«Россиянь Почтась» – федеральной почтань покш оператортнэнь ютксо вейкесь, сови масторонь прявт предприятиятнень юткс. Ней Мордовиянь УФПС-сэ важодить 2 тежадо седе ламо ломанть, весе республиканть келес важодить почтань связень 308 отделеният. Пенсиятнень ды социальной пособиятнень пачтить 98 тежат пенсионертнэнень.
Анна Дудко евтнесь республикань руководителентень, 2023 иень кавксо ковтнень перть Мордовиясо «Россиянь Почтань» филиалось невтсь вадря динамика финансонь прибылень пелькссэнть. Тенень лездасть финансонь услугатнень, почтань ды посылкань бизнесэнь коряс доходтнэ. Те иенть ушодовомсто тевс нолдазь Ozon марто вейсэнь проектэсь – почтань сисем отделениятне явить услуга маркетплейстэ кармавтоматнень максоманть коряс. Иенть прядовомс проектэнтень арсеви вейсэндямс республикань почтань связень эште 27 отделениятнень.
Тешкстазель, компаниясь ды сотрудниктне эрязасто кирдить покш мероприятиятнень, конатне ютавтовить Мордовиясо. «Россиянь Почтась» примась участия «Минь вейсэ!» Раськень культуратнень весероссиянь од ломанень фестиваленть ды Финнэнь-угрань раськетнень весероссиянь II форумонть ютавтомасо. Мероприятиятнесэ важодсть посткроссингень пункттнэ – эрьвантень, кинь ульнесь мелезэ, меревсь тешкстамс открытка ды питневтеме кучомс сонзэ Россиянь келес.
Кортамонть шкасто башка мель явозель почтань связень отделениятнесэ эрицятнень вадрясто обслуживаниянь кевкстематненень. «Россиянь Почтась» прими участия Президентэнь программань топавтомасонть – иенть прядовомс витневить 11 велень почтань отделениятне.
Мордовия Республикань Прявтонь пресс-службась