В. Путин: Кода тевтне, Артём Алексеевич? Мейстэ ушодтано?
А. Здунов: Мон бу евтневелинь повесткадонть.
Мельвановикс Владимир Владимирович, сюкпря возможностенть кисэ пачтямс, кода минь важодтяно Мордовиясо, кода эрятано.
Важодтяно федеральной вейсэнь повестканть лувсо. Те экономической потенциалонь, промышленностень кастомась. Нама, специальной военной операциянь повесткась – минек боецтнэнень, сынст семиятненень лездамось. Лездатано регионтнэнень, косо зярс ванстови ломантнень эрямост ды шумбрачист коряс тандавксось.
Сехте прявтось – ней явинек мель промышленностенть лангс, промышленной потенциалонь кастоманть лангс. Мон ардтнян предприятиятнева, ваннан, седе пек сеттнень, конат ладизь производстваст оборонно-промышленной потенциалонть туртов, производствань программат вейсэ анокстатано. Минек те шканть перть нилексть кассть пачтямотне госкорпорациятнес, редявикстэ кассь гособоронзаказось ды сеттнень пештемась, кие важоди тематиканть коряс, истя жо минек боецтнэнь туртов, – 100 процентт предприятиятне минек пештезь.
Ней мон истя жо евтнян седе, кода минь виттяно кадрань кевкстематнень.
Минек прявт отраслятне: стака машиностроениясь, химической машиностроениясь, вагоностроениясь, электротехникась, велень хозяйствась ды инновациянь од производствась – фармацевтикась.
Тынк лезксэнк вельде минь панжинек од биотехнологической предприятиянть. Ней карминек нолдамо субстанцият антибиотиктнень ды противовирусной препараттнэнь производстванть туртов. Пекстынек эште вейке инвестиционной тарканть.
Минек арсематнесэ теемс федеральной биотехнологической куншкакуро, секс мекс лекарстватнень анокстамонть пингстэ аволь весе анокставкстнэнь зярс мереви теемс Россиясо. Минек ули аравтлув, минь сонзэ кемекстынек Россиянь Федерациянь Минпромторгонть, Миннауканть марто, мон ульнинь Валерий Николаевич Фальковонь кедьсэ, ды «Приоритет-2030» ды «Передовые инженерные школы» программатнень минь карматано совавтомо тедеде. Те лезды топавтомс тенек масторонь лекарствань безопасностенть. 16 миллиардт минь нурька шкас путынек фармацевтикас. Те минек прявт енкстнэстэ вейкесь.
Тынк кармавтоманть коряс поладтано важодеме оптоволокнань производстванть коряс. Миненек эряви строямс омбоце завод, истя жо пекстамс инвестициянь те тарканть. Карматано каявомо колмо иень бюджетэнтень, штобу Минпромонь «Развитие электронной и радиоэлектронной промышленности» программанть коряс те минек топавтоволь.
Тейтяно экономической башка зона. Сон карми васенце республикасонть.
В. Путин: Сон уш теезь?
А. Здунов: Арась. Васенце республикасонть. Мон сестэ Тыненк пачтинь, минь ушодынек анокстамо тарканть, Советской Союзсо светотехнической сехте покш предприятиянь – «Светотехника» заводонь территориясь, эште 90-це иетнестэ сон максозель залогс ды миезель. Минь теинек порядок моданть марто, ды секскак «Система» АФК-нть марто – сон карми минек прявт инвесторокс, тейтяно экономической башка зона. Документтнэ анокстазь, [кучозь] Минэкономразвитияв. Арсян, те одкстомтсы промышленной потенциалонтькак. Истят тематне, кода радиоэлектроникась, радионавигационной оборудованиянть, радиолокациянть видьс – весе те карми нолдавомо.
Теде башка, заводтнэва, конат теевить од предприятиятнестэ. Минь ялгаксчисэ важодтяно ФМБА-нть, Вероника Игоревнань марто [Скворцова]. Ульнесь Тынк кармавтоманк верень службань одкстомтоманть коряс. Минь тейтяно федеральной куншкакуро, конасонть карматано важодеме плазмань производстванть коряс. Сон эряви сень туртов, штобу, васняяк, теемс лекарстват, научной важодевкст, диагностикань реагентт. Ды плазмань клинической таштавкстнэньгак редявикстэ ламолгавтомо иестэ иес. Те карми лездамо истя жо минек боецтнэнень, сеттненень, кие юты реабилитация, лецямо.
Мелень иесь минек ютась предпринимательствань тешксэнть ало. Минь кемень иес васенцеде ламолгавтынек бизнесэнть. Важодтяно инвестициянь климатонть коряс ды ультяно «Малое и среднее предпринимательство» программасонть, конань ветить Андрей Рэмович Белоусов, Минэкономразвитиясь.
