Артём Здунов евтнесь, од ломанень театрань прявт труппась – Н. П. Огарёв лемсэ МГУ-нь Раськень культурань институтонь студенттнэ ды прядыцятне. Театранть пингстэ истя жо теезь театрань студия, косо мереви варчамс эсь прянть профессиональной сценанть лангсо. Театрань прявт тевесь – теемс условият од ломантнень шкинемань ушодкстнэнь топавтомаст туртов ды содавтомс сынст свалшкань духовно-нравственной питнейчитнень марто. Саранскойсэ од ломанень театрась – те од ломантнень туртов пурнавома тарка, тесэ аволь ансяк невтевить спектаклят ды концертт, истя жо ютавтовить мастер-класст, шкинемань лабораторият.
Таштамковсто ТНБ-сэ невтевсть «Худсовет 2023» Регионъютконь од ломанень театрань фестивалень участниктнень спектаклятне.
Ожоковсто невтезель ТНБ-нь Од ломанень театрань труппань репертуаронь васенце спектаклясь «Кафе добра» – эйкакштнень туртов музыкань комедиясь. Иенть прядовомс театрасонть учовить эште кавто премьерань спектаклят - «Приключение Домовёнка или кто съел пряники?» (эйкакштнень туртов од иень евксось) ды «Тайна дома Рейвенскрофт» спектаклясь-детективесь.
Игорь Комаров спектаклянь репетициясонть улемстэ, макссь покш питне од ломанень проектэнтень. «Те пек вадря тев, минь нейтяно, ков тусть Президентэнь фондонь ярмактне. Арсян, ламосо те невтевкс, кода сынст мереви нолдамс тевс од ломантнень ды од ломанень культуранть кирдеманть туртов. Тесэ улить школасо тонавтницят, студентт. Неяви профессиональной од исполнительтнень ды эйкакштнень пек вадря сюлмось. Арсян, мельспаросот эйкакштнеяк, сынст тетяст-авасткак», – мерсь полномочной представителесь.
Мордовия Республикань Прявтонь пресс-службась