Кортамось мольсь ПФО-нь регионтнэсэ социальной ежонь кастомань коряс округонь власттнень тевдеемадост. Полпредэнть валонзо коряс, ломантнень эрямост вадрялгавтомась, касомань-кепетемань ды прянь невтемань туртов условиятнень теемась улест прявт енксокс властень весе органтнэнь важодемасост. «Ломантне аволь ансяк неест минек важодеманть, истя жо улест социальной эрявикс тевтнень кемекстамосо, штобу государствань ресурстнэ нолдавольть тевс лезэвстэ ды эрицятнень вешемаст коряс», – тешкстызе полпредэсь. Те токши тевдеемань весе енкстнэнь.
Артём Здунов эсь тевдеемасонзо евтнесь важодемадонть, конась топавтозь республикасонть: «5 иетнень перть Мордовиясо «Формирование комфортной городской среды» программанть коряс витнезь-вадрялгавтозь общественной таркат 10-ксть седе ламо икеле 15 иетнень коряс. Ламотне ютксост – ошонь ды райононь парктнэ, площадьтне, сквертнэ, спортплощадкатне эзть витневе 20-30 ды седе ламо иеть. Витнемань-вадрялгавтомань коряс аволь покш тевтнеяк – минь ледтяно тень «генеральной ванськавтомакс» – максыть эрицятненень порядоконь, свалшкань касомань-кепетемань ды властенть пельде мелень явомань ежо. Вишка тевтнеде лезэвчись пек редяви. Седе пек, зярдо те важодемась ветяви минек эрицятнень марто вейсэ, тенесэ миненек пек лезды Региононь управлениянь куншкакурось».
Владимир Табак, экспертэнь сообществанть пельде кортамсто, тешкстызе: «2022 иестэ ПФО-со соцсеттнесэ эрицятнень пшкадемаст кассть 200 тежас. Социологической ванноматне невтизь, Равчирень 45% эрицятне редить сеттнесэ властень органтнэнь пельде каршо сюлмонть. Те пек покш невтевкс».
Мордовия Республикань Прявтонь пресс-службась