Цетвергстэ, июнень 22-це чистэ, Мордовиясо улемстэ, Равчирень федеральной округсо Россиянь Президентэнь Полномочной представителесь Михаил Бабич якась Торбеевань районов, косо «Талина» ГК-нть юрсо ютавтовсь агропромышленной комплексэнь, ярсамопелень ды перерабатывающей промышленностень виевгавтомань кевкстематнень коряс промксось. Тосо ульнесть Мордовиянь Прявтонь тевтнень нурька шкас топавтыцясь Владимир Волков, Ингушетиянь Прявтось Юнус-Бек Евкуров, региононь Министерстватнень ды ведомстватнэнь, истя жо АПК-нь предприятиятнень прявттнэ.
Промксонть ушодомадонзо икеле инжетне ваннызь «МПК «Атяшевский» ООО-нь «Талина» торбеевань площадканть. Колбасань продукциянь нолдамонь коряс заводось панжозь 2015 иестэ педе пев витнемадонть мейле. Тесэ важодить цехть, конатнес путозь колбасань изделиянь нолдамонь коряс свалшкане важодиця линият, тосо анокстави сывелень фаршось, тееви анок продукциясь, тапаряви ды пачтяви складс.
Заводонть производствань виензэ — 160 тёжат тоннат колбасонь продукция иезэнзэ. Арсеви покшолгавтомс производствань вийтнень 220 тёжат тоннас иезэнзэ, истя жо од эйпаргонь строямось, косо ве шкане кармить ванстовомо 5 тёжат тоннат. 2017 иестэ арсеви 45% покшолгавтомс предприятиясонть сывелень ды колбасань продукциянь нолдамонть 2016 иенть коряс.
Промксонть панжомсто, полномочной представителесь тешкстызе, Мордовиясо предприятиятнень важодемань невтевкстнэ покшт — те властенть ды бизнесэнть вейсэнь лезэв важодемань вадря невтевкс, предпринимательтне тесэ аштить кеместэ.
«Апак вано экономикасо стакачитнень лангс Мордовиянь придпринимательтне аштить кеместэ. Течи мон домкасто кортынь весе прявттнэнь марто. Государстванть лезкстэме инвестортнэ ловить возможноекс эсест туртов теемс истят покш технологичной предприятият, седе сеедьстэ агропромышленной комплекссэ», - тешкстызе Михаил Бабич.
Мордовиянь Прявтонь тевтнень нурька шкас топавтыцясь Владимир Волков редизе, республикась аволь ансяк умок уш нолды эсензэ туртов эрявикс весе продуктатнень, истя жо 60% ламо продукциянть пачти республиканть томбалев.
«Эрязасто важодтяно омбо масторонь продовольствиянь рынкатнесэ эсенек тарканть келейгавтоманть коряс. Мордовиянь экономикасо важодиця эрьва ветеце эрицясь важоди велесэ эли сеть предприятиятнесэ, конатне сюлмавозь веленть марто. Меельце 5 иетнень перть отраслянтень путозь 40 млрд целковойть. Вейке эрицянть лангс нолдавить 506 литрат ловсо, 345 кг сывель ды 1760 алт. Те масторсонть вадря невтевкстнэде вейкесь. Республикасонть ярсамопелень корзинась сехте дешова. Прявтось, питнетнень касомась кирдеви ярсамопелень ярмункатнень (оймсемачинь ярмункатнень) вельде. Тесэ микшневи фермертнэнь ды вишка предприятиятнень продукцияст», - тешкстызе Владимир Волков.
«Истя жо минь путтано прявт тев лисемс веёндонь рынкатнес. Весемезэ 5 иетнень перть 2,5-с покшолгавтынек экономикань высокотехнологической отраслянь продукциянь экспортонть — светотехникань, оптоэлектроникань, истя жо велень хозяйствань, - мерсь МР-нь Прявтонь тевтнень нурька шкас топавтыцясь. - 5 иетнень перть велень хозяйствань производствань касомась кармась 120%. Отраслянь важодицятнень зарплатаст кассь кавксть ды среднейсь кармась 21 400 целковойть».
Мордовиянь Прявтонь тевтнень нурька шкас топавтыцясь истя жо тешкстынзе талновтыця кевкстематненьгак, ютксост инвестициянь кредитованиясь, веленть туртов кадратнень анокстамось, велень хозяйстванть туртов модатнень ванстомась.
Промкссонть лувсо Равчирень федеральной округсо Россиянь Президентэнь Полномочной представителесь Михаил Бабич башка мель явсь велень хозяйствань отраслянтень лезксэнь явомань од механизмань, конань лемдить «вейкине субсидиякс», тевс нолдамонь лезэвчинь кевкстемантень.
«ПФО-нь регионтнэнь АПК-нь виевгавтомань кевкстематненень алтазь промкссонть, конась ветявсь ютазь иень февральстэ Чебоксары ошсо, Россиянь Минсельхозонтень кармавтозель вейсэндямс федеральной субсидиятнень. Те меленть кирдизе Министерствась. Регионтнэнень максозь олячи велень хозяйствань виевгавтомантень лезксэнь явомасо сехте эрявикс ёнкстнэнь редямосо. Текень марто, кассь регионтнэнь ответственностест результаттнэнь ды максозь ресурстнэнь лезэвстэ ютавтомаст коряс», - тешкстызе полпредэсь.
Промкссонь итогтнэнь ёвтамсто, Михаил Бабич тешкстызе: «Велень хозяйствань производительтнень стакачист сюлмавозь сень марто, процентэнь ставканть компенсациянть туртов субсидиянь покшолматне а сатыть. Ставкатне ней покшт — 12-14% ды, сеедьстэ велень хозяйствань бизнесэнть, а сатыть виензэ пандомс сонзэ. Улить кевкстемат сень коряс, вишкалгавтозь регионтнэнь таликаст субсидированиянть явшемстэ. Ней минь ютавтано истямо важодема Россиянь Минпромторгонть, Минсельхозонть ды Минэкономиканть марто течи республикасонть ёвтазь мельтнень-арсематнень седе домкасто ванкшномга».
СМИ-нь представительтнень марто кортамсто, Михаил Бабич ёвтнесь журналисттнэнень Мордовиясо кавто чинь улемань результаттнэде. «Васенце чистэнть минь максынек питне футболонь коряс масторлангонь чемпионатонтень стявтовиця объекттнэнь анокчист туртов. Аэропортонь комплекссэнть коряс арасть кавтолдомат, ёроковсто моли стадиононь строямось. Кеман, Мордовиясь вадрясто аноксты ды ютавтсы масторлангонь чемпионатонть, - толковизе сон. - Бути кортамс агропромышленной комплексэнь коряс течинь важодемадонть, тешкстаса, минь умок бажинек максомс питне республикань АПК-нь виевгавтомантень целанек. Неинек редявикс тевть. Предприятиятне, конатнень ваннынек, одт, строязь меельце 4-5 иетнестэ. Мордовиянь властне эрязасто ды лезэвстэ важодить бизнесэнть марто ды те пек вадря невтевкс лия регионтнэнь туртов».