Неть читнестэ республикасо ютавтови од ломанень епархиальной отделтнэнь руководительтнень ды активенть туртов «Пересвет» регионъютконь форумось. Кода тешкстызе Артём Здунов, Семиянь иестэнть сонензэ максови башка смусть. Форумось истя жо алтазь Православной од ломанень масторлангонь чинтень, конась тешкстави даволковонь 15-це чистэ. «Московонь ды весе Русень Патриархонть Кириллэнь баславамонзо коряс Саранскойсэ уш 9 иеть важоди православной од ломантнень марто важодемань коряс Равчирень федеральной округонь Координационной куншкакурось, – мерсь республикань Прявтось. – Важоди Мордовиянь Православной од ломантнень вейсэндявксось – тедеде сонензэ топодсть 22 иеть».
Вейсэндявксонтень совить эрьва кодамо енксонь ламо клубт – волонтеронь ды вешнемань отрядт, «Доброделание» группась, кедьсэ бороцямонь клубось, мотоклубось, театрань студиятне.
Мелят тешкстазь вейсэнь тевдеемадо вейсладямот Мордовиянь митрополиянть ды республикань образованиянь министерстванть, культурань министерстванть ды Од ломантнень тевест коряс Госкомитетэнть ютксо – сынь аравтозь од ломантнень духовно-нравственной воспитаниянь коряс вийтнень вейсэндявомантень. «Тонавтомань организациятнесэ Рузонь православной церькованть улемась минек ладязь свалшкань лувсо», – тешкстызе Артём Здунов.
Вейсэнь покш тевесь – СВО-нь участниктнень ды сынст семиятнень кирдемась. Православной волонтертнэ – те важодеманть куншкасо: пурныть ды кучить СВО-в гуманитарной лезкс, лездыть боецтнэнь семиятненень.
Теде башка, Мордовиянь Прявтось евтнесь, республикасонть нолдазь тонавтомань программа православной теологиянь коряс предприятиятнень руководительтнень туртов, истя жо ладязь лезэнь кандыця вейсэнь тевдеема мусульманской религиозной организациятнень марто. Весе те лезды кемекстамс регионсонть межконфессиональной ладямонть.
Истринской епископось Серафим пачтясь Мордовиянь Прявтонтень шумбракстнемань ды паронь арсемань валт Московонь ды весе Русень Патриархонть Кириллэнь пельде. «Иневанькс Патриархось покш кеняркс марто баславимем монь самс тынк республикав. Эрзянь-мокшонь модась малавикс Патриархонтень, – тешкстызе Од ломантнень тевест коряс Синодальной отделэнь председателесь. – Мордовиянь православной од ломантнень вейсэндявксось – масторсонть сехте виевтнестэ вейкесь».
Истринской епископось евтась сюкпря Мордовиянь Прявтонтень Артём Здуновнень ды Саранскоень ды Мордовиянь митрополитэнтень Зиновийнень од ломантненень покш мелень явоманть кисэ. Сон тешкстызе: неень шкане обществасонть кемекставить духовной ды патриотической ушодкстнэ, ламо од ломанть якить церьковав. «СВО-сь ламонть полавтызе минек эрямосонть. Ней од ломантне одс ванныть эсь питнейчитнень, лиякс ваныть историянть, духовной ундокстнэнь, эсь вандынь чинть лангс», – мерсь Од ломантнень тевест коряс Синодальной отделэнь председателесь.
Вастовомасонть кортасть вейсэнь тевдеемань виевгавтомань коряс арсематнеде, истя жо демографиянь ды чачтоматнень кастомань прявт кевкстематнень коряс.
Мордовия Республикань Прявтонь пресс-службась