Ацамковонь 12-це чистэ коллективентень поздоровт евтась Мордовиянь Прявтось Артём Здунов.
«Музеентень яван покш мель ды вечкема. Тынк стенатнесэ ванстови тиринь енксонть ды сонзэ эрицятнень историясь. Тынь топавтадо сехте прявтонть – лездатадо миненек, минек эйкакштненень, ламот поколениятненень вечкемс тиринь енксонть. Содамс минек геройтнеде, минек земляктнеде – те содамс эсенек прятнеде», – мерсь региононь руководителесь.
Артём Здунов тешкстызе важодемань эрявиксчинть, конась топавтови интерактивностень ды мультимедийностень тевс нолдамонть коряс – те лезды явовтомс од превтнень ды седейтнень мелест. «Ардатовский краеведческий музей» филиалонь прявтонтень Зинаида Киушкинанень максозь «Заслуженный работник культуры Республики Мордовия» почетонь лемесь.
Музеень важодицятненень поздоровт евтась Саранскоень ды Мордовиянь митрополитэсь Зиновий. Сон тешкстызе: коллективесь вансты ламо иневанькс кедьенкст, конат лездыть сы шкань поколениятненень чарькодемс питнейчитнень ды духовной лувонть, конатнесэ сюпав Россиясь.
Мордовиянь Госсобраниянь Председателень полавтыцясь Наталья Долматова тешкстызе: «Течи – РФ-нь Конституциянь Чи. Музеесь вансты, истя жо, ине Россиянь Конституциянь весе вете нолдавкстнэнь. Тынь максстадо каршо валт шкань весе вешематнень лангс, текень пингстэ ютавтадо патриотической покш ды пек эрявикс важодема. Топавтадо тень седеень вешеманть коряс».
Музеесь кирди вейсэнь тевдеемань кеме сюлмот Пензань областенть марто. Те валовсь «Фестиваль музейных практик» регионъютконь од проектэнтень. Пензань областень губернаторонть Олег Мельниченконь пельде музеень коллективентень поздоровт евтась губернаторонь советникесь, Россиянь Краеведтнэнь вейсэндявксонь председателесь Владимир Первушкин.
Музеень прявтось Дмитрий Фролов евтась сюкпря республикань руководствантень ды весе инжетненень учреждениянь важодемантень мелень явоманть кисэ. «Покш дата, покш история! Кирдян каштанчи эсь коллективенть кувалма – те алкуксонь профессионалтнэнь семия!»
Юбилеень чинть кувалма истя жо ютавтовсь музеень эряза лездыцятнень экскурсоводокс-волонтерокс алтамось. Те од коесь карми свалшкань.
Кенярксчинь пельксэнть прядовомга музеень руководителесь ютавтсь инжетнень туртов экскурсия кавто од экспозициятнень коряс: «105 шедевров Мордовского краеведческого музея» ды «Иоанно-Богословский храм: к 330-летию старейшего здания региона».
Артём Здунов мерсь: «Пурназь лия енов а молиця экспонатт, сехте прявтось – тесэ ули сень философиясь, кода кассть-кепететсть Саранскоесь, Мордовиясь, кодат бу границятнесэ сынь авольть уле, кодамо бу шкась илязо уле. Минек тевесь – пачтямс тень весементь эйкакштнень-нуцькатнень туртов».
Мордовия Республикань Прявтонь пресс-службась