Кочкамось ушодовсь чадыковсто, а сонзэ суперфиналось юты 2024 иестэ. Те сезонстонть пелькстамонтень пачтязь малав 159 тежат яволявтомат Россиянь весе регионтнэстэ ды 89 мастортнэстэ. Мордовиянть пельде тешкстазельть 500 седе ламо ломанть, региононь пельксэнтень, конась прядовсь таштамковсто, пачкодсть 10.
«Пелькстамось – те васняяк возможность теевемс содавиксэкс, муемс од сюлмот, эсь прянть варчамс, варштамс – мезе лангсо эште важодемс, штобу вадрялгавтомс эсь ерокчитнень. Те лия енов а молиця проект, – мерсь Артём Здунов вастовоманть лувсо. – Тынь кочкиде республиканть туртов пек эрявикс тев – симулятор, конась лезды ломанентень, конась а ашти государственной эли муниципальной службасонть, целанек совамс системантень ды невтемс эсь прянть».
Мордовиянь Прявтось тешкстызе «Моя Мордовия» экспертэнь клубонь важодеманть – кода вадря институтонть, конась лезды витемс тевтнень, конат аволь свал неявить эрьва чинь эрямосонть.
«Республикасонть кадратне а сатыть, седе пек предприятиятнесэ. Минь аштетяно покш бороцямосо лия регионтнэнь марто те енкссонть», – тешкстызе Артём Здунов.
Вастовомань участниктне невтизь региононь руководителентень государственной гражданской ды муниципальной службас кандидаттнэнь кочкамонть туртов «симуляторонть» – кандидатось юты сы шкань должностентень малавикс варчамот. Неть варчамотнень цетавкстнэнь ванномась невти, кода те эли лия ломанесь лади вакансиянть туртов.
«Соискательтне домкалгавтсызь содамочист ды чарькодьсызь эсест туртов максозь условиятнесэ важодеме анокчинть», – евтнесь «Лидеры России» пелькстамонь региононь пельксэнь участникесь Юлия Елисеева.
«Мероприятиятне, конат совавтозь «симуляторонтень», лездыть витемс стакачитнень, конат аштить республикань госслужбанть икеле, кастомс сонзэ престижностенть, истя жо важодемань лезэвчинть», – мерсь «Моя Мордовия» экспертэнь клубонтень совицясь Ольга Агеева.
«Симуляторонь» тевс нолдамось пек эряви региононь кадрань стратегиянь анокстамонть лувсо, конань вейкине операторокс кочказь Н.П.Огарев лемсэ МГУ-сь.
«Те платформанть теемась – пек вадря мель. Минек университетэнтень мереви сонзэ саемс», – мерсь МР-нь Правительствань Председателесь Дмитрий Поздняков.
«Улезэ кочказь команда – те меленть-арсеманть пряудемезэ – ломантне, конат кармить важодеме «симуляторонть» лангсо. Вадря ули вейсэндямс те важодемантень искусственной интеллектэнть», – тешкстызе Артём Здунов.
Н. П. Огарёв лемсэ МГУ-нь ректорось Дмитрий Глушко тешкстызе, уш кочказь эскпертэнь группа, таштамковонть перть ули тешкстазь седе тов важодемань лувось.
Евтасынек, вете сезонтнэнь перть управленецтнэнь пелькстамосонть улемантень каязь миллиондо ламо яволявтомат весе Россиясто ды 150 мастортнэстэ. Покш должностес путозь 430 седе ламо участникть: сисем конкурсанттнэ аравтозь федеральной министратнень полавтыцякс ды федеральной ведомстватнень руководителекс, ниле участниктне кармасть масторонь субъекттнэнь прявтокс, кавксотне – оштнень прявтокс. Ниле сезонтнэнь перть топавтозь тежадо ламо социальной проектт.
Мордовия Республикань Прявтонь пресс-службась