Анатолий Николаевич – республиканть туртов ломанесь аволь од. Чачсь Краснослободскоень енксонь Ташто Синдрово велесэ, тонавтнесь врачокс, профессиональной тевдеемань ламот иетнень алтынзе Мордовиянтень: важодсь Атюрьевань енксонь прявтокс, ульнесь Мордовия Республикань клинической больницянь прявтокс, важодсь Мордовиянь Шумбрачинь ванстомань министракс. Мейле важодсь Россиянь Минздравсо, ульнесь Ярославской областень Правительствань Председателень полавтыцякс, Катастрофань медицинань федеральной куншкакуронь прявтонь васенце полавтыцякс. Анатолий Гулин – медицинань наукань кандидат.
Прявт федеральной инспекторонть икеле аштиця тевтнеде кортамсто, полпредэсь тешкстызе, васняяк кортамось моли РФ-нь Президентэнть Владимир Путинэнь кармавтоманзо топавтомадо.
«Анатолий Николаевич Гулинэнь важодемань покш опытэзэ, сон важодсь властень муниципальной, региональной ды федеральной органтнэсэ. Сон вадрясто содасынзе Мордовиясо молиця тевтнень – тесэ сон чачсь ды ушодызе тевдеемань кинть. Кеман, опытэсь ды профессионализмась лездыть тензэ шкастонзо ды вадрясто топавтомс путозь тевтнень. Васняяк, те исполнительной властень федеральной органтнэнь территориальной подразделениятнень важодемаст ладямось. Прявт федеральной инспекторонть лангс путозь РФ-нь Президентэнть Владимир Владимирович Путинэнь кармавтоманзо топавтоманть мельга ванномась лездазо региононь виевгавтомантень. Властень региононь органтнэнь марто вейсэ эряви топавтомс ламо тевть социальной, экономической ды общественно-политической енкстнэсэ, истя жо лездамс межнациональной ды межконфессиональной сэтьмечинь ванстомантень. Мордовия Республикась – те индустриально-аграрной регион, тесэ улить весе масторонть туртов редявикс компетенциятне. Истя жо пек прявт енкссонть - оборонной промышленностесэ. Секскак прявт тевтнень ютксо вейкесь – ОПК-нь предприятиятнень кирдемась, вооружениянь ды техникань пек эрявикс образецтнэнь нолдамонь коряс стакачитнень витемасо лездамось, истя жо кадратнесэ пештемась», – тешкстызе Игорь Комаров.
«Покш мель марто васстано тынк тиринь енкссо, – мерсь Мордовиянь Прявтось, Анатолий Гулиннэнь пшкадемстэ. – Те республикань вейсэнь политикась: ломантне велявтост Мордовияв – минек туртов те пек вадря гайневтема. Тынь тесэ эрявтадо, штобу кастомс-кепетемс экономиканть, общественной, социальной эрямонть. Важодемадонть ламо, сехте прявтось минек туртов ней – СВО-нть туртов тевтнень топавтомась, малавгавтомс изнямонть, лездамс минек цератненень, лездамс сынст семиятненень».
«Сюкпря явозь кемеманть кисэ, бажан сонзэ топавтомс, – мерсь Анатолий Гулин. – Путозь тевтнеде ламо. Кеман, республикань руководстванть, федеральной властень территориальной органтнэнь марто вейсэнь тевдееманть вельде минь сынст топавтсынек».
Игорь Комаров евтась сюкпря Михаил Сезгановнень Мордовиява прявт федеральной инспекторокс важодеманть кисэ, казизе сонзэ Равчирень федеральной округсо Россиянь Федерациянь Президентэнь полномочной представителень Почетонь грамотасо.
Мордовиянь Прявтось истя жо евтась сюкпря Михаил Сезгановнень ламо иень важодеманть кисэ ды арсесь тензэ седе тов изнявкст.
Мордовия Республикань Прявтонь пресс-службась