Мелят райононь социально-экономической виевгавтомадонть ды сыця иентень тевтнеде эсь пачтямосонзо евтнесь Чаунзань енксонь прявтось Руслан Батеряков. Топавтови свалшкань важодема эсь доходтнэнь покшолгавтомань, ули-паронь ды модань кевкстематнень витемань коряс. Районось саи колмоце тарка вейке эрицянть лангс налогонь ды аволь налогонь доходтнэнь пачтямонть коряс. Чаунзань енксось саи омбоце тарка республикань муниципальной образованиятнень ютксо велень хозяйствань ды перерабатывающей промышленностень миезь валовой продукциянть коряс. Руслан Батеряков евтась сюкпря передовиктненень - «Мордовцемент», «Мечта», «Магма», «Комбис» ды лия предприятиятненень.
Аграрийтне ютазь иенть прядызь сехте покш невтевкстнэнь марто: вейсэнь валовой прибылесь кармась 175 тежат тоннат, урожайностесь – 52,4 центнерт гектарстонть. Валовой муниципальной продуктонь покшолматнень касомась – 106,4%. Весе те переработчиктнень ероков инвестиционной тевдееманть вельде.
Районсонть лезэвстэ топавтовить нацпроекттнэ ды госпрограмматне. Каладозь кудотнестэ одс ютавтозь 138 ломанть (78 квартират). «Безопасные и качественные автодороги» проектэнть ды лия программатнень коряс 2023 иестэ районсонть строязь китнень 12,7 вайгельбеть (те 414 млн целковойть). Руслан Батеряков евтась сюкпря региононь руководствантень Комсомольской поселкасонть Республиканской куронть педе-пев витнемасо лездамонть кисэ: «Ломантне кенярдыть, евтыть покш сюкпря».
«Формирование комфортной городской среды» программанть коряс топавтозь парконь вадрялгавтомань-мазылгавтомань омбоце пельксэсь (23 млн целковойтнес), «Комплексное развитие сельских территорий» программанть коряс – теезь эйкакшонь площадкат. «Образование» нацпроектэнть вельде панжозь кавто «Касомань точкат».
Чаунзань енксонь прявтось тешкстызе: райононтень пек лезды бизнесэсь, промышленной ды перерабатывающей предприятиятне, истя жо социальной кевкстематнень витемасо. «Мордовцементэнть» марто колмо енксонь вейсладямонть лувсо 2023 иестэ явозь 16 млн целковойть райононь социальной инфраструктуранть лангс: витнезь дошкольной ды общеобразовательной учреждениятне, рамазь мебель ды оборудования техникумонть туртов – сон вейкине масторсонть вети предприятиятнень-цементниктнень туртов кадратнень анокстамонть. Руслан Батеряков пшкадсь Мордовиянь Прявтонтень лезкс мельга: эряви педе-пев витнемс зданиянть – те 120 млн целковойть. Промышленной предприятиятне истя жо вейсэндявить те проектэнтень софинансированиянть лувсо.
Эште вейке энялдомась токшесь кинотеатрань зданиянть – сон ашти чаво. Мелят райононь прявт предприятиянть вельде топавтозь витнемань тевть. Текень марто, улить арсемат целанек одкстомтоманть ды од ломанень куншкакуронь тееманть коряс. Те ушодксонть эрязасто кирдить райононь од ломантне, уш ушодсть грантонь получамс яволявтомань сермадомо.
Райононть улить важодевксэнзэ шумбрачинь ванстомань енксонть коряскак – путозь неень шкань оборудования поликлиникасонть одс панжозь центральной нервной системань колавкстнэнь марто пациенттнэнь туртов медреабилитациянь отделениянтень, райононтень максозь медицинань лезксэнь куроксто явомань автомобиль. Бизнесэнь ярмактнень лангс витнезь ФАПось Медаево велесэнть. Райононь прявтось тешкстызе: те кепети эрицятнень ежост.
Мелят райононтень явозь лезкс Комсомольской поселкань весемеендонь виевгавтомантень-вадрялгавтомантень. Финансированиянь вейсэнь покшолмась карми 1,6 млрд целковойтнеде седе ламо. Проектэнть лувсо арсеви строямс ламо функциянь социально-спортивной куншкакуро, витнемс «Цементник» ДК-нть, строямс ванськавтомань сооружения ды водопровод марто канализациянь коллектор. Топавтомантень кундыть уш тедеде. Истя жо тедеде Чаунза посёлкань 400 иетненень арсеви вадрялгавтомс-мазылгавтомс парконть.
«Артём Алексеевич, районось эскели ды весемесь минек лиси ансяк тынк лезксэнк вельде. Минек прявт тевесь – теемс условият: ломантне муевельть эсь пряст, кадовольть эрямо ды важодеме тиринь енкссо», – мерсь Руслан Батеряков. Сон истя жо евтась сюкпря райононь эрицятненень ды предприятиятненень СВО-нь участниктненень лездамонть кисэ.
