Пачтямо марто пшкадсь Следствиянь управлениянь руководителесь Олег Коробов. Мелят Следствиянь комитетэнь сотрудниктненень удалась топавтомс вадря невтевкст зярыя енкстнэнь коряс, васняяк стака ды пек стака преступлениятнень панжомаст коряс. Топавтозь покш важодема ютазь иень преступлениятнень панжомаст коряс. Криминалистикань изнявкстнэнь, неень шкань экспертизатнень, оперативной подразделениятнень марто вейсэнь тевдееманть вельде удалась панжомс 25 истят преступленият, пеледест ламотне кандовить стакатнень ды пек стакатнень юткс. Ламо тееви талновтыця кевкстематнень витемаст туртов. Кортамось моли уголовной процессэнь участниктнень праваст ванстомадост, икелепелень следствиянь вадрячинть кастомадонть ды ванномань шкатнень киртямодонть ды лиятнеде.
Мордовиянь Прявтось тешкстызе: Следствиянь комитетэнтень явови башка талика коррупциянть ды налогонь преступлениятнень каршо бороцямосонть. Мелят следствиянь управлениянь сотрудниктне прядсть 4 уголовной тевть налогонь преступлениятнень коряс, конатнень коряс государствантень пандовтозь емавкс 208 млн. целковойтнеде седе ламо. «Эряви поладомс те важодеманть ды бажамс пандовтомс седе ламо емавкст, топавтомс алкуксонь пандовтоманть досудебной шкасто. Те эряви социальной ламот тевтнень топавтоманть туртов», – мерсь Артём Здунов.
Мордовиянь руководителесь истя жо тешкстызе: пшти ванновт ало улест бюджетэнь ярмактнень видестэ тевс нолдамонь кевкстематне, истя жо национальной проекттнэнь топавтоманть, бизнесэнтень ды эрицятненень государственной лезксэнь явоманть лувсо. Емавкстнэнь велявтомань кевкстематне тесэ улест прявтокс.
Прявт енксось – киберпреступлениятнень а нолдамось, меельце иетнестэ те кармась сехте талновтыцятнестэ вейкекс. Электронной преступлениятнень стака редямс, ванномс, велявтовтомс сынст коряс емавкстнэнь. «Эряви арсемс, кода а нолдамс истят преступлениятнень топавтоманть. Карматано важодеме профилактиканть лангсо, ломантне иляст маняво», – мерсь республикань Прявтось.
Теде башка, Артём Здунов тешкстызе трудонь ды социальной отношениятнень коряс ванномань эрявиксчинть, истя жо социальной лезксэнь получамсто эрицятнень праваст топавтоманть, ломантнень эрямонь таркань праваст ванстоманть коряс – долевой строительстванть, каладозь кудотнестэ одс ютавтоманть, од семиятненень, уроз-эйкакштненень ды лия категориятненень эрямонь таркатнень максоманть пингстэ.
Прявт кевкстемась, конась веши покш мелень явома – эйкакштнень сэтьмечись. Преступлениятнень, конатне сюлмавозь кемгавксово иеде седе вишкинетнень марто, ламочист киртямонть пингстэ касы сынст стакачись. «Весе минь содатано тонавтнемань заведениятнесэ вооружённой каявоматнеде, эйкакштнень лангсо нарьгамотнеде, истя жо лия эйкакштнень пельде, наркотиктнень аволь закононь коряс оборотс, экстремистской акциятнес ды манчицятнень вейсэндявкстнэс сынст совавтомадост, - тешкстызе Артем Здунов. – Миненек вейсэ эряви виевгавтомс важодеманть эйкакштнень ютксо преступностень профилактиканть коряс. Тень туртов эряви куроксто редямс гайневтематнень, конат сыть тонавтыцятнень ды тетятнень-аватнень, социальной службатнень, волонтертнэнь пельде, эрязасто совавтомс те важодемантень общественной организациятнень, кемгавксово иеде седе вишкинетнень тевест коряс комиссиятнень. Ды, нама, куроксто кемекстамс эрявикс тевть экстремизмань, сепаратизмань, национализмань невтевематнень коряс, васняяк од ломантнень ды мигрантнэнь ютксо, Вооруженной Вийтнень ды специальной военной операциянь дискредитациянь бажамотнень коряс».
Мордовиянь Прявтось евтась сюкпря Следствиянь комитетэнь сотрудниктненень важодеманть кисэ, лезэнь кандыця вейсэнь тевдееманть кисэ.
Мордовия Республикань Прявтонь пресс-службась