Минь васенцетнень ютксо нолдынек тевс региононь инвестициянь стандартонть. Путтано тев: минек производствань вишка бизнессэнть важодест седе ламо ломанть, секс мекс промышленной тевтне пек покшт, седе шожда ули, бути важодемань специальность марто ломантне ютыть промышленной предприятиятнес, эжели, невтемакс, микшнемань, услугань сфератнестэ. Секскак тонавтано, минек весе профтехучилищатне важодить ней тень коряс.
Покш сюкпря, мелят каязь принуждениянь бюджетной мератне ды капвложениятнень лангс а мерематне, ды республикась сеске «лекстясь». Минь натой ванттано ней прявт капиталс инвестициятнень касоманть коряс, мезесь мелят ульнесь – кирдевезь, ды ней – 34 процентт минь тешкстатано ансяк иенть ушодовомсто.
Кундынек сеске 32 инвестициянь од проекттнэнь топавтомантень, вейсэнь питнесэ малав 100 миллиардт. Те башка важодемань таркат.
В. Путин: Региононь бюджетэнть мельга эряви ванномс.
А. Здунов: Тень туртов эряви кастомс налогтнень.
Сехте прявтось – покш зарплата марто важодемань таркатне лездыть тердемс специалистт, улезэ кадратнень само ды демографиянь тевтненьгак витьсынек, секс мекс минек туртов те кадови зярс покш стакачикс.
В. Путин: Истя.
А. Здунов: Явинек мель минек университетэнть промышленной предприятиятнень марто важодеманть лангс. Сынь ней лезэвстэ важодить пель сядодо ламо предприятиятнень марто ды истя жо пеледензэ ламос кастызь эсест аволь бюджетэнь фондонть.
Арсетяно, неень шкань экономикасонть а кода университетэнь виевгавтомавтомо.
Тейтяно интеллектуальной азроксчинь коряс региононь омбоце куншкакуро. Валентина Ивановна Матвиенко вети те кевкстеманть.
Карматано важодеме товаронь тешкстнэнь лангс экспертизань профессиональной яволявтоматнень коряс.
Меельце шкастонть, меельце иестэнть минь редявикстэ ламолгавтынек патенттнэнь, пеледест ламос.
Мельвановикс Владимир Владимирович, ней ламо кортыть важодемань кедьтнень а сатомадост, секс мекс теевить од проектт, мон содан, коллегатнень-губернатортнэнь марто кортан. Минек ули проект, конась, арсетяно, лезды сы шкастонть. Минек фармацевттнэ – покш предприятиятне, эйдень кужотнестэ саезь, теить лабораторият, косо эйкакштне тонавтнить профессиятнень: од биолог, од химик, лаборант. Сынь анокстыть кармамс специалистэкс. Школань, студентэнь профессиональной экскурсият ютавтано предприятиятнесэ. Весе те лездась тенек мелят совамс васенце колмо регионтнэнь юткс образованиянь уровнянть коряс.
Стратегической инициативатнень агентствась пачтясь Тенк эрямонь вадрячинь индексэнть ды рейтингенть коряс – минь васенцеть колмо регионтнэнь ютксо, сехте прявтось, омбоцеть ероков ломантнень редямонть, сынст марто важодеманть коряс ды колмоцеть весероссиянь ды раськеютконь олимпиадатнесэ улемань лезэвчинть коряс.
Кадратнень коряс эште евтан, пек вадря «Профессионалитет» Минпросвещениянь программась, конась лезды тенек кочкамс ломанть, анокстамс сынст профтехучилищатнесэ ды кучомс минек предприятиятнес. Те иестэнть саезь тевензэ топавты важодиця од ломанень советэсь. Од ломантнень, конат бажить важодемс, кастомс-кепетемс масторонть, минь кирдтяно. Сехте прявтось, сынст кирди Президентэнь гранттнэнь фондось. Советэсь истя жо максы эсензэ цетавкст.
Пек нурькинестэ евтнян седе, кода минь важодтяно сеттнень марто, кие канды чумочинзэ специальной учреждениятнесэ. Минек, Мордовиясо, пек ламо истят учрежденият.
В. Путин: Ды оляс лисемадо мейле важодемань таркатнень муемаськак – истя жо сехте покш лия регионтнэнь коряс.
А. Здунов: Истя, минь невтяно опыт ды бажатано ней ФСИН-нть марто те опытэнть ламолгавтомс. Стратегической ушодкстнэнь агентствась истя жо лезды тенек. Икелепелев важодемань таркатнень максыцясь ванны специалисттнэнь, конатнень мейле карми терьдеме, вети сынст туртов экзамент ды уш экзаменсэ терьди важодеме. Ломанесь лиси уш тонавтнезь, ды сэтьместэ полады эрямо. Аватнень туртовгак те истя жо эрявикс – тосо ули стамонь производства, строямонь важодема. Минь арсетяно, весемесь лиси: важодемань таркатнень муемась кассь 3 проценттстэ 42-с.
