«Те кенярксчись кеместэ сюлмавозь минек масторонь историянть марто, эрьва раськень, минек Россиянь Федерациянь эрьва субъектэнь историянть марто. Геройтне – те весе сеть, кить малавгавтыть изнямонть ней, зярдо минь ванстано минек границятнень ды идетяно сэтьмечинть, конась пек эряви минек покш масторонь весе эрицятненень. Сеть, кить ульнесть войнатнесэ, конат зярдо-бути мольсь минек масторсонть. Сеть, кить топавтсть трудонь подвиг сэтьме шкастонть, кить ливтясть космосов, кить лездасть минек масторонтень лисемс васенце таркатнес технологической кастоманть-кепетеманть коряс. Геройтнеде ламо, сынь эрьва чистэ топавтыть ине тевть», – мерсь Артём Здунов.
Сон тешкстызе, Президентэнть решениянзо коряс теезь Культурань инициативатнень Президентэнь фондось. Мордовиясь тедеде топавтызе прявт проекттнэстэ вейкенть – «Время героев». Сон алтазь ломантненень, кить важодить предприятиятнесэ кементь иеть, идить ломанть, эрьва чистэ топавтыть ине тевть эйкакштнень кастомсто.
«Минь свал ледстнетяно Ине Отечественной войнань геройтнень – Михаил Девятаевень. Мордовиянь Госсобраниянь депутатось Владимир Дежуров – кавксть ульнесь космоссо, топавтсь покш тевть. Неть геройтне минек ютксот», – тешкстызе региононь руководителесь.
Мордовиянь Прявтось евтнесь эсензэ ежодонзо, зярдо вансь течи Кремлясто трансляциянть, конасонть масторонь Президентэсь Владимир Путин макссь покш казне – «Золотая Звезда» медаль Россиянь Героентень, Мордовиянь Дубенкань енкссо чачозентень Давид Алексеевич Малыйкиннэнь.
«Сон получизе героень тештенть Россиянь Президентэнть кедьстэ! Ды минь учотано героенть Чачома енкссо, штобу евтамс сюкпря, энялдомс вастовомс Мордовиянь од ломантнень марто, евтнемс эсензэ прядонзо ды эрямодонзо».
«Мон неян тесэ ламо содавикс чамат – боевой тевдеематнень геройтнень. Сюкпря, течи тынь тесэтядо, муиде шка. Мон содан, тынь лездатадо сеть цератненень, конат ней туить войнав, кода видестэ ветямс прянть, штобу велявтомс изнямо марто, велявтомс живстэ. Те покш лезкс!» – мерсь Мордовиянь Прявтось.
Сон истя жо тешкстызе, героень тев – важодемс минек од ломантнень марто, те аволь шожда шкастонть, зярдо кие-бути бажи полавтомс историянть. Сюкпрянь валт евтазь тонавтыцятнень, врачтнень, доброволецтнэнь ды волонтертнэнь лемс, сынь кирдить свалшкань сюлмо военнослужащейтнень семияст марто, сеттнень марто, кинень эряви лезкс.
«Те вадря кенярксчи. Ансяк минек Россиянь ламо раськень эрицятне машсть истямо мель марто теемс ды кирдемс те кенярксчинть. Пазось максозо: сон эрязо пингеде пингес!» – мерсь Артём Здунов.
Сон явшесь покш казнеть.
«Лауреат Государственной премии Республики Мордовия» лемесь максозь «Отечество» группань художественной руководителентень Дмитрий Топтуновнень ды морыцянтень Алексей Дигалевнень. Музыканттнэ аволь весть якасть концерт марто Донецкой Народной Республикав, важодсть Белгородской областень госпитальтнесэ, боевой анокстамонь таркатнесэ.
Мордовия Республикань Прявтонь Благодарность яволявтозь солдатонь аватнень комитетэнтень совицянтень Анна Голубеванень, 26№ Лицеень ОБЖ-нь тонавтыцянтень ды кадетэнь класстнэнь кураторонтень Сергей Екатерининнэнь, Вооруженной Вийтнень ветеранонтень Владимир Костиннэнь, «Тавла» тонавтнемань куншкакуронь историянь тонавтыцянтень ды «Армейская слава» школань музеень руководителентень Светлана Кудрявцеванень, космической войскатнень ветеранонтень Александр Подкатовнень, Саранскоень 32№ школань историянь тонавтыцянтень ды Сталинградонь тюремань участниктнень, конат чачсть Мордовиясо, Боевой славань школань музеень руководителентень Елена Смирнованень, «103 Арсенал» АО-нь виевгавтомань коряс прявтонь полавтыцянтень Виталий Ломакиннэнь, Войнань, трудонь, Вооруженной вийтнень ды правань ванстомань органтнэнь ветерантнэнь Весероссиянь общественной организациянь Мордовия Республикань организациянтень совицянтень Камиль Курмаевнень.
Луганской Народной Республикасто эйкакштнень туртов университетэнь профилень тонавтомань сменань ютавтомасо эряза улеманть кисэ Мордовия Республикань Прявтонь Благодарностьсэ казезь М. Е. Евсевьевень лемсэ МГПУ-нь вожатойтне Юлия Акимова, Илья Алыков ды Наталья Моисеева.
Мордовия Республикань Прявтонь пресс-службась