Промкссонть кемекстазель «Знание» обществань региононь отделениянь наблюдательной советэсь ды кочказь сонзэ руководительтне - советэнть прявтсо Артём Здунов, сонзэ полавтыцякс кармась Мордовиянь госуниверситетэнь ректорось Дмитрий Глушко.
Мордовиянь Прявтось тешкстызе просветительской обществань важодемань эрявиксчинть, сонзэ прявт аудиториякс кармаст од ломантне. «Эйкакштнень тонавтомань-превс путомань, историянь алкуксчинь ванстомань, виде содамочитнень пурнамонь кевкстематне пек эрявить неень шкане», – тешкстызе Артём Здунов.
Ледстясынек, обществань региононь отделениясь панжозь 2021 иень эйзюрковсто, те шканть перть республикасонть ютавтозь ламо просветительской проектт, форумт, марафонт. Ютазь иень сундерьковсто педагогической университетэнть юрсо панжозь «Знание» обществань телестудиясь. Те иень таштамковсто региононь отделениянь филиалось кармась важодеме Мордовиянь государственной университетсэнть. Таштамковсто регионсонть ютавтовсь «Поделись своим знанием» Всероссиянь акциясь: Саранскойсэ ды Мордовиянь районтнэсэ ютавтозь 100 седе ламо лекцият – сынст кунсолыцякс кармасть 1,5 тежадо седе ламо ломанть.
Республикасонть теезь «Знание» обществань лектортнэнь промксось. Тов совасть эрьва кодамо областень эксперттнэ - ученойть, государственной ды общественной деятельть, культурань ды спортонь представительть, предпринимательть. «Знание» обществань линиянть коряс республикав свалшкане сакшныть содавикс федеральной лекторт - наукань, искусствань, бизнесэнь деятельть.
Ней регионось аноксты ВДНХ-со «Россия» раськеютконь выставкасонть улемантень, образовательной программань генеральной партнерокс карми «Знание» Россиянь обществась. Зярыя читнень ютазь минек од ломантнень делегациясь карми улеме «Знание.Первые» федеральной просветительской марафонсонть, конась ушодови сундерьковонь 4-це чистэ, выставкань панжомань чистэнть.
Артём Здунов евтась сюкпря «Знание» обществантень патриотической тематикантень ды специальной военной операциянь кевкстематненень мелень явоманть кисэ. Тень вельде минек школасо тонавтницятнень ды студенттнэнь ули возможностест марямс ды неемс военнойтнень, волонтертнэнь, спортсментнэнь, путешественниктнень, журналисттнэнь, врачтнэнь, лия профессиянь ломантнень.
«Знание» Россиянь обществань генеральной прявтонь полавтыцясь Георгий Будный тешкстызе региононь отделениянь вадря важодеманть.
«Знание» Россиянь обществань Мордовиянь региононь отделениянь председателесь, М.Е. Евсевьевень лемсэ МГПУ-нь ректорось Марина Антонова евтнесь важодемань прявт енкстнэде, евтась сюкпря Мордовиянь Прявтонтень федеральной ды региононь проекттнэсэ улеманть кисэ.
Вейсэнь промкссонть истя жо кочказь «Знание» Россиянь обществань IV инекужонь делегаттнэ – те региононь отделениянь председателесь Марина Антонова ды региононь отделениянь советэнтень совицясь Наталья Долматова.
Мордовия Республикань Прявтонь пресс-службась