«Мон сынь тыненк покш сюконямо марто! – мерсь республикань руководителесь. – Евтан сюкпря минек аватненень, бабатненень, нитненень – весе аватненень, кить трить-кастыть эйкакшт. Те ответственной эскелькс, секс мекс чачтомась – те ансяк ушодкс, сехте прявтось – путомс эйкакшонть виде кинть лангс, эрямосонть кеместэ марязо эсь прянть, содазо, кодат питнейчитне иневанькст минек обществанть туртов – весенень тенень тонавты, васняяк, авась. Тень вадрясто невтизе специальной военной операциясь. Тиринь масторось тердсь лездамс, ды минь нейтяно, сеть цератне, конатнень видестэ кастызь-тонавтызь, видестэ ветить эсь пряст».
Россиянь Федерациянь Президентэнть Владимир Путинэнь решениянзо коряс минек масторсо топавтовить национальной проектт ды «Десятилетие детства» весероссиянь программась, поладови школатнень ды эйдень кужотнень, поликлиникатнень ды больницятнень, ипотекань эрямонь таркатнень строямось, вадрялгавтовить парктне ды налксемань площадкатне.
Республикасонть тевс нолдазь эйкакш марто семиятненень социальной лездамонь 30 ламо енкстнэ. Улить пандомат «Демография» национальной проектэнть лувсо, явови государствань лезкс социальной контрактонть лувсо, аватнень ули возможностест питневтеме кепетемс квалификацияст ды тонавтнемс эрявиця специальносттнес.
Ней Мордовиясо малав 8 тежат ламо эйкакшонь семият, конатнесэ трявить-кастовить 26 тежат эйдеть.
«Вадря невтевкстнэде минек ламо, – мерсь Артём Здунов. – Тешкстаса, «Мать-героиня» лемесь максови Лямбирень енкссто Исайкина Ольга Петровнанень, сон чачсь-кассь 10 эйкакшт». Республикань Прявтось кирдизе арсеманть «Мать-героиня» званиясь ашти ве рядсо «Герой России» ды «Герой труда» званиятнень марто. Мордовиясо эште 23 ламо эйкакшонь аватненень мереви пелькстамс те награданть кисэ.
Артём Здунов макссь Мордовия Республикань ламо эйкакшонь авань I степенень диплом Ельникень енкссто Лидия Костинанень ды Отяжбуень енкссто Анна Максимованень.
Мордовия Республикань ламо эйкакшонь авань II степенень Почетонь дипломсо казезь Саранскойстэ Любовь Агапова ды Ирина Федина , истя жо Зубова Полянасто Надежда Лемясева.
16 ламо эйкакшонь аватненень максозь Мордовия Республикань ламо эйкакшонь авань III степенень Почетонь диплом.
Ицялонь енкссто Элина Курепина евтась сюкпря республикань Прявтонтень ламо эйкакшонь семиятненень лездамонть кисэ. «Минь мирдень марто од порасто туекшнынек Свердловской областев – вадря эрямонть мельга, кода яла кортыть. Ансяк куроксто велявтынек одов тиринь республикав ды зярдояк тень кувалма эзинек янксе, – мерсь сон. – Тесэ минь муинек вадря важодема, пурнынек покш ды кеме семия, муинек вадря ялгат, строинек минек семиянь пизэнть, республикань Правительстванть лезксэнзэ вельде пекстынек ипотекань кредитэнть, зярдо минек чачсь нилеце эйдесь. Ней минек вете эйкакшонок, минь явтано покш мель сынст кастомантень-тонавтомантень, истя жо патриотизмань лувсо – покш церанок тонавтни Пензань артиллерийской академиясонть, сон – невтема седе вишкинетнень туртов. Минь бажатано, эйкакштне касовольть минек масторонь алкуксонь эрицякс».
Ицялонь енкссто Валерий ды Елена Сидоровтнень кото эсест ды вете саезь эйкакшост, Артём Здунов макссь тенст «Семья года Республики Мордовия» пелькстамонь «Милосердие» номинациясонть изницянь диплом. Те Сидоровтнень аволь васенце изнямост – сынст уш улить ламо казнест. Тедеде, невтемакс, сынь изнясть «Успешная семья Приволжья» пелькстамонь «Моя опора - отчий дом» номинациясонть.
Республикань Кудонь залсонть, косо ютавтовсь каземань церемониясь, ульнесь башка ежо – лембень, паронь арсемань, мелень явомань. Ды чарькодевсь, мекс истя: эдь ламо эйкакшонь аватне – те вечкемань, цидярдомань, важодеме вечкемань, эрямонь превейчинь певтеме лисьмапря. Эсь лембест неть дивавтыця, мазыйть ды валдот аватне казсть весе ломантненень, конат ульнесть залсонть.
Артём Здунов явшесь ламо эйкакшонь аватненень казнеть, истя жо бытовой техникань рамамс сертификатт.
Уш каземадонть мейле, вейкест-вейкест ды журналисттнэнь марто кортамсто, аватне евтнесть эсь эрямодост.
«Ламо эйкакшонь семиясь – те васняяк часиянть кувалма, – видькстась Саранскойстэ вете эйкакштнень авась Екатерина Кербицкая. – Монсь зярдояк эзинь арсе: карман ламо эйкакшонь авакс, те сонсь лиссь. Эйкакшпорасто касынь двоюродной лелян-сазорон марто – эйстэст монь ламо, миненек свал ульнесь весела, ялгаксчинь сюлмотне кемельть, весе эрямос кадовсь кирдемань ды ванстомань ежось. Ней мирдень марто минек истя жо ламо эйкакшонок – ды минь эрьва ие седеяк пек марятано: минь карматано яла седе виевекс, минек кирдемась касы ды виензы. Евтан весенень: илядо пеле ламо эйкакштнеде. Кеман, аволь пандо удало се шкась, зярдо ламо эйкакшонь семиясь карми нормакс обществанть туртов!»
Екатерина Кербицкая мазыйканть лангс ванозь, стака кемезевемс: сонзэ уш вете эйкакшонзо, – пек одсто сон невти. Салавачись тесэ ули: семиясонть – кавто кавтаськеть! Пертьпельксэнь дивань тев! «Мон пек кенярдан: минек истя лиссь, – корты Екатерина. – Кеман, авантень а эряви одсто панемс карьеранть мельга. Весемесь кенери, весенень – эсензэ шка. Ней, 35 иесэ, мон евтаса: невти эсь прям авакс улемстэ ды профессиясо. Свал мереви путомс паузас эсь карьеранть 2-3 иетнес ды чачтомс эйкакшт. Сынтемест арась часия!»
Мордовия Республикань Прявтонь пресс-службась