась ютавтови Мордовиясо сы иестэнть. Секциясонть истя жо кортасть федеральной ды региононь законодательной органтнэнь, общественной организациятнень, медицинань сообществань, Рузонь православной церьковань представительтне.
Мордовия Республикань Прявтонь пресс-службась