Минек проектэнь презентациянть невтизе МР-нь региононь сервисной уполномоченноесь Елена Семелева. Проектэсь ашти колмо пельксстэ. Васенцесь – эйдень кужосо 3-6 иесэ церынькатнень ды тейтерькатнень туртов налксемань модулесь, косо эйкакштне варчить эсь пряст улемс тетякс-авакс. Омбоце пельксэсь – од ломантнень марто гинекологонь кортамонь лувось. Колмоце пельксэсь – микшнемань куншкакуротнесэ «од ломантнень марто кортамонь таркатнень» теемась, косо эрьва тарго ютавтовить тематической мероприятият. Неть тевтне уш топавтовить республикасонть.
АСИ-нь акселераторонь важодемань невтевкстнэнь евтамосо ульнесь Мордовиянь Прявтось Артём Здунов. Сон тешкстызе, эрямонь эрьва кодат тевтнень пингстэ невтезь решениятне пек эрявить ломантнень туртов. «Ламо од мельстуиця арсематнень марто мон велявтан Мордовияв, штобу сынст нолдамс тевс республикасонть, – мерсь сон. – Монень пек мельстусь онкологиясо сэредицятненень лездамонь коряс тиринь Дагестанонь проектэсь. Эрямонь те тевесь пек стака. Ней медицинась эскельдясь икелев, ормась лецяви. Ансяк эряви шкастонзо улемс ломаненть вакссо, сон вадрясто содазо, ков пшкадемс. Прявтось – ломанесь илязо кадово ськамонзо. Мельспаро, Мордовиянь проектэсь саизе колмоце тарканть, карматано важодеме седе тов, тень эйстэ изнить весе».
АСИ-нь акселераторонть важодемасонзо ульнесь «Защитники Отечества» Государственной фондонь руководителесь Анна Цивилева. Мордовиянь Прявтось Артём Здунов евтась тензэ сюкпря лезксэнть кисэ, конань фондось яви СВО-нь участниктненень ды сынст семиятненень.
Мордовия Республикань Прявтонь пресс-службась