«Тесэ минь невтсынек сехте вадрянть, мезе ули минек республикасонть. Мордовиянь прявт сюпавчись – те минек ломантне. Лётчикесь, Советской Союзонь Героесь Михаил Девятаев, а изнявиця адмиралось Фёдор Ушаков, патриархось Никон, масторлангонь келес содавикс скульпторось Степан Эрьзя, кенярксонь артыцясь Федот Сычков. Неть содавикс ломантне – минек покш масторонь ине историянь пелькс», – мерсь Артём Здунов.
Сон ледстизе эрзянь-мокшонь лия енов а молиця культуранть, конась невтезь музыкасонть, кельтнесэ, оршамопельтнесэ, кедьчелькев ломантнень важодевкстнэсэ. Весе Россиянь келес содавикст эрзянь-мокшонь промыслатне – Тавлань чувтосто налшкетне, Мордовиянь мореной тумосто теевкстнэ ды истя седе тов.
«Мордовиясь содавикс тантей, а сехте прявтось – лезэв ярсамопельтнесэ. Минь васенцеть органической сокамонть-видеманть коряс, отечественной розатнень сехте покш производительтнень ютксо вейкеть», – мерсь региононь Прявтось.
Эште вейке прявт енксось – лекарстватнень теемась. Республикасонть нолдыть антибиотиктнень туртов субстанцият, противовирусной средстват ды лия пек эрявикс препаратт. Промышленностень лия енкстнэяк истя жо эрязасто важодить. Мордовиясь васенце промышленной вагононь строямосо, теде башка, советской шкатнестэ саезь кадови светотехнической производствань ды силовой электроникань куншкакурокс. Ней регионось – ЕврАзЭС-сэ оптической волокнань вейкине производитель.
Спортонтень ды культурантень истя жо явови ламо мель. Мордовиясто спортсментнэ славить масторонть спортонь эрьва кодат видтнэсэ – греко-римской бороцямосто саезь спортивной якамонть видьс.
«Мордовиясь кезэрень шкатнестэ саезь вечкеви этнографиянь, пертьпельксэнь дивавтыця маршруттнэсэ. Те - военно-патриотической воспитаниянь весероссиянь куншкакуротнестэ вейкесь», — тешкстызе Артём Здунов.
«Россия» раськеютконь выставкась-форумось карми важодеме 2023 иень сундерьковонь 4-це чистэнть саезь 2024 иень чадыковонь 12-це чинть видьс Московсо ВДНХ-со. Меельце иетнестэ прявт изнявкстнэде евтнить Россиянь весе регионтнэ, истя жо од территориятне.