Депутаттнэ примасть закон, конань коряс келейгавтовить республикань авань капиталонь ярмактнень тевс нолдамонь енкстнэ. Ней неть ярмактнень мереви ютавтомс эсенек масторсо нолдазь автотранспортонь рамамс.
Сессиясонть истя жо примазь «Об установлении в Республике Мордовия Дня ветеранов боевых действий» законось. Ледстнемань чись карми тешкставомо регионсонть медьковонь 1-це чистэ.
Ванновсть лия кевкстематкак.
«Правительствань часонть» лувсо пачтямо марто пшкадсь МР-нь Экономикань, микшнемань ды предпринимательствань министрань тевтнень топавтыцясь Иван Горин. Сон евтнесь 2023 иень васенце кото ковтнестэ Мордовиянь социально-экономической виевгавтомадонть. Министрань тевтнень топавтыцясь тешкстызе, течинь чинтень прявт тевтнень ютксто вейкесь – зарплататнень кастомась. Сехте покш номинальной зарплатась течинь чинтень Рузаевкань енкссо (54 тежат целковойть), омбоце таркасонть – Лямбирень енксось (51 тежат целковойтнеде седе ламо), колмоце таркасонть – Чаунзань енксось (малав 50 тежат целковойть).
Тонавтнемань од иентень образованиянь организациятнень анокчидест евтнесь МР-нь Образованиянь министрась Елена Солдатова. 2023 иентень отраслянь вейсэнь бюджетэсь кассь 14 проценттс – ульнесть 11 млрд целковойть, кармасть – 13. Покш мель явови образованиянь организациятнесэ эйкакштнень улемаст туртов сэтьме условиятнень теемантень. Меельце колмо иетнень перть примазь башка тевть образованиянь объекттнэнь антитеррористической ванстомань виевгавтоманть коряс. Ансяк мелят неть тевтнес башка явозельть 46,4 млн целковойть, тедеде башка явозь 39,8 млн целковойть. Топавтозь школань усксематнень сэтьмечись – ней республикань автобусонь автопарконтень совавтозь 258 единицат, иенть прядовомс региононтень явовить эште 25 автобуст.