Мордовиянь Прявтось ваннынзе студенттнэнь анокстамонь таркатнень, кабелень продукциянь, икеле молиця кабелень технологиятнень ды мехатроникань лабораториятнень ды зярыя лия участкатнень. Сон кортась студенттнэнь ды преподавательтнень марто. 2023 иестэ кластерсэнть тешкстазь 440 целевой договорт, те иентень аравтлувось – 800. Колледженть юрсо теезь кабелень производствань ды IT-аутсорсингень коряс тонавтнемань-производственной комплекс.
Республикань тонавтомань блоконь важодемань невтевкстнэде коллегиясонть евтнесь Мордовиянь образованиянь министрась Елена Солдатова. Федеральной мониторингенть коряс 2023 иестэ Мордовиянь образованиянь системась сайсь 12-13 таркат масторсонть, кепедевсь 25 невтевксэс.
«Россиянь Президентэнть ды республикань Прявтонь весемендонь лезксэнть вельде отраслянтень явозь 13 миллиардто седе ламо целковойть. Тень пингстэ 3,9 млрд – федеральной бюджетстэ образованиянь системань виевгавтомантень Россиянь Минпросвещениянь пелькстамотнень ды межбюджетной трансфертнэнь коряс. Те лездась редявикстэ вадрялгавтомс образованиянь организациятнень инфраструктуранть», – евтнесь ведомствань руководителесь.
Ютазь иень невтевкстнэнь коряс республикась сайсь васенце тарка масторсонть дополнительной образованиянь организациятнес эйкакштнень яксемаст коряс. Важодемась ветяви военно-патриотической воспитаниянь куншкакуротнесэ, музейтнесэ, театратнесэ, спортонь клубтнесэ. Текень марто, эряви кастомс те енксонтень мелень явоманть.
Эште вейке прявт енксокс евтазь туризмась – течи сонзэ коряс ули покш вешема эйкакштнень ды тетятнень-аватнень пельде. Зярс республикань ансяк 13 муниципальной районтнэсэ топавтовить спортонь туризмань башка программатне. Елена Солдатова тешкстызе: «Путтано эсенек икелев тев – ламолгавтомс школань ды студентэнь маршруттнэнь, аволь ансяк спортонь, истя жо образовательно-туристическойтнень».
Башка мель неень шкань образованиянь енкссонть явови профориентациянтень. Мордовиясо уш нолдазь тевс «эйдень кужо – школа – техникум – производства» профориентациянь кластерэнь лувось, профориентациянь лия енов а молиця практика топавтови СПО-нь системасонть. Те максы эсензэ цетавкст: средней профессиональной образованиянь системась карми седеяк эрявиксэкс. Колмодо седе ламос кассть тонавтнемань целевой договортнэ, аволь ансяк агропромышленной комплексэнть марто, истя жо региононь промышленной предприятиятнень марто.
Башка мель явозь стака обуця эйкакштнень марто важодемантень. Ведомствась нолды тевс важодемань од лувт. Мелят республикасонть примазь наставничествадо ды истят эйкакштнень марто профилактикань важодемадо законось. Рузаевкань енксось уш кундась те важодемантень - тосо 11 кемгавксово иеде седе вишкине эйкакшт ды ниле наставникть. Те практикась нолдави тевс лия районтнэсэяк.
Образованиянь енксонть туртов талновтыцякс кадови кадратнень кевкстемась. Те тевенть лезэвстэ витемась – студенттнэнень важодемань таркатнень максомась. Тедеде республикань образованиянь организациятнесэ важоди 351 студент. Малав 700 ломанть тонавтнить педагогической специальносттнесэ целевой тонавтнемань договортнэнь коряс. Образованиянь министрась тешкстызе: а мереви нолдамс вейкеяк целевик.
«Педагогонь ды наставникень иестэнть редявикс цетавксокс кармась од ломантнень ютксо тонавтыцянь профессиянь престижень касомась – педагогической специальносттнес максозь яволявтоматне кассть 10%. Тешксэв, Педагогонь ды наставникень иестэнть минь ютынек Семиянь иентень. Поладтано важодеме вейсэ, эдь вейсэ минь тейтяно седе ламо», – мерсь Елена Солдатова.
