Васняяк минек республикань представительтне теевсть содавиксэкс первичной звенань важодеманть марто – те семиянь доктортнэнь офистнэ, конат важодить миненек тонадовозь ФАП-тнень лувсо. Те уровнястонть ушодовить эрьва кодат орматнень виевгавтомань тандавкстнэнь редямонь коряс пациенттнэнь ванноматне.
Мордовиянь Прявтось эсь телеграм-каналсонзо тешкстызе: «Опытэсь, нама, виев ды веши мелень явома – кода аволь покш ресурстнэнь вельде ванстомс ломантнень эрямост, натой бюджетэнь аволь покш путовкстнэнь вельде; кода видестэ ладямс пек зыянов орматнень профилактикань ды лецямонь кевкстематнень».
Теде башка, Мордовиянь делегациянь представительтне тонавтнизь региононь перинатальной куншкакуронь ды узкопрофильной специалисттнэнь марто поликлиникатнень важодемаст.
РАН-нь членэнть-корреспондентэнть Олег Аполихин марто вейсэ теевсть содавиксэкс высшей звенань учреждениятнесэ лецямодо мейле пациенттнэнь ветямонь системанть марто.
Ледстясынек, эрицятнень шумбрачист ванстомань ды покш диагностикань шкастонзо ютавтомань кевкстемась Мордовиянть туртов пек эрявикс, сонензэ явови покш мель. Те иестэнть саезь васенцеде региононь 23 медорганизациятнень виест вельде ютавтови репродуктивной шумбрачинь ванномань коряс эрицятнень диспансеризациясь.
Теде башка, те чистэнть ютавтовсь университетэнь представительтнень марто вастовомась, конань лувсо тешкстазь касомань-кепетемань вейсэнь енкстнэ, истя жо Н.П. Огарев лемсэ МГУ-нть марто вейсэнь тевдееманть лувсо.
Артём Здунов тешкстызе: ваннозь весе кевкстематне совавтовить Мордовиянть ды Матансас Провинциянть ютксо вейсладямонть юрс.
Мордовия Республикань Прявтонь пресс-службась