Совавтозь полавтомат «О республиканском бюджете Республики Мордовия на 2023 год и на плановый период 2024 и 2025 годов» Мордовия Республикань Закононтень. 2023 иентень доходтнэнь покшолмась ды бюджетэнь ютавкстнэнь пельксэсь покшолгавтозь 1 млрд 78 млн целковойтнес. Ярмактне улить пачтязь китнень витнемантень; республикань шумбрачинь ванстомань системань тевдеемань ладямонтень; эрицятнень транспортонь обслуживаниянтень; каладозь ды ташто кудотнестэ одс эрицятнень ютавтомантень ды лия тевтнес.
Депутаттнэ кирдизь законопроектэнть, конань совавтызе республикань прокурорось Сергей Лапин. Полавтоматнень коряс, ней республикань авань капиталонь ярмактнень мереви пачтямс товартнэнь ды услугатнень рамамс, конат аравтозь инвалид эйкакштнень социальной адаптациянть туртов. Теде башка, ярмактнень мереви ютавтомс Россиясо шумбрачинь ванстомань организациятнесэ эйкакшонть туртов платной медицинской услугатнень явомантень, истя жо эйкакштнень оймсемаст ды шумбрачист кемекстамост кисэ пандомантень.
Сессиясонть примазь «О внесении изменений в Закон Республики Мордовия «О бюджете Территориального фонда обязательного медицинского страхования Республики Мордовия на 2023 и на плановый период 2024 и 2025 годов» законось. Те иентень фондонь бюджетэнь доходтнэнь покшолмась а полавтови ды карми 11,539 млрд целковойть, ютавкстнэнь - 11,572 млрд целковойть. 2023 иестэ ОМС-нь территориальной программань финансированиянтень арсеви пачтямс 11,2 млрд целковойть, 2024 иестэ - 12 млрд целковойть, 2025 иестэ - 12,7 млрд целковойть.
Кемекстазь мельтне-арсематне 2024 иентень кочкицятнень кармавтомаст коряс. Тов совасть кевкстематне, конат сюлмавозь автомобилень китнень строямонть ды витнеманть, шумбрачинь ванстомань, образованиянь, культурань учреждениятнень витнеманть-петнеманть марто ды истя седе тов.
Ваннозь лия кевкстематкак.
Правительствань часонть лувсо Мордовия Республикава Потребительтнень праваст ванстомань ды ломанень благополучиянь енкссонть надзоронь коряс Федеральной службань Управлениянь руководителесь Татьяна Харитонова евтнесь депутаттнэнень 2023 иестэ ведомстванть тевдеемадонзо.