Артём Здунов явшесь панжомат школань од автобустнэнь ды медицинань лезксэнь куроксто явомань автомашинатнень пельде

Артём Здунов явшесь панжомат школань од автобустнэнь ды медицинань лезксэнь куроксто явомань автомашинатнень пельде

Ацамковонь 21-це чистэ Саранскойсэ Изнямонь площадьсэнть ютавтовсь школань од автобустнэнь ды медицинань лезксэнь куроксто явомань автомашинатнень пельде панжоматнень явшемань церемониясь. Тосо ульнесь Мордовиянь Прявтось Артём Здунов. «Меельце иетнестэ минь редявикстэ пештинек минек автопарконть неень шкань од машинатнесэ. Минек Президентэнть Владимир Владимирович Путинэнь истямо виев лезксэнзэ вельде карматано сэтьместэ явомо весе услугатнень, конатнень учить пельденек ломантне», – мерсь региононь руководителесь.

25 школань автобустнэ (ГАЗель ды ПАЗ маркань) пачтявить республикань 18 енкстнэс. Эрьва чистэ Мордовиясо усксевить 4800 седе ламо школасо тонавтницят. Од техниканть вельде пештевить школань улиця маршруттнэ, истя жо панжовить сисем одт. Прявтось – эйкакштне кармить ардтнеме сэтьмечинь весе вешематнень топавтозь.

Медицинань лезксэнь куроксто явомань 12 од автомобильтне  (ГАЗель ды УАЗ маркань) пачтявить Саранскойсэ медицинань лезксэнь куроксто явомань станциянтень ды республикань кото районтнэнь медучреждениятнес. Сынь редявикстэ кемекстасызь шумбрачинь ванстомань первичной звенань материально-технической юронть, лездыть медиктненень куроксто пачкодемс сэредицятнень видьс ды явомс эрявикс лезкс. «Шумбрачинь ванстомань первичной звенань специалисттнэ важодить чинь-вень перть. Техникась важодезэ парсте, служазо минек эрицятнень лезэс», – тешкстызе Артём Здунов.

Од техниканть пельде панжоматне максозь медучреждениятнень прявт врачтнэнень ды школатнень прявттнэнень. Медиктне ды педагогтне евтасть сюкпря од техниканть кисэ масторонь Президентэнтень ды республикань руководствантень. Церемониянть прядовомга Артём Здунов ваннынзе автобустнэнь ды микроавтобустнэнь. Тешкстызе неень шкань оборудованиянть, конась путозь автотранспортонтень.

Тешкстасынек, меельце вете иетнень перть республикав пачтязь школатнень, больницятнень ды поликлиникатнень туртов транспортонь малав 400 единицат. 

Мордовия Республикань Прявтонь пресс-службась