Цетвергстэ, апрелень 13-це чистэ, Мордовиянь Прявтонь тевтнень нурька шкас топавтыцясь В.Д.Волков ютавтсь пресс-конференция Россиянь Президентэнть В.В.Путинэнь марто вастовоманть коряс, конась икеле чистэнть ульнесь Московсо.
МР-нь Прявтонть тевтнень нурька шкас топавтыцясь ёвтнесь СМИ-нь представительтненень региононть социально-экономической тевтнеде, конат кортавсть Россиянь Президентэнть марто, истя жо тедедень сентябрянь кочкамотнень видьс Прявтонь тевтнень топавтомадо.
"Вастовоманть шкасто мон пачтинь Владимир Владимировичнень Мордовиянь виевгавтомань прявт невтевкстнэде, седе, кодат изнявкст минь саинек ютазь 5 иетнестэ, истя жо топавтовиця проекттнэде", - мерсь Владимир Волков.
2016 иенть республикась прядызе экономикань весе отраслятнесэ редявикс виевгавтоманть марто. Внутренней валовой продуктонь касомась кармась 4,5%, промышленностень - 7%, ламолгадсть прявт капиталс инвестициятнень путомась, строязь седе ламо эрямо таркат, кить. Сехте прявтось - поладови алкуксонь зарплатань кастомась, седе пек велетнесэ. МР-нь Госсобраниянтень Кучомасонть Республикань Прявтось кармавтсь кастомс зарплатанть 6,5%, инфляциянь 5% коряс, 2018 иестэ инфляциянть ванстомс 5% лувсо, зарплатанть кастомс 10%.
"Владимир Путин тешкстынзе минек велень хозяйствань саевкстнэнь Санкт-Петербургсо ОНФ-нь медиафорумсонть. Алкукскак, меельце иетнестэ те ёнкссонть касомась кармась 7%. Ламолгавтови сывелень нолдамось (меельце колмо иетнень перть – кавтос ды пельс), пурназь ламо сюро, ламбамо якстерькай, - тешкстызе В.Д.Волков. - "Система" АФК-нь финансо-промышленной группась яви покш мель республикань аграрной секторонтень, неень шкане моли кортамо вейсэнь проекттнэнь теемадост".
Неень шкане республикасонть ветяви важодема промышленной производствань ёнкссо виевгавтомань комсте ламо проекттнэнь коряс. Масторонь келес регионось ашти ваеснце таркасо инновациянь продукциянь нолдамонь коряс - 28%.
"Тедеде Мордовиясо панжовить колмо од предприятият: кабелень нолдамонь коряс завод; медицинань препаратонь завод, конась важоди импортозамещениянть коряс; ды валдонь од источникень нолдамонь коряс завод. Неть заводтнэстэ эрьвась карми нолдамо продукция колмо миллиардто ламо целковоень питнесэ. Минек туртов прявтокс ашти республикасонть нолдавиця продукциянть пачтямс аволь ансяк Россиянь рынкатнес, истя жо Федерациянть томбалев", - мерсь МР-нь Прявтонь тевтнень нурька шкас топавтыцясь.
Поладови важодемась оптоволкнань нолдамонть коряс, 2017 иестэ арсеви нолдамс кавто миллиондо ламо километрат, истя жо панжомс заводонь омбоце очереденть. Тедеде арсеви прядомс инжинирингень куншкакуронь тееманть.
