Тонавтнемань од иенть ушодомо «Высота» школань тонавтницятнень ды тонавтыцятнень марто састь Мордовиянь Прявтось Артём Здунов ды содавикс летчикенть церазо Александр Михайлович Девятаев.
«Течи покш чи – минь панжтано покш, од, валдо школа. Ули мелем: педагогонь коллективесь, конась тей сась, школасо тонавтницятне – церынькатне ды тейтерькатне, теевельть тесэ паро ежо, тесэ кемекставост койть-кирдат, тынь бажавольде кармамс седе вадрякс предметтнэнь коряс, яксевельде олимпиадатнес, муевельде од ялгат – бажавольде сехте вадрянтень, – пшкадсь тонавтыцятненень, школасо тонавтницятненень, тетятненень-аватненень региононь руководителесь кенярксчинь линейкасонть. – Минек туртов прявтось: эйкакштне касовольть алкуксонь ломанекс. Ды тенесэ башка талика саить самай тонавтыцятне».
Артём Здунов евтнесь, течи валске уш евтась поздоровт эсь тонавтыцятненень, конатнень пек вечксынзе. Сон тешкстызе: «Тынк тонавтыцятне свал кармить арсеме тынк ланга, кирдеме каштанчи тынк кувалма!»
Мордовиянь Прявтось истя жо тешкстызе, те школась строязь масторонь Президентэнть кармавтоманзо коряс. «Пазось максозо, тыненк свал мизолдоволь уцяскась, улевель бажамо содамочитнес, тынь нолдавольде тевс весе возможносттнень, конатнень максы тенк минек масторось. Сехте прявтось – касодо-тонавтнеде ды свал бажадо сехте вадрянтень, изнямотнес!»
Тонавтнемань куншкакурось кандтни гвардиянь старшей лейтенантонть, летчикенть-истребителенть, Советской Союзонь Героенть Михаил Петрович Девятаевень лементь. Кенярксчинь панжомань церемониясонть ульнесь сонзэ церазояк Александр Михайлович: «Мон марян, кода кенярдоволь бу ней тетям: сон истя вечкиль улемс школасо тонавтницятнень ютксо, ловсь тень эсь прявт тевтнень ютксто вейкекс. Тынь од история! Сон а эрси ледстнематневтеме, содамочитневтеме. Минь уш ушодынек школанть марто вейсэнь важодеманть, мон покш мель марто пачтян школань фондтнэс тетянь кувалма книгатнень. Кеман, вейсэ минь тейтяно Михаил Петрович Девятаевень ледстнемга уголнэ».
Церынькатне ды тейтерькатне, тетятне-аватне покш мель марто учость од школанть марто содавтоманть. Максозель баягинень васенце гайневтемась ды школась панжинзе эсь кенкшензэ тонавтницятнень, тонавтыцятнень ды инжетнень икеле.
Артём Здунов ваннызе школанть, вейке стенасонть артозь Михаил Девятаев. Начальной школань вейке нупальсэнть региононь руководителесь ульнесь 1«Д» классонь классной чассонть. Эйкакштне евтнесть тензэ од школадонть эсь мельдест, тонавтнеманть коряс арсемадост. Инжетне истя жо ульнесть школань неень шкань покш актовой залсонть, шахматасо ды настольной тенниссэ налксемань коряс таркасонть, неизь беспилотниктнень нолдамонь коряс мастер-классонть – те енксось ней пек эрявикс, ды натой варчизь эсь виест школань тирсэнть. Биологиянь кабинетсэнть эйкакштне невтизь республикань руководителентень медицинань васенце лезксэнь явомань коряс содамочист.
Эряви тешкстамс, седе мейле, Мордовиянь Прявтонть марто кортамсто, од школань тонавтницятнень тетяст-аваст евтасть арсема – ламолгавтомс Мордовиясо «Авангард» типенть коряс эйкакшонь патриотической лагерьтнень, военной начальной анокстамонь программатнень теемс тейтерькатнень туртовгак. Артём Здунов арсеманть кирдизе, тешкстызе, истят маштомачитне, кода строевой ды военной анокстамось, сэтьмечинь лувтне, васенце лезксэнь явомась – пек эрявить весень туртов.
«Васенцетнень движениянь» участниктне анокстасть интерактивной площадкат. Тесэ ульнесть весе сехте прявт ушодкстнэ - «Быть с Россией», «Быть человеком», «Быть вместе», «Быть в движении», «Быть Первым». Артём Здунов тешкстызе школасо тонавтницятнень марто важодемань енкстнэнь эрявиксчинть ды кирдинзе сынст. Тесэ истя жо ютавтовсь школань тетянь-авань комитетэнть марто вастовомась.
Ванноманть прядовомга Артём Здунов варштась столовоентень, косо васенце классо тонавтницятнень туртов анокстазель сынст школань эрямосо васенце завторкось.
Тедеде школасонть кармить тонавтнеме 820 эйкакшт – те 34 класст, сынст ютксо 7 – васенцеть. Важодеме кармить 77 тонавтыцят, вететне юткстост од специалистт (бакалавриат). Школасонть теезь тонавтнемань 90 кабинетт, актовой ды спортонь колмо залт, бассейна, стадион, хоккеень кортт, столовой 725 таркас, информационно-библиотечной куншкакуро – медиатекат, ловномань кавто залт ды библиотека. Дополнительной образованиянь блоксонть улить налксемань нупальть, краеведениянь музей, драматической искусствань коряс занятиятнень туртов кабинет, хореографиянь зал, артомань, робототехникань, скульптурань, опыттнэнь тевдеемань коряс занятиятнень туртов кабинетт, истя жо эрьва кодат лабораторият.
Тонавтнемань куншкакурось карми важодеме «пешксе чинь» школанть лувсо. Те аволь ансяк общей образования, истя жо дополнительной – спортонь секцият, эрьва кодат енкстнэнь коряс клубт, театрань ды киштемань студият.
«Высота» куншкакурось истя жо вейсэндяви «Профессионалитет» федеральной проектэнть лувсо «Сфера фарм» образовательно-производственной кластерэнтень. Те химико-биологической ды физико-математической класст, Профессиональной ерокчинь коряс весероссиянь чемпионатонтень тонавтницятнень анокстамонь юниоронь куншкакурось. Школась истя жо вейсэндяви «Развитие пешеходного туризма» региононь проектэнтень. Тонавтнемань неень шкань куншкакуронть теемс ютавтозь 1,9 млрд целковойтнеде седе ламо.
Мордовия Республикань Прявтонь пресс-службась