«Те кенярксчись сеть ломантнень, кить алтызь эсь эрямост правантень служамонтень. Сеттнень, кить лездыть вельмевтемс видечинть. Юристэнь тевесь аволь шожда – тынь важодтядо ломантнень, сынст вешемаст марто, те веши цидярдома, ломанекс улема», – мерсь Артём Здунов ды евтась сюкпря важодеманть кисэ юридической сферань специалисттнэнень ды ветерантнэнень.
Тешкстазель, республикасонть касы государственной ды муниципальной услугатнень доступностесь. Республикань юристтнэ эрязасто важодить эрицятненень социальной лезксэнь од тевтнень коряс, истя жо военнослужащейтнень ды сынст семиятнень туртов. Эрямос совавтозь мобилизованной эрицятнень туртов консультациянь мобильной пункттнэнь важодемань практикась, истя жо боецтнэнь анокстамонь таркатнесэ. «Малав 40% кевкстематне, конат сакшныть минек солдаттнэнь пельде, кандыть правовой смусть – цератненень эряви содамс: сынтемест кудосо карми весе вадря. Секскак тынк лезксэсь пек питней», – тешкстызе Мордовиянь Прявтось.
Тедеде покш важодема ютавтсь Минюстось ды республикань районтнэ Отяжбуень, Ицялонь ды Ковылкинань енкстнэнь судебной участкатнень туртов неень шкань помещениятнень кочкамонть коряс. Сы иентень МР-нь Правительствантень кармавтозь топавтомс истямо жо тев Краснослободскоень, Чаунзань, Рузаевкань енкстнэнь ды Саранскоень Октябрьской енксонть коряс.
Неень шкань отечественной технологиятнень тевс нолдамонть вельде федеральной сводной регистрантень совавтозь 125 тежадо ламо муниципальной правовой актт. Мордовиянь Прявтось тешкстызе, муниципальной правовой акттнэнь регистрась – те республикасонть васенце государственной информационной система, конантень Роспантентэсь макссь свидетельства государственной свидельстванть коряс – официальной документ, конань вансты интеллектуальной ули-парось.
Башка мель регионсонть явови юристэнь кадратнень анокстамонтень. Тень коряс важодить Мордовиянь госуниверситетэсь ды Россиянь Минюстонь вузонь филиалось. Текень марто регионсонть ули юридической кадратнень асатомась. Артём Здунов истя жо тешкстызе эрицятнень ютксо правовой содамочитнень кастомань эрявиксчинть. Мордовиянь Верховной Судось эрьва иестэ ютавты «Территория права» школасо тонавтницятнень ютксо сочинениятнень республикань пелькстамонть, весероссиянь правовой диктант.
«Ней обществантень эряви видечи. Сон максовозо эрицянтень государственной куш кона органсонть. Видечись – государствань кемечинь юр. Кеман, Мордовиянь юридической сообществань превейчись, ответственностесь кармить правопорядоконь прявт пельксэкс, республикань касомань-кепетемань юрокс», – мерсь Мордовиянь Прявтось.
Региононь юристтнэнень поздоровт истя жо евтась Мордовиянь Госсобраниянь Председателесь Владимир Чибиркин: «Тынк лангс путозь покш тев – кемекстамс ды одкстомтомс законодательной юронть ломантнень лезэс. Тень туртов эряви покш профессионализма ды содамочить».
Мордовиянь Юстициянь министрась Сергей Конычев евтась сюкпря республикань руководствантень правовой системань виевгавтоманть ды те енксонтень мелень явоманть кисэ. «Юристэнь эрямось алтазь апак сермадо закононтень: служамс правантень, содамс праванть, ванстомс праванть. Закононтень алкуксокс служамось, правовой норматнень содамось ды ответственностесь – енкстнэ, конат кандовить минек профессиянь ломантненень», – тешкстызе сон.
Те чистэнть Мордовиянь юридической сферань важодицятненень явшезь государственной покш наградат.
«Минек профессиональной кенярксчись – те государствань тевдеемасо юристтнэнь таликанть тешкстамось. Минь явтано лезкс аволь ансяк масторонтень, истя жо сонзэ эрьва эрицянтень, конась миненек пшкади», – мерсь «Кабельный завод «Цветлит» ООО-нь генеральной прявтонть правовой кевкстематнень коряс полавтыцясь Евгений Мокроусов, сон казезь Мордовия Республикань Почетонь грамотасо.
Мордовия Республикань Прявтонь пресс-службась