2022 иестэ «Магма ХД» предприятиянть юрсо панжозь видьметнень нолдамонь коряс од завод. Тевтне целанек автоматизированнойть, часонть перть тесэ анокстыть 12 тоннат видьмень материалт.
«Зярыя иетнень перть сюронь-тикшень кастомань енкссонть ульнесь эрявиксчи кастомс видьметнень вадрячист. Ансяк улиця оборудованиянть вельде те эзь тееве. Рамазь видьметне истя жо аволь целанек ладясть. Секскак кемекстазель решения строямс эсенек видьмень завод. Те лезды кастомс велень хозяйствань культуратнень урожайностенть», – евтнесь инжетненень видьмень заводонь проектэнь кураторось Артемий Сиушов.
Цехенть нолдамонзо марто, тов инвестициятне кармасть 175 млн целковойть, предприятиясь 100% аноксты видьмень фондонть эсь вийтнесэ. Видьметнень лисемась – 99%. Чинь-вень перть удалы явшемс малав 150 тоннат видьметь. Весе сынь сеске молить паксятнес, яровойтне кадовить сюронь ванстомань таркатнесэ.
Масторонь Минсельхозонь руководителенть прявтсо делегациясь истя жо ульнесь «Магма ХД» компаниянь вейке паксясонть. Тундонь-паксянь важодематне агрофирмань пелькстнэсэ ушодовсть чадыковонь 11-це чистэ, ней моли кснавонь ды яровой товзюронь видемась, поладови минеральной удобрениятнень почодомась. Эрьва чистэ паксятнесэ важодить сядот ломанть, тевс нолдазь велень хозяйствань техникань малав 100 единицат. Неень шкань технологиятне кастыть важодемань лезэвчинть ды киртить себестоимостенть. Эрязасто нолдави тевс транспортонь мониторингесь, те лезды куроксто пурнамс куля машинатнень шаштомадост ды топавтозь важодемань покшолматнеде.
Эряви тешкстамс, «Хорошее дело» агрогруппась соки-види паксят республикань кавксо енкстнэсэ ды Ульяновской областень Сурской енкссо. Кастозь весе культуратне молить холдингень ракшатнень туртов коромтнень анокстамонтень.
Мордовия Республикань Прявтонь пресс-службась