Течинь чинтень предприятиясь - металлической ды производственной мебелень, стеллажень, металлической шкафтнень прявт производительтнень ютксо вейкесь.
Заводсонть путозь неень шкань металлонь обработкань оборудования, конась нолдазь эсенек ды лия мастортнэсэ. Предприятиясонть важоди ламо иень стаж ды металлонь обработкань коряс покш опыт марто персоналось – 150 седе ламо ломанть. Весе те лезды нолдамс покш качествань продукция.
Предприятиясь топавтсь экономикань покш невтевкст. 2023 иестэ линиятнестэ груздязь продукция малав 450 млн целковойтнень питнесэ. Заводонтень удалась покшолгавтомс те невтевксэнть 2022 иенть коряс 47 проценттс.
Мордовиянь Прявтось ваннызе анокстамонь участканть ды пурнамонь цехенть. Проектэнтень инвестициятне кармасть малав 110 млн целковойть, сынст ютксто 80 млн – оборудованиянть лангс.
«Торгово-производственная компания «Верстакофф» ООО-нь генеральной прявтось Игорь Силин евтнесь: заводонь продукциянть лангс ули свалшкань вешема ды сон пачтяви Россиянь ды СНГ-нь келес дилертнэнь ды официальной представительстватнень пельде, конат важодить Россиянь 60 седе ламо оштнесэ.
«Од цехсэнть нолдавиця продукциянть - автоматизированной мобильной вертикальной складтнэнь – арасть аналогост ды сынь пек эрявить. Таркась чамдовсь Россиянь рынкасто омбо масторонь производительтнень туемадост мейле. Весе программной обеспечениянть, конструктивенть – анокстызь Саранскойстэ ды Московсто минек инженертнэ. Од цехенть вельде теезь малав 50 важодемань од таркат», – евтнесь Игорь Силин.
Артём Здунов тешкстызе: компаниясь сайсь од покш тарка. «Рынкась пек покш. Улить омбо масторонь аналогт, ансяк мезекс усксемс ве ендо, бути мереви теемс Краснослободскойсэ, – мерсь республикань Прявтось. – Ансяк ломантне а сатыть. Предприятиянтень эрявить 70 сотрудникть. Путтано тев Образованиянь министерстванть ды Трудонь министерстванть икелев сыця коллегиясонть».
Республикань руководителесь арсесь производственниктненень а киртямс саезь темпатнень, келейгавтомс номенклатуранть ды пачтямотнень рынканть.
Мордовия Республикань Прявтонь пресс-службась