Иенть прядовомсто строямонь отраслясь коень коряс евты цетавкстнэнь – максовить объекттнэ, кортавить арсематне од шкантень. 40 млрд целковойть – тедеде республикасонть строямонь тевтнень покшолмась. Те ламо, кода тешкстызе Артём Здунов. Сон мерсь, строительствась – весе экономикань ветиця вий, ды евтась сюкпря строямонь отраслянь важодицятненень алкуксонь тевдееманть кисэ.
Меельце иетнестэ республикасонть кармась витевеме апак прядо объекттнэнь стакачись. Панжозь эень каток Ковылкинасо, конань ушодызь строямо 10 иетнеде седе икеле. Сы иестэ строяви Саранскоень коррекционной школась-интернатось, сонзэ строямось моли уш 30 иетнеде седе куватьс. «Истят объектт мон эште эзинь вастокшно! – видькстась Артём Здунов. – Ансяк минь те тевенть топавтано ды арсетяно теемс школастонть федеральной смустень куншкакуро».
Республикань Прявтось истя жо тешкстызе эрямо таркатнень строямонь эрявиксчинть, истя жо каладозь кудотнестэ ютавтовицятнень, уроз-эйкакштнень, од семиятнень туртов. «Ломантне учить неть квартиратнень, эрявить максомс шкастост», – тешкстызе сон.
Республикасонть поладови социальной эрявикс объекттнэнь строямось ды педе-пев витнемась. Тедеде Саранскойсэ панжовсь 1 450 таркас од школа - Михаил Петрович Девятаевень лемсэ «Высота» тонавтнемань куншкакурось. Поладови школатнень педе-пев витнемань программась. Мордовиянь каштанчись – масторлангонь уровнянь ВМХ-трекесь.
Артём Здунов евтась сюкпря масторонь Президентэнтень Владимир Путиннэнь ды РФ-нь Правительствантень региононтень лездамонть кисэ, истя жо ломантнень туртов прявт объекттнэнь строямонь кевкстематнесэ.
Строямонь отраслянь важодицятненень явшезь государственной наградат. Масторонь Президентэнь Благодарнестесэ тешкстазь «Анелия» строямонь компаниянь плотникесь Василий Ледяйкин. Казненть тензэ максызе республикань Прявтось Артём Здунов.
Истя жо максозь наградат Мордовиянь Госсобраниянть ды Правительстванть пельде – строицятненень поздоровт евтасть МР-нь Госсобраниянь Председателень полавтыцясь Сергей Вдовин ды вице-премьерэсь Инсаф Хайруллин.
Мордовия Республикань Прявтонь пресс-службась