Образованиянь коряс государственной политикань топавтомасо муниципалитетэнь таликадонть евтнесь Ковылкинань енксонь прявтось Игорь Бутяйкин. Истя жо кунсолозь неень шкань образованиясо прявтонь ды тонавтыцянь таликадонть пачтямотне.
Мордовиянь Прявтось тешкстызе: региононь образованиянь системась вадрясто касы-кепети. Тонавтомань неень шкань условиятнень теемаст туртов тевс нолдавить федеральной проекттнэнь возможносттне. Кавто иетнень перть педе-пев витнемань федеральной программанть коряс витнезь 32 зданият. Текень марто, весемезэ эйстэст республикасонть 640. Муниципалитеттнэ ветить соцобъекттнэнь инвентаризациянть – те лезды анокстамс зданиятнень списканть, конатненень эряви педе-пев витнема. Теде башка, строямонь ды витнемань коряс аравтлувтнень эряви анокстамс эрьва эрямонь пунктсонть, микрорайонсонть демографиянь тевтнень лангс нежедезь.
«Мордовиянь эрьва эрямонь пунктсонть улезэ вадря образования», – тешкстызе Артём Здунов.
Тедеде панжовить эште колмо школань Кванториумт, теевить дополнительной образованиянь малав тежа од таркат школатнесэ ды техникумтнесэ. Те важодемась эрявикс ды ули поладозь. Мордовиясь масторсонть васенцетнень ютксо вейсэндявсь пилоттомо авиациянь коряс проектэнтень – теевить 17 специализированной кужинеть школатнесэ, федеральной бюджетстэ явовить малав 280 млн целковойть. Тонавтомань тевентень вейсэндявить производственниктне – эйкакштне тонавтнест алкуксонь практикасо.
Эште вейке прявт тевесь – образованиянь организациятнесэ сэтьмечинь кастомась. Колмо иетнень перть бюджетстэ явозь 137 млн целковойть: объекттнэсэ улест ванстомань неень шкань средстват. Текень марто, ламось ашти персоналонть ды эсест тонавтницятнень прянь ветямост эйстэ. Тень кувалма, эрявикс ерокчитнень эряви кемекстамс тонавтнематнень шкасто.
Башка ванновт ало аштить эйкакшонь оймсемань кевкстематне. Мелят республикась совась федеральной программантень – Рузаевкань енкссо «Изумрудный» лагерьсэнть строязь кавто од корпуст. Те иень программасонть эште кавто объектт: неть тевтнес эряви явовтомс федеральной ярмакт.
«Федеральной пелькстамотнесэ миненек мезеяк а мереви менстямс», – тешкстызе Мордовиянь Прявтось.
Тонавтомань тевсэнть прявтось, Мордовиянь Прявтонть ванновтонзо коряс, – домка смустесь. Вейсэнь тевдеема улезэ ладязь «Знание» обществанть, «Мир возможностей» партиянь проектэнть, Рузонь православной церькованть марто: улезэ опытэнь максома, вейсэнь важодемантень мелень явома, профориентация.
«Те вейсэнди эйкакштнень куш-кодамо коллективсэнть. Прявтось, эйкакшось вечкезэ важодеме, кемезэ тень эйс, саевель киньгак лангсто невтема. Наставничествань иесь ютась – наставничествань эпохась ушодовсь», – мерсь региононь руководителесь.
Тешкстазь республиканть туртов кадратнень анокстамосо образованиянь системань покш таликась – улезэ поладозь важодемась «Профессионалитет» проектэнть лувсо кластертнэнь теемаст коряс. Федеральной те проектэнть вельде регионсонть уш теезь вете кластерт, бюджетэсь – 670 млн целковойтнеде седе ламо. Кемекстазь мель школатнесэ вельмевтемс производствань комбинаттнэнь. Ней те важодемантень эряви вейсэндявомс весе отраслевой ведомстватненень.
«Ней сы образованиянь шкась – тынк шкась! Кеман, минек образованиянь системась, конантень свал максовсь покш питне масторсонть, полады касомо-кепетеме. Покш сюкпря мелят важодеманть кисэ – сон ульнесь мельстуицякс, тынь ламо теиде. Икеле минек учить ламо од проектт!» – прядызе кортамонзо Артём Здунов.
Итогонь коллегиянть лувсо образованиянь енксонь важодицятненень явшезь государственной наградат.
Мордовия Республикань Прявтонь пресс-службась