Прявт санитарной врачось евтнесь республикань руководителентень: регионсонть санитарно-эпидемиологической тевтне аштить свалшкань лувсо. Кортамось мольсь педиця орматнеде, эрицятненень симема ведень пачтямодонть, кошттонть.
Прявт тевесь течи – ютавтомс гриппенть каршо ливксэнь путомань кампаниянть. Неень шкане ливкс путозь эрицятнень 25%, аравтлувось – 60%. Хозяйствующей субъекттнэнень кармавтозь седе эрязасто ютавтомс эсь сотрудниктнень иммунизациянть, штобу а нолдамс эпидемиянть. Кода тешкстызе Татьяна Харитонова, гриппсэ ды ковидсэ ормалгадоманть шкастонзо диагностиканть туртов эряви теемс тест-систематнень таштавкс.
Мезесь токши корьсэ ормалгадоманть – иенть ушодовомсто республикасонть редязь весемезэ колмо тевть. Эйкакштнень иммунизациянь коряс аравтлувось топавтови целанек.
Прявт санитарной врачось истя жо пачтясь симема ведьтенть. Роспотребнадзоронь региононь управлениясь ванны веденть централизованной водоснабжениянь лисьмапрятнестэ, водопроводтнэстэ ды водопроводной распределительной сеттнестэ – лади-арась санитарной вешематненень. Республикань зярыя енкстнэсэ редяви фторонь, боронь ды сульфаттнэнь кирдемань коряс норматнень эйстэ туемась. Тень кувалма эрявить тевть гигиенической норматнень видьс веденть вадрялгавтомань коряс. Неень шкане «Чистая вода» федеральной проектэнть лувсо Ковылкинасо прядови водозаборонть ды водоснабжениянь сеттнень витнемась-петнемась, истя жо моли водоснабжениянь сеттнень строямось Ицялонь енксонь Кемля велесэнть. Мелят «Жилье и городская среда» национальной проектэнь топавтоманть лувсо Лямбирень енкссо строязь ведень ванськавтомань станция, питнезэ 109 млн целковойть – тень вельде витевсь веденть коряс умонь стакачись «Сельхозтехника» микрорайонсонть. Те важодемась ули поладозь.
Коштонть коряс гигиенической нормативтнень эйстэ туемат апак редя.
Мордовия Республикань Прявтонь пресс-службась