"Те проектэнть прядомсто, минь панжтано Россиясо од отрасля - те оптоэлектронной приборостроения, минь уш тедеде анокт ды важодтяно минек прявт предприятиятнень ды учёнойтнень марто масторсонть фотоникань виевгавтомань коряс. Те важодеманть минь ушодынек кавто иеде икеле, - тешкстызе Владимир Волков. - Саранскоесь ульнесь "валдонь прявтошокс". Ней минь вельмевтинек светотехникань весе предприятиятнень, эйстэст зярыя, прявтось - "Лисма". Россиясо эрьва колмоце лампочкась – Саранскоень, ней минь важодтяно сень лангсо, эрьва омбоце лампочкась улезэ Саранскоень. Ней уш те аволь се продукциясь, конась ульнесь икеле. Те светодиодт, те галогенэнь лампат, икелень кондят лампат, конатнень ломантне крутить патронс. Потсост жо вольфрамонть таркас кото ваттонь мощностень светодиодт. Минь одкстомтынек весе отраслянть, ёроковсто важодтяно экспортонть коряс. Продукциянть пачтятано Иранов, Чехияв, Венгрияв, Германияв. Бурундисэ панжинек вейсэнь предприятия".
Президентэнь Маень Указтнэнь топавтомаст лувсо теезь важодемань од таркат, строязь эрямо таркань 227 кавонзазь метрат, 7,5 тёжат ломанть вадрялгавтызь эрямонь условияст. Иенть прядовомс поладозь 5% ипотекась. Те программанть вельде покшолгавтозь строямонь объёмтнэ, 2000 ламо семиятне рамасть эрямо таркат, 60 процентс ламолгадсть ипотекань кредиттнэ.
Региононь руководствась яви покш мель од ломанень политикантень. Васняяк, профориентациянь важодемань ды технической специальносттнень коряс од ломантнень ванновтост полавтомань (сынст лангс конкурсось яла касы) программатненень.
Мордовиясо теезь эйкакшонь технопарк. Эйкакштнень ули возможностест невтемс эсь пряст инженерэнь тевсэнть: теемс робот, тонадомс квадрокоптерэнь ветямо, содамс, мезе те ГМО-сь, анокстамс виев лазер ды теемс гравировка, тонавтнемс 3D моделировнаиянть ды печатамс 3D принтерсэ, содамс, кода зарядямс телефононть водородонть вельде, совамс виртуальной эрямонтень ды решамс истят задач, конатнень эштё кияк эзинзе рашакшно. Сонзэ филиалтнэ теевить весе районтнэсэ.
"Миненек эряви кепедемс образованиянь уровнянть весе республиканть келес. Ёроков эйкакштнень туртов лицеесь саи 2 тарка Россиянь сехте вадря школатнень рейтингсэнть, сон кармазо икелев ветицякс, - толковизе МР-нь Прявтонь тевтнень нурька шкас топавтыцясь. - Минь свал путтано покш тевть, конатне, маряви, а топавтовить, ансяк самай те ашти икелев эскельдямонть туртов кармавтомакс. Минь бажатано теемс весе условиятнень ломантень эрямост вадрялгавтомга".
Сы шкань проекттнэде кортамсто, Владимир Волков тешкстынзе объекттнэнь, конат стявтовить 2018 иень Футболонь коряс мирэнь чемпионатонтень, сынст ютксо "Юбилейный" микрорайонось, "Тавла" эрямонь комплексэсь. Израелень предприятиянть марто вейсэ арсеви топавтомс Мордовиясо велень хозяйствань коряс зярыя проектт.
Республикань руководствась путы покш тев панжомс од производстват сеть районтнэсэ, косо улить ламо важодиця кедть. Рузаевкань ёнкссо арсеви строямс теплицат, мебелень фабрика, Покш Игнатовасо арсеви кастомс эмежть.
Истя жо сави топавтомс покш важодема кочкицятнень кармавтомаст топавтомга. Те китнень, школатнень, культурань кудотнень строямось ды витнемась. Арсевить стявтомс од школат Рузаевкасо, Торбеева ёнксонь Дракинасо, Зубова-Полянань ёнксонь Умётсо.
"Кочкамотнес ютамсто, кеман, мон ды монь командась тейсынек весементь, мезе минек эйстэ ашти, республиканть виевгавтомга, ломантнень эрямост кармазо седеяк вадрякс ды сэтьмекс", - мерсь В.Д.Волков.