Велень хозяйстванть коряс истя жо касстано невтевкстнэнь. Мелят – 113 процентт касомась, тедеде учотано касома. Покш сюкпря удобрениятнень лангс питнетнень кирдеманть кисэ, те лездась тенек вадрясто прядомс агротехнической шканть, каямс эрявикс удобрениятнень, вадрясто тень топавтомс. Минь лездатано сеть регионтнэнень, косо зярс стака ветямс велень хозяйства зярыя тувталтнэнь коряс, ды минек экспортонь 80 проценттнэ – велень хозяйствань продукциясь, масторонь ярсамопелень сэтьмечинтенть эсь таликанть путтано.
Ульнесь Тынк кармавтоманк важодемс органической сокамонть-видеманть коряс – васенце вете регионтнэнь юткс соватано. Кармавтоманть топавтано.
В. Путин: Те питней важодемась.
А. Здунов: Ансяк сон пек эрявикс исламонь мастортнэсэ, секс мекс органической сокамонь-видемань ды сывелень продукциясь пек малавикс халялень продукциянтень. Секскак миематне минек ламолгадыть.
Тынк кармавтоманк коряс тедеде минь кундатано кадовкстнэнь-ертовкстнэнь переработкань коряс межмуниципальной комбинатонь строямонтень. Те карми домка переработка. Тосо карми ансяк «пулотнень» утилизациясь. Весе меельцесь, RDF-уштомапеленть видьс, карми минек теевеме. Карматано каямо яволявтома те программантень сы иестэяк, важодеме истя лемдевиця региононь операторонь пиже облигациятнень марто. Секскак мон арсян, сеть тевтне, конатнень кемекстынзе Правительствась, пек шкастост.
Тынь путыде тев – 2030 иентень весе ютаст кадовкстнэнь-ертовкстнэнь переработкань ды утилизациянь неень шкань лувонтень. Минь тень тейсынек те программанть вельде 2026 иентень. Модельной программа Мордовиясо карми.
Мельвановикс Владимир Владимирович, кавто иетнень перть Тынк лезксэнк вельде финанстнэнь коряс теезь порядок: 18-ксть киртинек долктнень бизнесэнть икеле, ветексть минек киртязь коммерческой кредиттнэнь пельксэсь ды, нама, колмоце пельксэс – госдолгось.
Важодеманть поладтано, секс мекс тень эйстэ ашти эрямонь вадрячись, зарплататне, республикань касомась-кепетемась. Эште весть евтаса: республикась теде мейле «лекстясь».
Демографиянть коряс – содан, минек покш кевкстемат ней чачтоманть коряскак. Минь васенцетнень ютксо совинек проектэнтень Иневанькс патриархонть баславамонзо коряс, кирдтяно ней пешксесэ аватнень ды сынст семиятнень, ушодтано абортто икеле консультациятнестэ. Прявтось – врачтнень тонавтано: кода вастомс пешксесэтнень, кода мартост важодемс. Минек улить васенце цетаксонок: мелят минь киртинек аборттнэнь 42 проценттс, секс мекс те тевенть миненек эряви витемс, апак вано весе неть «латктнень лангс», те весе чарькодевикс, ансяк ваномс эряви вандынь чинтень.
В. Путин: Стакачить кодат нейтядо течинь чинтень?
А. Здунов: Мон арсян, прявт стакачись – финанстнэсэ. Бюджетэсь улезэ свалшкань, секс мекс зярс минь кадовтано дотационной [регионокс]. Тень коряс миненек эряви улемс суверенноекс. Тень туртов эште эряви ютамс башка ки – кастомс эсь доходтнэнь. Секскак ней весе прявт енкстнэ – экономикань виевгавтомантень.
Демографиясь стака. Чачозетнень туртов, пешксесэ аватнень туртов – сынст туртов эряви теемс ней условият, ломантне кадовольть ды ломантне иляст туе. Те иенть ушодовомась уш невтсь касома. Секскак карматано бажамо кирдемс самай неть цетавкстнэнь.
Промышленной производстванть коряс, нама, штобу инвестициятне молест промышленной производствань индексэнь касоманть марто.
В. Путин: Мезе жилищно-коммунальной хозйстванть коряс?
А. Здунов: Прявтось – сеттне. Секс мекс сеттне таштомсть.
В. Путин: Ушонь канализациятне?
А. Здунов: Ушонь канализациятне. Ней покш мель марто ванносынек проектэнть: совамс тенек концессиянтень эли бажамс эстенек теемс организация. Секс мекс тень эйстэ кармить аштеме тарифтне, эрицятнень ютавкстнэ. Секскак тень коряс, апак вано сень лангс, што минь путынек ярмакт минек социально-экономической виевгавтомань программанть коряс, важодемадонть тосо ламо. Те прявт важодеманть эйстэ вейкесь.
В. Путин: Паро.