«Талина» компаниятнень группась топавтызе кудонь ракшатнень туртов коромтнень нолдамонь коряс васенце проектэнть 2018 иестэ. Кудонь ракшатнень туртов коське коромтнень теемань коряс производствань од площадкань строямось ушодовсь 2022 иень ацамковсто. Сонзэ покшолмазо малав 13 тежат кавонзазь метрат. Инвестпроектэнтень путовкстнэ кармасть 2 млрд целковойтнеде седе ламо – сон аравтозь импортонь полавтомантень ды Россиянь коромтнень производствань виевгавтомантень.
Заводонь технической нолдамось ютавтовсь те иень даволковсто ВДНХ-со Мордовия Республикань стендэнть вакссо. Дмитрий Патрушев сонсь ульнесь од производстванть нолдамсто.
Анок ярсамопельтнень васенце партиясь нолдазь 2024 иень 1-це кварталсто. Производствань пешксе вийтнес лисемадо мейле тесэ эрьва ие кармить нолдамо 50 тежат тоннат коське коромт. Предприятиясонть путозь неень шкань оборудования, управлениянь автоматизированной системась свалшкане ванны оборудованиянть. Тевс нолдавиця технологиясь лезды ванстомс анок ярсамопельтнесэ весе лезэв пелькстнэнь, витаминтнэнь ды аминокислотатнень. Од производствасонть теезь 113 важодемань таркат.
Республикасонть витеви кадратнень анокстамонь, отраслянтень од ломантнень тердемань, сынст тонавтомань тевесь. Тень туртов строязь ды ушодызе важодеманзо «Тонавтомань куншкакурось», конань юрсо топавтови «Кадры будущего» проектэсь. Ней тесэ тонавтнить аграрной техникумонь студенттнэ – ютыть производственной практика ды кадовить важодеме. Министрантень невтизь условиятнень, конатнесэ ютавтовить занятиятне. Дмитрий Патрушев кирдизе важодемань те енксонть.
Мордовия Республикань Прявтонь пресс-службась