Государствань прявтось тешкстызе: те проектэсь – школатнесэ тонавтомань ды превс путомань неень шкань условиятнень теемань коряс важодемань пелькс. 2019 иестэ ушодозь од школатнень строямонь программась, 2022 иестэ кармасть капремонтонь программанть лувсо образовательной учреждениятнень зданиятнень витнеме. «Кавто иетнень перть Федерациянь субъекттнэнь марто вейсэ витнезь ниле тежатнеде седе ламо школань зданият. Те невти, миллион кавксо сядо тежадо аволь седе аламо эйкакшт кармасть тонавтнеме неень шкань, вадря условиятнесэ. Башка мель явтано велетнесэ образованиянь материально-технической юронь виевгавтомантень – те программанть башка енксозо, од ломантнень туртов вейкеть возможносттнень теемась», – мерсь Владимир Путин.
Мордовиясо кавто иетнень перть педе пев витнезь 32 школань зданият малав 16 тежат таркатнес. Сынст ютксто 15 – те велень школат. Неть тевтнес явозь 2,5 млрд целковойть. Текень пингстэ зданиятне аволь ансяк витнезь, истя жо путозь неень шкань оборудования. Программась вейсэндинзе тонавтыцятнень, эйкакштнень ды тетятнень-аватнень. Вейсэ сынь лездыть дизайн-проекттнэнь анокстамосо, ваныть тевтнень топавтомаст мельга.
Мордовия Республикась вейсэндявсь Президентэнть кедьсэ весероссиянь промксонтень Рузаевка енксонь Трускляй велень школастонть, конась витнезь федеральной программанть коряс. Зданиясь строязь 1989 иестэ, ней сон а содави. Одкстомтозь инженерэнь коммуникациятне, ушо енксось, латось, потмось. Рамазь од мебель, инновациянь оборудования, столовоенть туртов техника. Нупальтнень дизайнэнь анокстамосо лездасть тетятне-аватне, тонавтыцятне. Школась лиссь мазый, неень шкань, вадря – эйкакштнень ды тонавтыцятнень туртов.
Тедеде Мордовиясо педе-пев витнемань программанть коряс витневить эште кото школат.
Промксонть лувсо государствань прявтось кармавтсь явомс башка мель зярыя енкстнэнь лангс. Сынст ютксо – школатнень масторлангонь сетентень покш скоростень вейсэндявомась, эрявикс юронь теемась истят предметтнэнь туртов, кода «Основы безопасности и защиты Родины», «Труд», тонавтнемань сы иестэ сынь кармить тонавтовомо од программатнень коряс.
Прявт енксось – тонавтыцятнень квалификацияст кастомась. «Ве шкане эряви ванномс башка стимултнэнь, мотивациянть, педагогической вузтнэнь, университеттнэнь течинь прядыцятне молевельть важодеме школатнес, неевельть эсест туртов профессиянь, карьерань касома. Энялдан Правительстванть, Федерациянь регионтнэнь евтамс мельть-арсемат школатнес од тонавтыцятнень тердеманть туртов», – мерсь Владимир Путин.
Истя жо эряви поладомс важодеманть школатнесэ актовой залтнэнь, библиотекатнень, медицинань нупальтнень одкстомтоманть, кужинетнень ды секциятнень пештеманть, спортонь инфраструктурань тееманть, образовательной организациятнесэ сэтьмечинь топавтоманть коряс.
Мордовия Республикань Прявтонь пресс-службась