Ютазь иестэ топавтозь важодемадонть ды сыця шкантень арсематнеде евтнесь «Хорошее дело» ды «Магма» компаниятнень группань прявттнэнь советэнь председателесь Сергей Сиушов. Компаниятнень группась ней саи кавксоце тарка масторсонть саразонь сывелень производстванть коряс, чинь-вень перть теевить 100 тоннат колбасань изделият. Мелят ловсонь производствань коряс невтевксэсь кармась 300 тоннат чинь-вень перть. Маласо шкантень путозь тев: 400 тоннат – сонзэ арсеви топавтомс «Мечта» ловсонь од заводонть панжоманзо вельде. Сон сови масторсонть вете сехте покштнень юткс, теевить 400 важодемань од таркат. Тесэ истя жо кармить тееме мороженой, топо, сырат. Топавтовить инвестпроекттнэ элеваторонь комплексэнь ды комбикормонь коряс од линиянь строямонть коряс, инвестициятнень вейсэнь покшолмась – малав 2 млрд целковойть. Тедеде васенцеде компаниясь топавтынзе сюронь ды коромонь коряс эсь вешематнень.
Чаунзань енксонь общественной эрямосонть од ломантнень таликадост евтнесь Райононь эйкакшонь шкинемань куншкакуронь дополнительной образованиянь педагогось, Республикань од ломанень куншкакуронь специалистэсь Ольга Петякина.
Республикань Прявтось Артём Здунов явовтынзе сессиянтень пурнавозетнень мелест Чаунзань райононь виевгавтомань прявт енкстнэнь лангс. Васняяк те эсь доходтнэнь кастомась ды финансонь дисциплинань ладямось. Кенярдовтыця енксось – арась кредиторской долк МСП-нь субъекттнэнь икеле, истя жо муниципальной долконь вишкине уровнясь.
Текень марто, райононтень эряви явомс мель доходтнэнь пурнамонть лангс, кастомс ули-паронь объекттнэнь инвентаризациянь темпатнень, кемекстамс эрямонь пункттнэнь ды территориальной зонатнень границятнень. «Улезэ порядок весе регистратнесэ, те бюджетэнь доходтнэ. Потенциалось покш, районсонть поладови покш инвестпроекттнэнь топавтомась – сюкпря бизнесэнтень те тевдееманть, важодемань таркатнень тееманть кисэ», – мерсь Артём Здунов.
ЖКХ-нь одкстомтомань прявт енкстнэнь ютксо региононь руководителесь тешкстызе ТКО-нть марто седе тов важодеманть, каладозь кудотнестэ одс эрицятнень ютавтоманть ды МКД-нь витнеманть, Чаунза ды Комсомольской поселкатнень ведень пачтямонь ды водоотведениянь системань одкстомтоманть, эрямонь пункттнэнь ды кудотнень газификациянть ды догазификациянть.
Райононть туртов прявт енксокс кадови социальной инфраструктурань ды китнень хозяйствань одкстомтомась. Тесэ Мордовиянь Прявтось кармавтсь: целанек нежедемс кочкицятнень кармавтомаст лангс. Тедеде эряви витнемс кото объекттнэсэ китнень 21 вайгельбе. «Минек тевесь – кемекстамс видечинть. Мелят минь витнинек 13 объектт, карматано лездамо седе товгак», – тешкстызе Мордовиянь Прявтось.
Талновтыця объекттнэнь ютксо Артём Здунов тешкстызе Комсомольскойсэ поликлиниканть. Витнемань тевтне тесэ молить уш малав колмо иеть. Кармавтозь – прядомс тевтнень тедеде. Шумбрачинь ванстомань первичной звенань одкстомтоманть лувсо эряви ванномс колмо фельдшерско-акушерской пункттнэнь строямонь возможностенть – истямо кармавтома максозь МР-нь Минздравонтень.
Образованиянь объекттнэнь педе-пев витнемадост кортамсто, Артём Здунов тешкстызе – республикась карми каямо яволявтома башка кочкамонть лангс. Ней 2025-2026 иетнес арсематнесэ улить зярыя школат – бажатано шаштомс тевтнень топавтомань шкатнень, теемс весементь седе курок.
«Регион для молодых» грантонть лангс од ломанень куншкакуронь теемань коряс яволявтомадонть тешкстазель: республикантень омбоце ие явовить ярмакт Росмолодежинть пельде. Чаунзань енксонтень ули явозь лезкс, истя жо яволявтомань сермадомасо.
Артём Здунов евтась сюкпря райононь руководствантень, промышленниктненень ды общественностентень важодеманть кисэ: «Седе товгак эряви лезэвстэ важодемс вейсэ».
Вастовоманть прядовомга Мордовиянь Прявтось явшесь казнеть активисттнэнень СВО-нь участниктненень лездамонть кисэ.
Мордовия Республикань Прявтонь пресс-службась