Региононь Прявтось тешкстызе: «Кортатано республикасонть важодемань ресурстнэнь балансонть коряс. Тевтне пек полавтовсть – икеле бороцинек важодема таркатнень а сатоманть марто, ней – кадратнень а сатомаст марто. Кортатано, мезе моли алкуксонь секторсонть, кодат тевть эряви кемекстамс, кодат специалистт ды зяро анокстамс те стакачинть витемга».
Аволь салавачи: ней Мордовиясь, седе пек промышленной секторось, печти кадратнень а сатоманть. Специалистт а сатыть региононь малав эрьва предприятиясонть, башкатнесэ – тежа важодицят. Седе сеедьстэ эрявить квалифицированной важодицят: электромонтер, слесарь, токарь, фрезеровщик, сварщик, истя жо цифровой технилогиятнень марто важодемань ерокчи марто специалистт.
Тешкстазель, важодемань рынкастонть дисбалансось путы тешкс зарплатанть лангс – ютазь иентень касомась кармась 123% седе ламо. Ней Мордовиянь заводтнэсэ средней зарплатась 58 тежат целковойтнеде седе ламо, 12 предприятиятнесэ – 70 тежат целковойть.
Сеть енкстнэнь ютксо, конат стакалгавтыть тевтнень, тешкстазельть важодемань условиятне – региононь зярыя предприятиятнесэ сынь стакат. Эсь опыттэст ды практикатнеде, конат макссть вадря цетавкст, евтнесть республикань покш компаниятнень руководительтне.
«Рузхиммашсо» покш мель явови предприятиянть туртов кадратнень тонавтомантень ды одс тонавтомантень. Тевс нолдазь программа вахтовиктнень тиринь енксов тердемаст коряс.
«Минек производствась – те стака машиностроения, условиятне аволь шождат. Ансяк ломантне минек туртов васенце таркасот, минь бажатано теемс условият – те вадря зарплата, санаторно-курортной оймсема, соцпакет ды ламо мезе лия», – евтнесь «Рузхиммаш» АО-нь управляющей прявтось Валерий Ларин.
Иенть перть удалась вадрялгавтомс кадратнень марто тевтнень «Электровыпрямитель» ПАО-сонть. Тенень лездась зарплатань кепетемась, наставничествань лувонть одс ванномась, Н. П. Огарев лемсэ МГУ-нть ды СПО-нь учреждениятнень марто вейсэнь тевдеемась, «Ветяк ялга» акциянь ютавтомась.
Производственниктне тешкстызь республикань предприятиянь эрямонтень эйкакштнень совавтомань эрявиксчинть: школанть прядовомс од ломантне содаст региононь производственной площадкатнеде, чарькодест – тиринь республикасо улить кемевикст, покш зарплата марто важодемань таркат.
Кадратнень тонавтомасо ды одс тонавтомасо предприятиянь вадря опыттэнть евтнесь Саранскоень телевизионной заводонь руководителесь. Тешкстазель контракт техникумонть марто станочниктнень целевой тонавтомаст коряс – те лездась саемс важодеме 100 ламо специалистт, конатне ульнесть покш дефицитсэ.
Тень кувалма Огарев лемсэ МГУ-нь ректорось Дмитрий Глушко тешкстызе: кавто иетнень перть вузось панжсь тонавтомань 15 программат, тешкстазь целевой тонавтомань 4 тежадо седе ламо договорт. Компаниятне, конат путыть эсь ярмакост ломантнень тонавтомантень, путыть оборудования сыненст эрявиця лабораториятнес, пандыть стипендият – получить квалифицированной специалистт.
Мордовиянь Промышленностень, наукань ды од технологиятнень министрась Игорь Губайдуллин евтнесь стратегиядонть, конань аноксты ведомствась. Компетенциятнень региононь куншкакурось нолды тевс предприятиятнесэ важодемань одкстомтоманть коряс рекомендациятнень анокстамонть марто башка программа. Ваннови региононь промпредприятиятнень важодицятнень туртов эрямо таркань строямонь кевкстемась – мелень явома уш ули, истя жо омбо масторонь важодемань виень тердемась. Башка мель явови од ломантненень. «Z поколениянь представительтнень лия чарькодемаст ды питнейчист. Секскак кочказь эксперттнэ, карми башка программа те категориянть туртов профориентациянь коряс», – тешкстызе Игорь Губайдуллин.
Прявт енкстнэде вейкесь, конань тешкстызь сеске зярыя предприятиятнень руководительтне, – простой важодицятнень специальносттнень популяризациясь, трудонь ломанень таликанть кастомась. Зярыя предприятиятнень руководительтне, конат састь Мордовияв покш оштнестэ, тешкстызь: республиканть ды сонзэ прявт ошонть улить зярыя башка енксонзо мегаполистнэнь икеле, тедеде эряви евтнемс.
«Миненек эряви муемс ламо важодицят весе инвестпроекттнэнь топавтомаст туртов. Те од ломантне, минек земляктне, конат важодить вахтасо, – миненек эряви явовтомс сынст мелест, ды омбо масторонь эрицятне. Региононь Правительствантень кармавтан ветямс свалшкань ваннома те кевкстеманть коряс. Карматано бороцямо минек кадратнень кисэ», – мерсь Артём Здунов.
Мордовия Республикань Прявтонь пресс-службась