Вастовомантень пурнавозетне евтнесть эсь проекттнэде, Мордовиянь деловой вейсэндявксонь представительтне – седе, кодамо лезкс анокт явомс социальной эрявикс ушодкстнэнь топавтомсто.
Невтезь проекттнэнень покш питне макссь республикань Прявтось. Сынст ютксо - «Игротека» 2.0» эйкакштнень туртов столь экшсэ налксемань сессиясь, «РобоМастер» инженерэнь шкинемань фестивалесь, «КульТУРисты: интенсив для креаторов» ды «Мой район – Зеленка» социальной проекттнэ, «Адя Кудов» подкаст-шоусь.
Тедеде Росмолодежинь грантонь пелькстамонть коряс финансирования явозь Мордовиясто 58 проекттнэнень вейсэнь покшолмасо 24 миллионт целковойтнеде седе ламо. Меельце колмо иетнень перть ламолгадсть регионтнэнь пельде яволявтоматне, ды явозь ярмактнеяк. Президентэнь гранттнэнь фондось ды Культурань ушодкстнэнь Президентэнь фондось кирдизь Мордовиянь 15 НКО-тнень, явозь 70 млн целковойтнеде седе ламо од ломанень политикань коряс проекттнэнь топавтомс.
Артём Здунов тешкстызе: республикась карми лездамо од ломантнень ушодкстнэнень. Мордовиянь Прявтось кирдизе меленть теемс региононь грантонь фонд од ломанень социальной проекттнэнень лездамонть туртов.
Вастовомасонть ульнесть вице-премьерэсь Галина Лотванова, Госсобраниянь председателень полавтыцясь Наталья Долматова, МР-нь Од ломантнень тевест коряс Госкомитетэнь председателесь Анастасия Гришнева, Н. П. Огарёв лемсэ МГУ-нь ректорось Дмитрий Глушко, Саранскоень ды Мордовиянь митрополитэсь Зиновий, МР-нь Мусульмантнэнь духовной управлениянь муфтиесь Раиль Асаинов.
Мордовия Республикань Прявтонь пресс-службась